ସମ୍ବଲପୁର ବ୍ୟୁରୋ ,କନକ ନ୍ୟୁଜ୍ : ନକଲି ବାନ୍ଧକଳା ଶାଢ଼ୀ ଏବେ ସମ୍ବଲପୁର ଶାଢୀ ବଜାରରେ ନିଜର କାୟା ବିସ୍ତାର କରିଚାଲିଛି । ଏହି ସମୟରେ ପ୍ରଧାନମନ୍ତ୍ରୀଙ୍କୁ ବୁଣାକାରମାନେ କରିଥିବା ଅନୁରୋଧ କ୍ରମରେ କେନ୍ଦ୍ରୀୟ ଟିମ୍ ବରଗଡରେ ତଦନ୍ତ କରିଛନ୍ତି । ନକଲି ସମ୍ବଲପୁରୀ ଶାଢୀ ଉପରେ ଅଙ୍କୁଶ ଲାଗିଲେ ପାରଂପରିକ ବୁଣାକାରମାନେ ଲାଭବାନ ହେବେ ବୋଲି ଆଶା ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପଶ୍ଚିମ ଓଡ଼ିଶାର ବାନ୍ଧକଳା ଶାଢ଼ୀ ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ବେଳେ ଏବେ ବଜାରରେ ରାଜ କରୁଛି ନକଲି ସମ୍ବଲପୁରୀ ଶାଢୀ । ଫଳରେ ବୁଣାକାରଙ୍କ ହାତ ବନ୍ଦ ହୋଇଯାଇଥିବା ଅଭିଯୋଗ ହୋଇଛି । ସାଧାରଣତଃ ଗୋଟିଏ ବାନ୍ଧକଳା ଶାଢ଼ୀକୁ ପ୍ରସ୍ତୁତ କରିବା ପାଇଁ ବୁଣାକାରଙ୍କୁ ୨୦ ରୁ ୨୫ ଦିନ ସମୟ ଲାଗୁଥିବା ବେଳେ ଗୋଟିଏ ଶାଢ଼ୀର ସର୍ବନିମ୍ନ ମୂଲ୍ୟ ୧୬୦୦ ଟଙ୍କାରୁ ଆରମ୍ଭ ହୋଇଥାଏ । କିନ୍ତୁ କିଛି କଳା ବେପାରୀ ବୁଣାକାରମାନଙ୍କ ଶାଢ଼ୀକୁ କିଣିନେଇ ତାର ଫଟୋ କପି ପ୍ରସ୍ତୁତ କରି ନକଲି ଶାଢୀ ବଜାରକୁ ଛାଡୁଛନ୍ତି । ଏହି ଶାଢ଼ୀର ମୂଲ୍ୟ ମାତ୍ର ୩୦୦ ରୁ ୪୦୦ ଟଙ୍କା ହୋଇଥିବା ଯୋଗୁଁ ପ୍ରକୃତ ବାନ୍ଧକଳା ଶାଢ଼ୀ ନିଜର ପରିଚୟ ହରାଇବାକୁ ବସିଛି ।
ନକଲି ବାନ୍ଧକଳା ଶାଢ଼ୀ ରାଜ୍ୟ ବାହାରୁ ବିଶେଷ କରି ସୁରଟ ଓ ଉତରପ୍ରଦେଶ ଅଂଚଳରୁ ଆସୁଥିବା ବେଳେ ଓଡ଼ିଶାର କିଛି ଅସାଧୁ ବେପାରୀଙ୍କ ସହାୟତାରେ ବଜାରକୁ ଆସିଥାଏ । ବିଶେଷକରି ପଶ୍ଚିମ ଓଡ଼ିଶାକୁ ଆସୁଥିବା ପର୍ଯ୍ୟଟକମାନେ ପ୍ରକୃତ ବାନ୍ଧଶାଢୀ ଓ ନକଲି ଜାଣି ନ ପାରି ଏହି ନକଲି ଶାଢ଼ୀକୁ କିଣୁ ଥିବା ଦେଖିବାକୁ ମିଳୁଛି । ଫଳରେ ପ୍ରକୃତ ହାତବୁଣା ଶାଢ଼ୀର ଚାହିଦା କମିବା ସହିତ ବଦନାମ ହେଉଛି ବାନ୍ଧକଳା । ବୁଣାକାରମାନଙ୍କ ସଂଘ ବିଭିନ୍ନ ସଂଗଠନ, ସୋସାଇଟି ବାନ୍ଧକଳା ଉପରେ କାମ କରୁଥିଲେ ମଧ୍ୟ ଆଜି ପର୍ଯ୍ୟନ୍ତ ଏହି ନକଲି କାରବାରକୁ ରୋକି ପାରି ନାହାନ୍ତି । କେନ୍ଦ୍ର ଓ ରାଜ୍ୟ ସରକାର ଦୃଢ଼ ପଦକ୍ଷେପ ନେଲେ ଆଗାମୀ ଦିନରେ ନକଲି ବାନ୍ଧକଳା ଶାଢୀ ଉପରେ କଟକଣା ଲାଗିପାରିବ ବୋଲି ବୁଣାକାର ଆଶା ରଖିଛନ୍ତି ।