ମହାରାଷ୍ଟ୍ର ସଙ୍କଟ : ଆଜି ଆସ୍ଥା ଲୋଡ଼ିବେ ମୁଖ୍ୟମନ୍ତ୍ରୀ ଏକନାଥ ସିନ୍ଦେ
କନକ ବ୍ୟୁରୋ : ଆଜି ସଂଖ୍ୟା ଗରିଷ୍ଠତାର ପ୍ରମାଣ ଦେବେ ଏକନାଥ ସିନ୍ଦେ । ବାଚସ୍ପତି ନିର୍ବାଚନ ପରେ ଫ୍ଲୋର ଟେଷ୍ଟ ଉପରେ ସମସ୍ତଙ୍କ ନଜର । ମୋଟି ୨୮୮ ବିଧାୟକଙ୍କ ମଧ୍ୟରୁ ବିଜେପି ଏବଂ ସିନ୍ଦେଙ୍କ ସପକ୍ଷରେ ପଡିଥିଲା ୧୬୪ ଭୋଟ । ବିଧାୟକ ଦଳ ନେତା ପଦରୁ ଶିବସେନା ବିଧାୟକ ଅଜୟ ଚୌଧାରୀଙ୍କୁ ବାଚସ୍ପତି ବିଦା କରିଛନ୍ତି । ବାଚସ୍ପତିଙ୍କ କାର୍ଯ୍ୟାଳୟ ପକ୍ଷରୁ ଏ ନେଇ ଏକ ଚିଠି ଜାରି କରାଯାଇଛି । ଏଥିସହିତ ସିନ୍ଦେଙ୍କୁ ବିଧାୟକ ଦଳ ନେତାଭାବେ ପୁନଃଅବସ୍ଥାପିତ କରାଯାଇଛି । ସେହିଭଳି ସିନ୍ଦେ ଗୋଷ୍ଠୀ ପକ୍ଷରୁ ଭରତ ଗୋଗୱାଲେଙ୍କୁ ମୁଖ୍ୟ ସଚେତକ ଭାବେ ସ୍ବୀକୃତି ଦିଆଯାଇଛି । ପୂର୍ବରୁ ଏହି ପଦରେ ରହିଥିବା ଉଦ୍ଧବ ଠାକ୍ରେଙ୍କ ଗୋଷ୍ଠୀର ବିଧାୟକ ସୁନୀଲ ପ୍ରଭୁଙ୍କୁ ହଟାଇ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଆଜି ବିଧାନସଭାରେ ଆସ୍ଥା ଭୋଟ ହେବାକୁ ଥିବା ବେଳେ ବିଳମ୍ବିତ ରାତିର ଏହି ଘଟଣା ଶିବସେନା ପାଇଁ ଏକ ବଡ଼ ଝଟ୍କା ହୋଇଛି । ଏହାଫଳରେ ଉଦ୍ଧବଙ୍କ ପଟେ ଥିବା ୧୬ ବିଧାୟକ ସୋମବାର ଆସ୍ଥା ଭୋଟ ପୂର୍ବରୁ ଗୋଗୱାଲେଙ୍କ ପକ୍ଷରୁ ଜାରି ହେବାକୁ ଥିବା ହ୍ବିପ୍ ମାନିବାକୁ ବାଧ୍ୟହେବେ । ଯଦି ଏହି ୧୬ ବିଧାୟକ ହ୍ବିପକୁ ନମାନନ୍ତି ତା’ହେଲେ ସେମାନେ ଅଯୋଗ୍ୟ ହୋଇପାରନ୍ତି । ଆସ୍ଥା ଭୋଟ ପୂର୍ବରୁ ରବିବାର ଦିନ ମୁମ୍ବାଇର ଏକ ହୋଟେଲରେ ନବନିଯୁକ୍ତ ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଓ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନାବିସ ବିଜେପି ଓ ତାଙ୍କ ଗୋଷ୍ଠୀର ବିଧାୟକମାନଙ୍କ ସହିତ ବୈଠକ ବି କରିଥିଲେ ।
ଏହାପୂର୍ବରୁ ମହାରାଷ୍ଟ୍ର ବିଧାନସଭାର ଦୁଇଦିନିଆ ସ୍ବତନ୍ତ୍ର ଅଧିବେଶନ ରବିବାରଠାରୁ ଆରମ୍ଭ ହୋଇଛି । ପ୍ରଥମ ଦିନରେ ବିଜେପିର ରାହୁଲ ନର୍ବେକର ବାଚସ୍ପତି ଭାବେ ନିର୍ବାଚିତ ହୋଇଛନ୍ତି । ଆସନ୍ତାକାଲି ଏକନାଥ ସିନ୍ଦେ ସରକାର ସଂଖ୍ୟାଗରିଷ୍ଠତାର ପ୍ରମାଣ କରିବା ପାଇଁ ସ୍ଥିର ହୋଇଛି । ବିଧାନସଭାରେ ହୋଇଥିବା ସେମିଫାଇନାଲରେ ବିଜେପି ଓ ସିନ୍ଦେ ଗୋଷ୍ଠୀ ବିଜୟୀ ହୋଇଥିବା ବେଳେ ଆସନ୍ତାକାଲି ହେବାକୁ ଥିବା ସଂଖ୍ୟାଗରିଷ୍ଠତା ପ୍ରମାଣକୁ ଫାଇନାଲ ଭାବେ ବିବେଚନା କରାଯାଉଛି। ତେଣୁ ଫ୍ଲୋର ଟେଷ୍ଟ୍ ଉପରେ ସମସ୍ତଙ୍କ ନଜର ରହିଛି । ମହାରାଷ୍ଟ୍ର ବିଧାନସଭାବେ ମୋଟ ବିଧାୟକଙ୍କ ସଂଖ୍ୟା ୨୮୮ । ବାଚସ୍ପତି ନିର୍ବାଚନରେ ବିଜେପି-ସିନ୍ଦେ ଗୋଷ୍ଠୀ ୧୬୪ଟି ଭୋଟ୍ ପାଇଛନ୍ତି ।
ମହାବିକାଶ ଅଘାଡ଼ି ମେଣ୍ଟର ବାଚସ୍ପତି ପ୍ରାର୍ଥୀ ଭାବେ ଶିବସେନାର ରାଜନ ସାଲଭି ଲଢ଼ୁଥିଲେ। ତାଙ୍କୁ ୧୦୭ଟି ଭୋଟ୍ ମିଳିଛି । ଯଦି ଏଭଳି ସ୍ଥିତି କାଲି ମଧ୍ୟ ଜାରି ରହେ ତାହେଲେ ସରକାର ଆସ୍ଥା ଭୋଟରେ ବିଜୟୀ ହେବା ଆଶା ଉଜ୍ଜ୍ବଳ । ତେବେ ମହାରାଷ୍ଟ୍ର ରାଜନୀତି ଆଇନ ଜାଲରେ ବି ଛନ୍ଦି ହୋଇଛି । ମାମଲା ସୁପ୍ରିମ କୋର୍ଟରେ ରହିଛି। ଶିବସେନାର ଏକନାଥ ସିନ୍ଦେଙ୍କ ସମେତ ବିଦ୍ରୋହୀ ଗୋଷ୍ଠୀର ୧୬ ଜଣ ବିଧାୟକଙ୍କୁ ଅଯୋଗ୍ୟ ଘୋଷଣା ପାଇଁ ଉଦ୍ଧବଙ୍କ ଗୋଷ୍ଠୀ ପକ୍ଷରୁ ସୁପ୍ରମ କୋର୍ଟରେ ମାମଲା ହୋଇଛି । ଯଦି ସୁପ୍ରିମ କୋର୍ଟ ଏହି ୧୬ ଜଣଙ୍କୁ ଅଯୋଗ୍ୟ ଘୋଷଣା କରନ୍ତି ତାହେଲେ ବିଧାନସଭାର ମୋଟ ସଭ୍ୟ ସଂଖ୍ୟା ୨୭୨କୁ କମିଯିବ । ଏ କ୍ଷେତ୍ରରେ ଆସ୍ଥା ଭୋଟରେ ଜିତିବା ପାଇଁ ସରକାରଙ୍କୁ ୧୩୭ ଜଣ ବିଧାୟକଙ୍କ ଭୋଟ ଆବଶ୍ୟକ ।