ଚାଷୀଙ୍କୁ ନେଇ ପାଠଶାଳା । ତାଲିମ୍ ସହ ଆୟକୁ ବହୁଗୁଣା କରିବା ଲକ୍ଷ୍ୟରେ ରାଜ୍ୟ ସରକାରଙ୍କ କୃଷି ଓଡିଶା କାର୍ଯ୍ୟକ୍ରମ । ନବୀନ କହିଲେ, ଦେଶକୁ ଦିଶା ଦେଖାଇବ ‘କାଳିଆ’ ଯୋଜନା
ଯୋଜନାକୁ କୃଷି ବିଜ୍ଞାନୀ ଓ ସିଏସିପି ଅଧ୍ୟକ୍ଷଙ୍କ ପ୍ରଶଂସା
କନକ ବ୍ୟୁରୋ: ଚାଷୀଙ୍କୁ ନେଇ ପାଠଶାଳା । ଚାଷୀଙ୍କୁ ତାଲିମ୍ ଏବଂ ଚାଷୀଙ୍କ ଆୟକୁ ବହୁଗୁଣା କରିବା ଲକ୍ଷ୍ୟରେ ଆଜି ଭୁବନେଶ୍ୱର ବରମୁଣ୍ଡା ପଡ଼ିଆରେ ଉଦ୍ଘାଟିତ ହୋଇଛି ରାଜ୍ୟ ସରକାରଙ୍କ କାର୍ଯ୍ୟକ୍ରମ- କୃଷି ଓଡ଼ିଶା । ଯେଉଁଥିରେ ଉନ୍ନତ ପ୍ରଣାଳୀରେ କୃଷକ କେମିତି, ଚାଷ କରିପାରିବେ, କେମିତି ଉତ୍ପାଦନ ବଢ଼ିବ ତା ଉପରେ ମନ୍ଥନ ଚାଲିଛି । ଏହି କାର୍ଯ୍ୟକ୍ରମକୁ ମୁଖ୍ୟମନ୍ତ୍ରୀ ନବୀନ ପଟନାୟକ ଉଦ୍ଘାଟନ କରି, କୃଷି କ୍ଷେତ୍ରରେ ରାଜ୍ୟକୁ ଆହୁରି ଆଗକୁ ନେବା ପାଇଁ ଚାଷୀଙ୍କୁ ଆହ୍ୱାନ ଦେଇଛନ୍ତି । ଏହି ଅବସରରେ କାଳିଆ ଯୋଜନାର ପ୍ରଶଂସା କରିଛନ୍ତି ମୁଖ୍ୟମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ଚାଷୀଙ୍କ ଆୟକୁ ବହୁଗୁଣିତ କରିବାର ଆହ୍ୱାନ ଦେଇ ରାଜ୍ୟ ସରକାର ପକ୍ଷରୁ ଆୟୋଜିତ କୃଷି ଓଡ଼ିଶା କାର୍ଯ୍ୟକ୍ରମର କେନ୍ଦ୍ର ବିନ୍ଦୁରେ ରହିଛି, ନିକଟରେ ଘୋଷଣା ହୋଇଥିବା କାଳିଆ ଯୋଜନା । କାଳିଆ ଯୋଜନାକୁ ରାଜ୍ୟ ସରକାରଙ୍କ ସବୁଠୁ ଭଲ ଯୋଜନା କହିବା ସହ ଚାଷୀଙ୍କ ସର୍ବାଙ୍ଗୀନ ଉନ୍ନତି ଉପରେ ଗୁରୁତ୍ୱ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଯଦି କାଳିଆ ଯୋଜନାରେ ଦିଆଯାଉଥିବା ଆର୍ଥିକ ସହାୟତାକୁ ବାସ୍ତବରେ ଚାଷ କାର୍ଯ୍ୟରେ ବିନିଯୋଗ କରାଯିବ, ତେବେ ଚାଷୀଙ୍କ ରୋଜଗାର ପାଇଁ ବାଟ ଫିଟିଯିବ ବୋଲି ଆଶା ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ।
କାଳିଆ ଯୋଜନାର ପ୍ରଥମ ପର୍ଯ୍ୟାୟ ପଞ୍ଜୀକରଣ ଆଜି ଶେଷ ହୋଇଥିବାବେଳେ ପୁଣି ଦ୍ୱିତୀୟ ପର୍ଯ୍ୟାୟ ପଞ୍ଜୀକରଣ ଆଗାମୀ ୨୫ ତାରିଖରୁ ଫେବ୍ରୁଆରୀ ୫ ତାରିଖ ପର୍ଯ୍ୟନ୍ତ ରଖାଯାଇଛି । ଆଉ ଏହାରି ଭିତରେ କୃଷି ଓଡିଶା କର୍ମଶାଳାକୁ ଉଦଘାଟନ କରି ରାଜ୍ୟର କୃଷକମାନଙ୍କୁ ଧନ୍ୟବାଦ ଦେବା ସହ ରାଜ୍ୟକୁ କୃଷି କ୍ଷେତ୍ରରେ ଆହୁରି ଆଗକୁ ନେବା ପାଇଁ ଆହ୍ୱାନ ଦେଇଛନ୍ତି ମୁଖ୍ୟମନ୍ତ୍ରୀ । କାଳିଆ ଯୋଜନାର ସକାରତ୍ମକ ଦିଗକୁ ଭିନ୍ନ ଦୃଷ୍ଟିରେ ଦେଖିଛନ୍ତି ଚାଷ ଓ ଚାଷୀଙ୍କ ଉପରେ ଗବେଷଣା କରୁଥିବା କୃଷି ବିଜ୍ଞାନୀ । କହିଛନ୍ତି-ଏହି ଯୋଜନା ରାଜ୍ୟ ସରକାରଙ୍କ ଏକ ବଡ ଉବଲବ୍ଧୀ ହେବାକୁ ଯାଉଛି ।
ଏପଟେ ସିଏସିପିର ଅଧ୍ୟକ୍ଷ ମଧ୍ୟ ସରକାରଙ୍କ କୃଷି ନୀତିକୁ ପ୍ରଶଂସା କରିଛନ୍ତି । ଏପଟେ ରାଜ୍ୟ ସରକାରଙ୍କ ଏହି କାର୍ଯ୍ୟକ୍ରମକୁ ନିଜସ୍ୱ ଢ଼ଙ୍ଗରେ ସମାଲୋଚନା କରିଛନ୍ତି ବିରୋଧୀ । ତେବେ ଆସନ୍ତା ୧୯ ତାରିଖ ଯାଏଁ ଚାଲିବ ଚାଷୀକୁ ନେଇ ଚାଷ ପାଠଶାଳା । ଯେଉଁଥିରେ ଚାଷୀଙ୍କୁ ଉନ୍ନତ ପ୍ରଣାଳୀରେ ଚାଷ କରି କିଭଳି ଅଧିକ ଉତ୍ପାଦନ କରିବେ ତାଉପରେ ଚାଷୀଙ୍କୁ ବାଟ ଦେଖାଇବେ ରାଜ୍ୟ ସରକାର ।