ପାଣି ଆସୁ ଆସୁ ଭୁଷୁଡ଼ିଗଲା ନୂଆ କେନାଲ, ଉଜୁଡ଼ିଗଲା ଶହ ଶହ ଏକର ଫସଲ । କୋନାଲ ନିର୍ମାଣ ନେଇ ଆସିଲା ସାଂଘାତିକ ଅଭିଯୋଗ, ଲୋକ କହିଲେ, ଦୁର୍ବଳ କାମ ଯୋଗୁଁ ଧୋଇଗଲା ସୁନାର ଫସଲ ।
କନକ ବ୍ୟୁରୋ : ପାଣି ଆସୁ ଆସୁ କେନାଲ ବନ୍ଧ ଭୁଷୁଡି ପଡିବା ଫଳରେ ଏବେ ଜମିକୁ ଆସୁନି ପାଣି । ଗୋଟିଏ ପଟେ କମ୍ ବର୍ଷା ଅନ୍ୟପଟେ ରାଜ୍ୟର ବିଭିନ୍ନ ସ୍ଥାନରେ କେନାଲରେ ପାଣି ନଆସିବା ଚାଷୀଙ୍କୁ ଚିନ୍ତାରେ ପକାଇଛି । ପାଣି ନଆସିଲେ ମରୁଡି ହେବ ବୋଲି ଆଶଙ୍କା କରିଛନ୍ତି ଚାଷୀ ।
Kanak News is now on WhatsApp
Join and get latest news updates delivered to you via WhatsApp
କୋଟି କୋଟି ଟଙ୍କା ବ୍ୟୟରେ ନିର୍ମିତ କୋକସରା ବେହେରା ମଝି କେନାଲର ବନ୍ଧ ଭାଙ୍ଗିଯିବା ପରେ ଏବେ ଏମିତି ଶୁଖିଲା ପଡିଛି କେନାଲ । ବାଲିବସ୍ତା ଦେଇ ଭଙ୍ଗାବନ୍ଧର ମରାମତି ହୋଇଥିଲେ ବି କେନାଲରେ ପାଣି ଛାଡିବାକୁ ସାହାସ ଜୁଟାଇ ପାରୁନାହାନ୍ତି ବିଭାଗୀୟ କର୍ମଚାରୀ । କେନାଲରେ ପାଣି ନଆସିବାରୁ ଏବେ ଚାଷୀଙ୍କ ସ୍ୱପ୍ନ ବି ଭାଙ୍ଗିଯିବାକୁ ବସିଛି । ବର୍ଷା ଅଭାବ ସାଙ୍ଗକୁ ପାଣି ନଆସିଲେ କେମିତି ଚାଷ କରିବେ ତାକୁ ନେଇ ଚିନ୍ତାରେ ପଡିଛନ୍ତି ଚାଷୀ ।
ଏ ହେଉଛି ଗଞ୍ଜାମ ଜିଲ୍ଲା ହିଞ୍ଜିଳି ବ୍ଲକ ମକରଝୋଳ ପଂଚାୟତ ପଦ୍ମନାଭପୁର ଓ ବଳରାମପୁର ଦେଇ ଯାଇଥିବା କେନାଲର ଦୃଶ୍ୟ । ଗୋଟିଏ ପଟେ କେନାଲରେ ପାଣି ଭରି ରହିଛି, ଆଉ ଅନ୍ୟପଟେ ଶୁଖିଲା ପଡିଛି । ଅର୍ଥାତ ପାଣି ଆସୁଥିଲେ ବି ଆଗକୁ ଛଡାଯାଉନାହିଁ । ମାତ୍ର ଦୁଇ ମାସ ତଳେ କୋଟିଏରୁ ଅଧିକ ଟଙ୍କାରେ ନିର୍ମିତ ହୋଇଥିବା ଏହି କେନାଲ ବନ୍ଧ ଭାଙ୍ଗିଯିବାରୁ ପାଣି ଛଡାଯାଉନଥିବା ଅଭିଯୋଗ କରିଛନ୍ତି ଚାଷୀ । ରାତାରାତି ବନ୍ଧର ମରାମତି କରାଯାଇଥିଲେ ବି ମାଟି ଜମି ରହିଥିବାରୁ ପାଣି ଛଡାଯାଉନଥିବାରୁ ଅସନ୍ତୋଷ ପ୍ରକାଶ କରିଛନ୍ତି ଚାଷୀ ।
ମାଲକାନଗିରି ଜିଲ୍ଲାରୁ ଆସିଛି ସତିଗୁଡା କେନାଲ ବନ୍ଧ ଭାଙ୍ଗିଯାଇଥିବାର ଦୃଶ୍ୟ । କୋରୁକୋଣ୍ଡା ବ୍ଲକ ସ୍ଥିତ ହାଇସ୍କୁଲଗୁଡା ଗାଁ ନିକଟରେ ସତିଗୁଡା କେନାଲ ହୁଡା ଭୁଷୁଡି ପଡିବାରୁ ଶହ ଶହ ଏକର ଚାଷ ଜମି ଜଳମଗ୍ନ ହେବା ସହ ଜମି ଏବେ ବାଲିଚର ପାଲଟିଛି ।
ତେବେ ପ୍ରଶ୍ନ ଉଠୁଛି କେନାଲ ମରାମତି ପାଇଁ ପ୍ରତିବର୍ଷ ସରକାର ହଜାର ହଜାର କୋଟି ଟଙ୍କା ଖର୍ଚ୍ଚ କରୁଥିବା ବେଳେ କାହିଁକି ଭାଙ୍ଗୁଛି ବନ୍ଧ ? ଜଳସେଚନ ଅଭାବରୁ ଚାଷୀ ଯେଉଁ କ୍ଷତି ସହୁଛନ୍ତି ତାହା ପୂରଣ ହେବ କେମିତି ?