ଦ୍ୱିତୀୟ ପର୍ଯ୍ୟାୟ ଲକଡାଉନ ଘୋଷଣା ପୂର୍ବରୁ କାର୍ଯ୍ୟାଳୟକୁ ଫେରିଲେ ମନ୍ତ୍ରୀ, ଅଫିସର । କମ କର୍ମଚାରୀରେ ଚାଲିଲା କାମ, ସାମାଜିକ ଦୂରତା ଉପରେ ଗୁରୁତ୍ୱ ।
କନକ ବ୍ୟୁରୋ : ଦେଶରେ ଦ୍ୱିତୀୟ ପର୍ଯ୍ୟାୟ ଲକଡାଉନ୍ ଘୋଷଣା ହେବା ନେଇ ଚର୍ଚ୍ଚା ଭିତରେ କାର୍ଯ୍ୟାଳୟକୁ ଫେରିଛନ୍ତି ମନ୍ତ୍ରୀ, ଅଫିସର । ପ୍ରଥମ ପର୍ଯ୍ୟାୟ ଲକଡାଉନ ଅବଧି ମଙ୍ଗଳବାର ମଧ୍ୟରାତ୍ରରେ ଶେଷ ହେଉଛି । ଏହାର ଦିନକ ଆଗରୁ ଅଫିସରେ ପହଁଚି ଅଧିକାରୀଙ୍କ ସହ ଆଲୋଚନା କରିଛନ୍ତି କେନ୍ଦ୍ରମନ୍ତ୍ରୀ । ତେବେ ଅଳ୍ପ କର୍ମଚାରୀରେ ଓ ସାମାଜିକ ଦୂରତା ରଖି କାମ କରିବାକୁ ସରକାରଙ୍କ ନିର୍ଦ୍ଦେଶ ବି ରହିଛି ।
Kanak News is now on WhatsApp
Join and get latest news updates delivered to you via WhatsApp
ଦେଶବ୍ୟାପୀ ୨୧ ଦିନିଆ ତାଲାବନ୍ଦ ଶେଷ ହେବାର ଦିନକ ପୂର୍ବରୁ ନିଜ ନିଜ କାର୍ଯ୍ୟାଳୟକୁ ଫେରିଛନ୍ତି କେନ୍ଦ୍ର ମନ୍ତ୍ରୀ ଓ ପ୍ରଶାସନିକ ଅଧିକାରୀ । କେନ୍ଦ୍ର ସରକାରଙ୍କ ନିର୍ଦ୍ଦେଶ ଅନୁସାରେ ସୋମବାର କାର୍ଯ୍ୟାଳୟରେ ପହଂଚିଛନ୍ତି । ଏହି ଅବସରରେ କେନ୍ଦ୍ର କ୍ରୀଡା ଓ ଯୁବ ବ୍ୟାପାର ରାଷ୍ଟ୍ରମନ୍ତ୍ରୀ କିରନ ରିଜିଜୁ ସ୍ପୋର୍ଟ୍ସ ଅଥରିଟି ଅଫ୍ ଇଣ୍ଡିଆ କାର୍ଯ୍ୟାଳୟରେ ପହଂଚି ଅଧିକାରୀମାନଙ୍କୁ ଭେଟିଛନ୍ତି । ରିଜିଜୁ ମାସ୍କ ପିନ୍ଧି ପହଂଚିବା ପରେ ସାନିଟାଇଜରରେ ହାତ ସଫା କରି କାର୍ଯ୍ୟାଳୟକୁ ପ୍ରବେଶ କରିଥିଲେ । ତେବେ ସତର୍କତା ଅବଲମ୍ବନ କରି ଖୁବ୍ କମ ଅଧିକାରୀ ଓ କର୍ମଚାରୀଙ୍କ ଉପସ୍ଥିତିରେ କାମ ଜାରି ରହିବ ବୋଲି କିରନ ରିଜିଜୁ କହିଛନ୍ତି ।
କିରନ ରିଜିଜୁଙ୍କ ପରି କେନ୍ଦ୍ର ମନ୍ତ୍ରୀ ମୁଖତାର ଅବାସ ନକଭି, ଜିତେନ୍ଦ୍ର ସିଂ ଓ ପ୍ରକାଶ ଜାଭଡେକର ମଧ୍ୟ ନିଜ ନିଜ କାର୍ଯ୍ୟାଳୟରେ ପହଂଚି ଅଧିକାରୀଙ୍କ ସହ ଆଲୋଚନା କରିଛନ୍ତି । ସେହିପରି କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂ ଶେଖାୱତ, ଅର୍ଜୁନ ମୁଣ୍ଡା ମଧ୍ୟ ନିଜ କାର୍ଯ୍ୟାଳୟକୁ ଯାଇଛନ୍ତି । କେନ୍ଦ୍ରମନ୍ତ୍ରୀଙ୍କ ବୈଠକରେ ସାମାଜିକ ଦୂରତାକୁ ଗୁରୁତ୍ୱ ଦିଆଯିବା ସହ ମନ୍ତ୍ରୀମାନେ ମାସ୍କ ପିନ୍ଧିଥିବା ଦେଖିବାକୁ ମିଳିଥିଲା ।
ଶନିବାର ଏନେଇ କେନ୍ଦ୍ର ସରକାରଙ୍କ ପକ୍ଷରୁ ନିର୍ଦ୍ଦେଶ ଜାରି କରାଯାଇଥିଲା । କେନ୍ଦ୍ରମନ୍ତ୍ରୀ ମାନେ ନିଜ ନିଜ ବିଭାଗର ସଚିବ ଓ ସର୍ବନିମ୍ନ କର୍ମଚାରୀରେ କାମ କରିବାକୁ କୁହାଯାଇଥିଲା ଏପରିକି ଏକ ତୃତୀୟାଂଶ କର୍ମଚାରୀରେ କାମ ତୁଲାଇବାକୁ କହିଥିଲେ କେନ୍ଦ୍ର ସରକାର ।