ଚିନ୍ତାରେ ବରଗଡ ଚାଷୀ । ବିଷ ପିଇ ଆତ୍ମହତ୍ୟା । କାଲି ଜମିରେ ଲଗାଇଥିଲେ ନିଆଁ
କନକ ବ୍ୟୁରୋ : ବରଗଡ଼ରେ ଚକଡ଼ା ପୋକ ଆକ୍ରମଣରେ ଫସଲହାନି ଘଟିବାରୁ ଧାନ ଫସଲରେ ନିଆଁ ଲଗାଇ ଦେଇଥିବା ଚାଷୀ ଆତ୍ମହତ୍ୟା କରିଛନ୍ତି । ଫସଲରେ ନିଆଁ ଲଗାଇ ଦେଇଥିବା ଚାଷୀ ନିଜ ଜମିରେ ବିଷ ପିଇ ଆତ୍ମହତ୍ୟା କରିଛନ୍ତି । ବିଷ ପିଇ ଦେଇଥିବା ଚାଷୀଙ୍କୁ ଗୁରୁତର ଅବସ୍ଥାରେ ବରଗଡ ଡାକ୍ତରଖାନାରେ ଭର୍ତି କରାଯାଇଥିବା ବେଳେ ତାଙ୍କର ମୃତ୍ୟୁ ହୋଇଛି । ବରଗଡ଼ ନିକଟସ୍ଥ କଳାପାଣି ପଂଚାୟତରେ ଚକଡ଼ା ପୋକ ପୁରା ଫସଲକୁ ଖାଇଯିବା ପରେ ଏଥିରେ ନିଆଁ ଲଗାଇ ଦେଇଥିଲେ ଚାଷୀ । ଆଉ ମାତ୍ର ୧୫ରୁ ୨୦ ଦିନ ଭିତରେ ଧାନ ଫସଲ ଅମଳ ହେବାକୁ ଥିବା ବେଳେ ଧାନ ଭିତରୁ ଚାଉଳ ଖାଇଯାଇଛନ୍ତି ଏହି ମାରାତ୍ମକ ପୋକ । ଚାଷୀଙ୍କ ପାଇଁ ସବୁଠାରୁ ମୁଣ୍ଡବ୍ୟଥାର କଥା ହେଉଛି, ଏହି ପୋକ ଉପରେ ସରକାର ଯୋଗାଉଥିବା ନିମ୍ନମାନର କୀଟନାଶକ କାମ କରୁନାହିଁ । ଫଳରେ ବରଗଡ଼ରେ ସଙ୍କଟ ଭିତରକୁ ଠେଲି ହୋଇଯାଇଛି ଚାଷୀର ଭାଗ୍ୟ ।
Kanak News is now on WhatsApp
Join and get latest news updates delivered to you via WhatsApp
ଅମଳ କରିବା ପୂର୍ବରୁ ଏହି ଚାଷୀମାନେ ଯେଉଁ ହାତରେ ମାସ ମାସ ଧରି ପରିଶ୍ରମ କରିଥିଲେ, ଗତକାଲି ସେହି ହାତରେ ନିଜ ଫସଲରେ ନିଆଁ ଲଗାଇ ଦେଇଛନ୍ତି । ପରିଶ୍ରମ ସାଙ୍ଗକୁ ଖର୍ଚ୍ଚ ସବୁଥିରେ ଲାଗିଛି ନିଆଁ । ସବୁଠାରୁ ଆଶ୍ଟର୍ୟ୍ୟର କଥା ହେଉଛି, ନିଜେ ଚାଷୀ ନିଜ ଫସଲରେ ନିଆଁ ଲଗାଇ ଦେଇଥିଲା । ଚାଷୀଙ୍କ କଥା ବୟାନ କରୁଛି ସେମାନଙ୍କର କଷ୍ଟ କାହାଣୀ । ଚାରିଆଡେ ମାଡ଼ିଯାଇଛି ଚକଡ଼ା ପୋକ । ଏବଂ ଏହି ପୋକ ଏମିତି ଭାବେ ମାଡ଼ିଛି ଯେ କୌଣସି ଗୋଟିଏ ଧାନ ଗଛ ବି ତା’ କବଳରୁ ବର୍ତ୍ତିପାରିନାହିଁ । ଏହି ପୋକ ସିଧା ଚାଉଳକୁ ଆକ୍ରମଣ କରେ । ଧାନ ଭିତରୁ ଚାଉଳକୁ ପୂରା ଖାଇଯାଏ । ଉପକୂଳରେ ଏହାକୁ ଲେଡ଼ା ପୋକ ବୋଲି କୁହାଯାଉଥିବା ବେଳେ ବରଗଡ଼ ଅଂଚଳରେ ଏହାକୁ “ଚକଡ଼ା’’ କହନ୍ତି ଚାଷୀ ।
ସବୁଠାରୁ ଦୁଃଖଦାୟକ କଥା ହେଉଛି ଚକଡ଼ା ପୋକକୁ ମାରିବା ପାଇଁ ଏହି ଚାଷୀମାନେ ସରକାରୀ କୀଟନାଶକ ବାରମ୍ବାର ପ୍ରୟୋଗ କରିଛନ୍ତି । କିନ୍ତୁ କିଛି ବି ଫଳ ମିଳନାହିଁ । ଚକଡ଼ା ପୋକ ଯେମିତି ମାଡି ଚାଲିଥିଲା, ସେମିତି ମାଡ଼ି ଚାଲିଲା । ଚାଷୀଙ୍କ ଅଭିଯୋଗ ହେଉଛି, କୀଟନାଶକ ନିମ୍ନ ମାନର ହୋଇଥିବାରୁ କାମ କରୁନାହିଁ ।ବରଗଡ଼କୁ ଓଡ଼ିଶାର ଭାତହାଣ୍ଡି ବୋଲି କୁହାଯାଏ । ଏବଂ ଏହି ଅଂଚଳରେ ଚାଷ ହିଁ ସବୁଠାରୁ ବଡ଼ ଜୀବିକା । ଆଉ ଯଦି ଏହି ଅଂଚଳରେ ଚାଷୀକୁ ନିମ୍ନ ମାନର କୀଟନାଶକ ଦିଆଯାଏ ଏବଂ ଚାଷୀ ସବୁକିଛି ହରାଇ ବସେ, ତେବେ ତାର ପରିଣାମ ନିଆଁ ଲଗାଇବାଠାରୁ ଆରଂଭ କରି ଆହୁରି ଭୟଙ୍କର ହେବାର ମଧ୍ୟ ଆଶଙ୍କା ରହିଛି । ଏହା ସରକାର ବୁଝିବା ଦରକାର ।