କନକ ବ୍ୟୁରୋ: ଶ୍ରୀମନ୍ଦିର ନାଟମଣ୍ଡପ ଓ ଜଗମୋହନକୁ ନେଇ ହାଇକୋର୍ଟରେ ଆମିକସକ୍ୟୁରି ରିପୋର୍ଟ ଦାଖଲ କରିଛନ୍ତି । ଯେଉଁଥିରେ ନାଟମଣ୍ଡପ ଓ ଜଗମୋହନର ମରାମତି ଜରୁରୀ ବୋଲି ଆମିକସକ୍ୟୁରି ଏନ.କେ ମହାନ୍ତି ଉଲ୍ଲେଖ କରିଛନ୍ତି । ଗତ ସେପ୍ଟେମ୍ବର ୨୦୧୭ରେ ଆମିକସକ୍ୟୁରି ଶ୍ରୀମନ୍ଦିରର ବିଭିନ୍ନ ମରାମତି କାମର ଅନୁଧ୍ୟାନ କରିଥିଲେ । ଏଏସଆଇ ଓ ଶ୍ରୀମନ୍ଦିର ପ୍ରଶାସନ ସହିତ ଆଲୋଚନା କରିଥିଲେ । ଆଲୋଚନା ବେଳେ ନାଟମଣ୍ଡପର ଦୁର୍ବଳ ତଥା ଫଟା ବିମ ପ୍ରସଙ୍ଗରେ ମାଡ୍ରାସ ଆଇଆଇଟି ରିପୋର୍ଟକୁ ଉପସ୍ଥାପନ କରିଥିଲେ ଏଏସଆଇ ଭୁବନେଶ୍ୱର ସର୍କଲର ମୁଖ୍ୟ ଅରୁଣ ମଲ୍ଲିକ । ଫଟା ବିମର ଜରୁରୀ ସଂରକ୍ଷଣ ଓ ମରାମତି ଆବଶ୍ୟକ ବୋଲି ଉଲ୍ଲେଖ କରାଯାଇଥିଲେ ମଧ୍ୟ ଅଗଷ୍ଟ ୨୦୧୮ରୁ ଏହି କାମ ବାକି ରହିଥିବା କୋର୍ଟଙ୍କୁ ଜଣାଇଛନ୍ତି ଆମିକସକ୍ୟୁରି ।
Kanak News is now on WhatsApp
Join and get latest news updates delivered to you via WhatsApp
ଜଗମୋହନ ଭିତର ଅଂଶ ମରାମତି ପରେ ବାହାର ଛାତ ଗଡାଣିର ସଂରକ୍ଷଣ କରିବା ପାଇଁ ଏଏସଆଇ ଦ୍ୱାରା ଗଠିତ କୋର କମିଟି ପୂୂର୍ବରୁ ପରାମର୍ଶ ଦେଇଥିଲା । ଜଗମୋହନ ପିଢର ପ୍ରଥମ ଏବଂ ଦ୍ୱିତୀୟ ସ୍ତରରେ ଫାଟ ସୃଷ୍ଟି ହେବା ସହ ପଥର ଛାଡିଯାଇଛି । ଏହିସବୁ ଦୁର୍ବଳ ସ୍ଥାନ ଜଗମୋହନର ପୂର୍ବ ଓ ଦକ୍ଷିଣ କୋଣରେ ରହିଥିବା ବେଳେ ନାଟମଣ୍ଡପର ଛାତ ଉପରୁ ଦେଖାଯାଉଛି । ଏହି ପ୍ରସଙ୍ଗକୁ ନେଇ ପୂର୍ବରୁ ଅନେକ ଥର ଆଲୋଚନା କରାଯାଇଛିା ଆଉ ଏବେ ଏହାର ମରାମତି କାମ ଆରମ୍ଭ କରିଛି ଏଏସଆଇ ।
୨୦୧୯, ଡିସେମ୍ବର ୨୩ରେ ଏଏସଆଇ ହାଇକୋର୍ଟରେ ଦର୍ଶାଇଥିଲା ଯେ ନାଟମଣ୍ଡପ ଓ ଅନ୍ୟାନ୍ୟ ମରାମତି ଓ ସଂରକ୍ଷଣ କାର୍ଯ୍ୟ ଚାରି ମାସ ଭିତରେ ଶେଷ ହେବ । ଏବେ ତିନି ବର୍ଷ ବିତିଛି । କିନ୍ତୁ ଏବେ ବି ପୂର୍ବ ସ୍ଥିତି ରହିଛି । ଅର୍ଥାତ୍ ହାଇକୋର୍ଟରେ ଏଏସ୍ଆଇ ଯେଉଁ ପ୍ରତିଶ୍ରୁତି ରଖିଥିଲା, ତାହା ପାଳନ କରି ନଥିବା ଆମିକସକ୍ୟୁରି କହିଛନ୍ତି । ଶ୍ରୀମନ୍ଦିରର ସୁରକ୍ଷା ଗୁରୁତ୍ୱପୂର୍ଣ୍ଣ ହୋଇଥିବାରୁ ଏହାର ତଦାରଖ କରିବା ଆବଶ୍ୟକ । ତେଣୁ ନିୟମିତ ବ୍ୟବଧାନରେ ହାଇକୋର୍ଟ ମରାମତି ଓ ସଂରକ୍ଷଣ କାର୍ଯ୍ୟର ତଦାରଖ କରିବା ଦରକାର ବୋଲି ଆମିକସକ୍ୟୁରି କହିଛନ୍ତି । ଏହାରି ଭିତରେ ଜଗମୋହନ ଓ ନାଟମଣ୍ଡପର ମରାମତି ଓ ସଂରକ୍ଷଣ କାର୍ଯ୍ୟ ୨୦୨୩, ମାର୍ଚ୍ଚ ସୁଦ୍ଧା ସଂପୂର୍ଣ୍ଣ ହେବ ବୋଲି ଏଏସଆଇ କୋର୍ଟଙ୍କୁ ପ୍ରତିଶ୍ରୁତି ଦେଇଛି ।