ସମୁଦ୍ର ମଝିରେ ଘନୀଭୂତ ହେଉଛି ବାତ୍ୟା: ଆଜି ତୀବ୍ର ସାମୁଦ୍ରିକ ଝଡର ରୂପ ନେବ ‘ଅମ୍ଫନ’; ପ୍ରଭାବରେ ୩ଦିନ ଯାଏଁ ଓଡ଼ିଶାରେ ବର୍ଷା
ପାଣିପାଗ ବିଭାଗର ଆକଳନ: ୨୦ ତାରିଖରେ ପଶ୍ଚିମବଙ୍ଗରେ ସ୍ଥଳଭାଗ ଛୁଇଁପାରେ ‘ଅମ୍ଫନ’
କନକ ବ୍ୟୁରୋ: ବଙ୍ଗୋପସାଗରରେ ବାତ୍ୟାର ରୂପ ନେଇଥିବା ଅମ୍ପନ ଘନୀଭୂତ ହେଉଛି । ଆଉ କିଛି ଘଂଟା ଭିତରେ ଏହା ତୀବ୍ର ସାମୁଦ୍ରିକ ଝଡ଼ ବା ସିଭିୟର ସାଇକ୍ଲୋନିକ୍ ଷ୍ଟର୍ମରେ ପରିଣତ ହେବ । ଆଇଏମ୍ଡି ବା ଭାରତୀୟ ପାଣିପାଗ ବିଭାଗର ଆକଳନ ଅନୁସାରେ ୨୦ ତାରିଖରେ ଏହା ସ୍ଥଳ ଭାଗ ଛୁଇଁବ । ଦକ୍ଷିଣ-ପୂର୍ବ ବଙ୍ଗୋପସାଗର ଓ ଏହାର ପାଶ୍ୱର୍ବର୍ତୀ ଅଂଚଳରେ ଥିବା ଗଭୀର ଅବପାତ ଗତକାଲି ସନ୍ଧ୍ୟାରେ ବାତ୍ୟା ବା ସାମୁଦ୍ରିକ ଝଡ଼ ବା ସାଇକ୍ଲୋନିକ୍ ଷ୍ଟର୍ମର ରୂପ ନେଇଥିଲା । ଏହା ପାରାଦୀପ ଠାରୁ ଦକ୍ଷିଣ ଦିଗରେ ପ୍ରାୟ ୧୦୨୦ କିଲୋମିଟର ଦୂରରେ ରହିଛି । ଶେଷ ୬ ଘଂଟାରେ ଏହା ଘଂଟା ପ୍ରତି ୫ କିଲୋମିଟର ବେଗରେ ଉତର-ପଶ୍ଚିମ ଦିଗରେ ଗତି କରୁଛି ।
Kanak News is now on WhatsApp
Join and get latest news updates delivered to you via WhatsApp
୧୮ ତାରିଖ ସକାଳ ବେଳା ଏହା ଆହୁରି ଶକ୍ତି ସଂଗ୍ରହ କରି ଅତି ତୀବ୍ର ସାମୁଦ୍ରିକ ଝଡ଼ ବା ଭେରି ସିଭିୟର ସାଇକ୍ଲୋନିକ୍ ଷ୍ଟର୍ମରେ ପରିଣତ ହେବାର ସମ୍ଭାବନା ରହିଛି । ଆଇଏମଡିର ଆକଳନ ଅନୁସାରେ ଆସନ୍ତା ୨୦ ତାରିଖ ଅପରାହ୍ନରୁ ସଂଧ୍ୟା ମଧ୍ୟରେ ସ୍ଥଳ ଭାଗରେ ମାଡ ହେବ ବାତ୍ୟା ଅମ୍ଫନ । ବର୍ତମାନର ଆକଳନ ଅନୁସାରେ ପଶ୍ଚିମବଙ୍ଗରେ ଲ୍ୟାଣ୍ଡଫଲ୍ ହେବ ବାତ୍ୟା । ତେବେ ଓଡ଼ିଶାରେ ଏହାର ପ୍ରଭାବ ପଡିବା ସମ୍ଭାବନା ରହିଛି । ଉପକୂଳ ଓ ଉତର ଓଡ଼ିଶାରେ ମଧ୍ୟମ ଧରଣରୁ ପ୍ରବଳ ବର୍ଷା ହେବ ବୋଲି ଆକଳନ କରାଯାଉଛି ।
ବାତ୍ୟାର ରୂପ ନେଇ ସାରିଥିବା ଅମ୍ଫନ ପ୍ରଭାବରେ ୧୮ ତାରିଖରୁ ଓଡିଶାରେ ଆରମ୍ଭ ହେବ ବର୍ଷା । ତେବେ ବାତ୍ୟା କେଉଁ ଆଡକୁ ଯିବ, ଓଡ଼ିଶା ମୁହାଁ ହେବ କି ପଶ୍ଚିମବଙ୍ଗ ମୁହାଁ ହେବ, ଏ ନେଇ ଆହୁରି ସ୍ପଷ୍ଟ ସୂଚନା ମିଳିବ । କାରଣ ଗଭୀର ଅବପାତ ଏବେ ଉତର-ପଶ୍ଚିମ ଦିଗରେ ଗତି କରୁଛି । ଏହାର ରି-କର୍ଭ ବା ଦିଗ ପରିବର୍ତନ ହେବ । ଦିଗ ପରିବର୍ତନ ହେବା ପରେ ବାତ୍ୟା କେଉଁ ଆଡକୁ ଯିବ ଏବଂ କେଉଁଠି ମାଡ ହେବ, ଏ ନେଇ ସଂକେତ ମିଳିବ ।