ଭୁବନେଶ୍ୱର ସ୍କୁଲ ଗୁଡିକ ପାଠପଢା ପାଇଁ ଅନୁପଯୋଗୀ । ୭୫ ପ୍ରତିଶତ ବିଦ୍ୟାଳୟରେ ଇଣ୍ଟରନେଟ ସେବା ନଥିବାରୁ ଆପଣାଇ ପାରିନାହାନ୍ତି ଅନଲାଇନ ଶିକ୍ଷା ।
କନକ ବ୍ୟୁରୋ : ଓଡିଶାର ରାଜଧାନୀର ସ୍କୁଲଗୁଡିକ ପାଠ ପଢା ପାଇଁ ଅନୁପଯୋଗୀ । ଏହି ଉଦବେଗଜନକ ଖବର ପଦାକୁ ଆଣିଛି ନୀତି ଆୟୋଗର ସସଟେନଏବୁଲ ଡେଭଲପମେଂଟ ଗୋଲ ବା ନିରନ୍ତର ବିକାଶ ଲକ୍ଷ୍ୟ ରିପୋର୍ଟ । ନୀତି ଆୟୋଗର ରିପୋର୍ଟ ଅନୁସାରେ ଅଧିକାଂଶ ସ୍କୁଲର ଭିତ୍ତିଭୂମି ଅସଜଡା । ବିଜୁଳି ସଂଯୋଗ, ପିଇବା ପାଣିର ସୁବିଧା ଭଳି ମୌଳିକ ସୁବିଧା ବହୁ ସ୍କୁଲରେ ନାହିଁ । ରାଜଧାନୀର ୨୦ ପ୍ରତିଶତ ସ୍କୁଲରେ ଏବେ ବି ବିଦ୍ୟୁତ ସଂଯୋଗ ନଥିବା ବେଳେ ସବୁ ସ୍କୁଲରେ ପିଇବା ପାଣିର ସୁବିଧା ନାହିଁ । ସେହିପରି ଭୁବନେଶ୍ୱରରେ ପ୍ରାୟ ୭୫ ପ୍ରତିଶତ ସ୍କୁଲରେ ଇଂଟରନେଟ ସୁବିଧା ନଥିବାରୁ ଅନଲାଇନ୍ ଶିକ୍ଷା ବାଧାପ୍ରାପ୍ତ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସମଗ୍ର ଦେଶରେ ବିଦ୍ୟାଳୟଗୁଡିକରେ ଇଂଟରନେଟ ସେବା ଯୋଗାଇବାରେ ଉତରପ୍ରଦେଶ ଆଗ୍ରା ବିଫଳ ତାଲିକାର ଶୀର୍ଷରେ ଥିବା ବେଳେ କୋଲକାତା ଦ୍ୱିତୀୟ ଓ ତୃତୀୟରେ ରହିଛି ଭୁବନେଶ୍ୱର । ଏହାଛଡା ସ୍ମାର୍ଟସିଟି ଭୁବନେଶ୍ୱରରେ ନବମ ଦଶମ ଶ୍ରେଣୀ ପିଲାଙ୍କୁ ପାଠ ପଢାଇବା ପାଇଁ ଛାତ୍ରଙ୍କ ତୁଳନାରେ ଶିକ୍ଷକଙ୍କ ଅନୁପାତ ମଧ୍ୟ ନୈରାଶ୍ୟଜନକ । ପ୍ରତି ୨୩ଜଣ ପିଲାଙ୍କୁ ଜଣେ ଶିକ୍ଷକ ପାଠ ପଢାଉଥିବା ନୀତି ଆୟୋଗର ଏସଡିଜି ରିପୋର୍ଟରେ ପ୍ରକାଶ ପାଇଛି ।
ସେହିଭଳି ମାଧ୍ୟମିକ ଶିକ୍ଷାରେ ପଢୁଥିବା ପିଲାଙ୍କୁ ପାଠ ପଢାଉଥିବା ୮୩.୯୭ ପ୍ରତିଶତ ଶିକ୍ଷକ ତାଲିମପ୍ରାପ୍ତ ଅର୍ଥାତ୍ ପଢାଇବାକୁ ଯୋଗ୍ୟ ବୋଲି ଏସଡିଜି ସୂଚକାଙ୍କରେ ଉଲ୍ଲେଖ ରହିଛି । ବିଦ୍ୟାଳୟରେ ଶିକ୍ଷା ପଦ୍ଧତିର ୮ଟି ଦିଗକୁ ନେଇ ଦେଶର ବଛା ବଛା ୫୬ଟି ସହରକୁ ନେଇ ନୀତି ଆୟୋଗ ପକ୍ଷରୁ ସର୍ବେକ୍ଷଣ କରାଯାଇଥିଲା । ନୀତି ଆୟୋଗର ନିରନ୍ତର ବିକାଶ ଲକ୍ଷ୍ୟ ରିପୋର୍ଟରେ ଭୁବନେଶ୍ୱରର ବିଦ୍ୟାଳୟଗୁଡିକୁ ମୋଟ ଶହେ ମାର୍କରୁ ୫୦ ମାର୍କ ମିଳିଛି ।