ରାଜ୍ୟ ସରକାରଙ୍କୁ ଝଟକା । ବଳରାମପୁର ଅଚଂଳର ଗଛକଟା ୧୯୮୦ ଜଙ୍ଗଲ ଆଇନ ଉଲଂଘନ ହୋଇଥବା କହିଲେ ଟ୍ରିବ୍ୟୁନାଲ
ଗଛକଟା ଘଟଣାକୁ ନେଇ ଜାତୀୟ ଗ୍ରିନ୍ ଟ୍ରିବ୍ୟୁନାଲ୍ ଶୁଣାଣି
କନକ ବ୍ୟୁରୋ : ଢେଙ୍କାନାଳ ବଳରାମପୁର ଅଞ୍ଚଳରେ ମଦ କାରଖାନା ପ୍ରତିଷ୍ଠା ପାଇଁ ଗଛକଟା ଘଟଣାକୁ ନେଇ ଗତକାଲି ଜାତୀୟ ଗ୍ରିନ୍ ଟ୍ରିବ୍ୟୁନାଲ୍ (ଏନଜିଟି) ଦିଲ୍ଲୀସ୍ଥିତ ପ୍ରମୁଖ ଖଣ୍ଡପୀଠରେ ଶୁଣାଣି ହୋଇଛି। ବିଚାରପତି ଏସ୍ ପି ୱାଗ୍ଡ଼ି, ବିଚାରପତି କେ ରାମକୃଷ୍ଣ ଓ ବୈଷୟିକ ସଦସ୍ୟ ଡକ୍ଟର ନଗିନ ନନ୍ଦ କଲିକତାରେ ବିଚାରଧୀନ ଥିବା ମାମଲାକୁ ଭିଡିଓ କନଫରେନ୍ସିଂ ଜରିଆରେ ଶୁଣାଣି କରିଛନ୍ତି। ଗଛକଟା ମାମଲାରେ ଦୁଇ ପକ୍ଷ ତଥା ଆବେଦନକାରୀ ଓ ରାଜ୍ୟ ସରକାରଙ୍କ ପକ୍ଷରୁ ଯୁକ୍ତି ଶୁଣିବାପରେ ଖଣ୍ଡପୀଠ କହିଥିଲେ ଯେ ପ୍ରାରମ୍ଭିକ ପର୍ଯ୍ୟାୟରୁ ଜଣାପଡ଼ୁଛି ସେଠାରେ ଜଙ୍ଗଲ ଆଇନ ୧୯୮୦ର ଉଲ୍ଲଂଘନ ହୋଇଛି।
Kanak News is now on WhatsApp
Join and get latest news updates delivered to you via WhatsApp
ତେବେ ଖଣ୍ଡପୀଠ ଗତକାଲି ଏହି ଗଛକଟା ପ୍ରସଙ୍ଗରେ ରାଜ୍ୟ ସରକାର ଓ ଇଡକୋକୁ ବିସ୍ତୃତ ରିପୋର୍ଟ ଦାଖଲ ପାଇଁ ନିର୍ଦ୍ଦେଶ ଦେଇଛନ୍ତି। ଜାନୁଆରି ୨୧ରେ ମାମଲାର ପରବର୍ତୀ ଶୁଣାଣି ଥିବାରୁ ଏହା ପୂର୍ବରୁ ସତ୍ୟପାଠ ଦାଖଲ ପାଇଁ ନିର୍ଦ୍ଦେଶ ଦିଆଯାଇଛି। ତେବେ ବଳରାମପୁରରେ ଗଛକଟାକୁ ନେଇ ସାରା ରାଜ୍ୟରେ ଚର୍ଚ୍ଚା ଜୋର ଧରିଥିଲା । ପରିସ୍ଥିତି ଏପରି ହୋଇଥିଲା ଯେ, ସ୍ଥାନୀୟ ଅଚଂଳର ଲୋକମାନଙ୍କ ସହ ପୋଲିସର ଧସ୍ତାଧସ୍ତି ମଧ୍ୟ ହୋଇଥିଲା । ଏହାପରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଗଛକଟା ବନ୍ଦ କରିବା ପାଇଁ ନିର୍ଦ୍ଦେଶ ଦିଆଯାଇଥିଲା । ପରେ ବିଭିନ୍ନ ଦଳର ନେତାଙ୍କ ସହ ବିରୋଧୀ ଦଳ ନେତା ମଧ୍ୟ ଘଟଣାସ୍ଥଳରେ ପହଚିଂ ସ୍ଥାନୀୟ ଡିଏଫଓଙ୍କ ସହ ଆଲୋଚନା କରିଥିଲେ ।