ଭଲପାଇବା… ବେଲଜିୟମରୁ ବାଙ୍ଗାଲୋର: ଭାରତକୁ ଆସି ଅଟୋ ଡ୍ରାଇଭରଙ୍କ ହାତ ଧରିଲେ ବିଦେଶୀନି
କନକ ବ୍ୟୁରୋ: ପ୍ରେମ ହେଲେ ଦୂରତା ଜଣା ପଡେନି, ପ୍ରେମ ହେଲେ ସମୟ ଜଣାପଡେନି । ଏ ପ୍ରେମ କାହାଣୀ- ଦରିଆ ସେପାରିର, ଏ ପ୍ରେମ କାହାଣୀ ଦୁଇ ଦେଶର, ଏ ପ୍ରେମ କାହାଣୀ ୮ ହଜାର କିଲୋମିଟର ଦୂରର । ଯେଉଁଠି ପ୍ରେମିକାଟିଏ ଆଖିରେ ଇସାରା ଦେଲେ ଏଠି ପ୍ରେମିକ ଆଖିବୁଜି ବୁଝିପାରେ । ପ୍ରେମିକାର ଦିଲର ଧକଧକ ହେଲେ ପ୍ରେମିକ ଦୂରରେ ଥାଇ ଶୁଣିପାରେ । ହଁ ! ଏ ପ୍ରେମ ବିଦେଶୀ ପ୍ରେମିକାର, ଏ ଭଲପାଇବା ବେଲଜିୟମରୁ ଆସି ଭାରତୀୟ ପୁରୁଷର ପ୍ରେମରେ ପଡିଥିବା ଜଣେ କୁଆଁରୀର…
Kanak News is now on WhatsApp
Join and get latest news updates delivered to you via WhatsApp
ଆଖି ମିଶିଲା ଅଟୋରେ ଅଟୋରେ, ପ୍ରେମ ହେଇଗଲା ଛାତିରେ ଛାତିରେ । ଚାରିଆଖି ମିଶିଲା ପରେ ଆପେଆପେ ଷ୍ଟାର୍ଟ ହେଲା ପ୍ରେମର ଗାଡି । ଆଉ ତାପରେ କର୍ଣ୍ଣାଟକର ରାସ୍ତାରେ ଲେଖା ହେଲା ଲଙ୍ଗ ଡିଷ୍ଟାନ୍ସ ଲଭଷ୍ଟୋରୀ…
କର୍ଣ୍ଣାଟକର ଅନନ୍ତରାଜୁ ଆଉ ବେଲଜିୟମର କେମିଲିଙ୍କ ପ୍ରେମ କାହାଣୀକୁ ନେଇ ଭାରି ଚର୍ଚ୍ଚା । ସାତ ଦରିଆ ପାରି ହୋଇ ନିଜ ପ୍ରେମକୁ ସାକାର କରିଛନ୍ତି ଏହି ଯୋଡି । ସୁଦୂର ବେଲଜିୟମରୁ ଆସି ହିନ୍ଦୁ ରିତିନୀତିରେ ଅନନ୍ତରାଜୁଙ୍କ ହାତ ଧରିଛନ୍ତି କେମିଲି । ଅଟୋରେ ଆଖି ମିଶିଲା ଆଉ ତାପରେ ବେଲଜିୟମରେ ଯାଇ ଲାଗିଲା ପ୍ରେମର ନେଟୱର୍କ । ଜଣେ ଅଟୋ ଡ୍ରାଇଭରଙ୍କ ପ୍ରେମରେ ପଡି ତାଙ୍କ ହାତ ଧରିଛନ୍ତି ବିଦେଶିନୀ ।
ଅନନ୍ତରାଜୁ ଆଉ କେମିଲିଙ୍କ ପ୍ରଥମ ଦେଖା ୨୦୧୯ ମସିହାରେ ହୋଇଥିଲା । ସେତେବେଳେ କେମିଲି ନିଜ ପରିବାର ସହ ହମ୍ପି ବୁଲିବାକୁ ଆସିଥିଲେ । ଅନନ୍ତରାଜୁ କର୍ଣ୍ଣାଟକର ହମ୍ପିରେ ଅଟୋ ଚଲାଇବା ସହ ଟୁରିଷ୍ଟ ଗାଇଡ ଭାବେ କାମ କରନ୍ତି । ଆଉ ସେହି ସମୟରେ ଅନନ୍ତରାଜୁ ତାଙ୍କୁ ଗାଇଡ କରିଥିଲେ । ତା ସହ ତାଙ୍କ ରହିବା ଖାଇବାର ବନ୍ଦୋବସ୍ତ ମଧ୍ୟ କରିଥିଲେ । ଇଣ୍ଡିଆ ଟ୍ରିପ ସମୟରେ ଅନନ୍ତରାଜୁଙ୍କ ଅତିଥି ଚର୍ଚ୍ଚାରେ ଏହି ବିଦେଶୀ ପରିବାର ଖୁବ ଆକର୍ଷିତ ହୋଇଥିଲେ । ଏହାପରେ ନିଜ ଦେଶ ଫେରିଯିବା ପରେ ବି କେମିଲି ସୋସିଆଲମିଡିଆରେ ଅନନ୍ତରାଜୁଙ୍କ ସହ ସମ୍ପର୍କରେ ରହିଥିଲେ । ଆଉ ଧିରେ ଧିରେ ସେମାନେ କଥାବାର୍ତ୍ତା ହେବା ଆରମ୍ଭ କରିଥିଲେ । ଆଉ ଏହାପରେ ପରସ୍ପରକୁ ପସନ୍ଦ କରିବାକୁ ଲାଗିଥିଲେ ।
ହେଲେ ଦୁହିଁଙ୍କ ସମ୍ପର୍କରେ ବାଧା ସାଜିଥିଲା କରୋନା । ଦୀର୍ଘ ବର୍ଷ ଧରି ପରସ୍ପରକୁ ଭେଟି ପାରିନଥିଲେ ଉଭୟେ । ହେଲେ ଏହି ଦୂରତା ସେମାନଙ୍କୁ ବେଶୀ ଦିନ ଅଟକାଇ ପାରିନଥିଲା । ସେମାନେ ନିଜ ନିଜ ପରିବାରକୁ ନିଜ ଲଙ୍ଗ ଡିଷ୍ଟାନ୍ସ ଲଭ ବିଷୟରେ କହିଥିଲେ । ଏହା ଶୁଣି ଉଭୟ ପରିବାର ମଧ୍ୟ ରାଜି ହୋଇଯାଇଥିଲେ । ଆଉ ବିବାହ ପାଇଁ ସେମାନଙ୍କୁ ଅନୁମତି ଦେଇଥିଲେ । ତେଣୁ ଉଭୟ ନଭେମ୍ବର ୨୫ ତାରିଖରେ ୮ ହଜାର କିଲୋମିଟରର ଦୂରତାକୁ ଅତିକ୍ରମ କରି ଏକାଠି ହୋଇଛନ୍ତି । ଆଉ ବିବାହ ବନ୍ଧନରେ ବାନ୍ଧି ହୋଇଛନ୍ତି ।
ଅନନ୍ତରାଜୁ କେମିଲିଙ୍କ ବିବାହରେ କେମିଲିଙ୍କ ୪୦ ଜଣ ସମ୍ପର୍କୀୟ ଯୋଗ ଦେଇଥିଲେ । ହମ୍ପିର ବିରୁପାକ୍ଷ ମନ୍ଦିରରେ ସେମାନଙ୍କ ବିବାହ ହୋଇଥିଲା । ତେବେ ଅନନ୍ତରାଜୁ କେମିଲିଙ୍କ ବିବାହ ପ୍ରମାଣ କରିଦେଲା ଯେ ପ୍ରେମର କୌଣସି ସୀମା ନାହିଁ । ପ୍ରେମ ହେଲେ ପାହାଡ ପର୍ବତ ଡେଇଁଯିବାକୁ ଭିତରୁ କିଏ ପ୍ରେରଣା ଦିଅ । ପ୍ରେମ ହେଲେ ଦୂରତା କମିଯାଏ, ଦୁଇ ଆଖି ମିଶିଯାଏ ଆଉ କାଳ କାଳକୁ ରହିଯାଏ ଅମର ପ୍ରେମ କାହାଣୀ…