ଛୋଟ ନିର୍ବାଚନ ହେଲେ ବଡ଼ ପ୍ରଭାବ : ଆଜି ମୟୂରଭଂଜ ବିଜାତଳା ବ୍ଲକର ୩୨ ନମ୍ବର ଜୋନ୍ ଉପନିର୍ବାଚନ ପାଇଁ ଭୋଟିଂ ଜାରି
କନକ ବ୍ୟୁରୋ : ମୟୂରଭଞ୍ଜ ଜିଲ୍ଲା ବିଜାତଳା ବ୍ଲକ ୩୨ ନମ୍ବର ଜୋନର ଜିଲ୍ଲାପରିଷଦ ଉପ-ନିର୍ବାଚନ ପାଇଁ ଚାଲିଛି ଭୋଟ୍ ଗ୍ରହଣ । ସକାଳ ୭ଟାରୁ ଆରମ୍ଭ ହୋଇଛି ଭୋଟ୍ ଗ୍ରହଣ । ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଭୋଟ୍ ଗ୍ରହଣ ହେବ । ୮୨ଟି ବୁଥରେ ଭୋଟ୍ ଗ୍ରହଣ କରାଯାଉଛି । ଏହି ଉପନିର୍ବାଚନରେ ବିଜେପି, ବିଜେଡି ଓ ଜେଏମଏମ୍ ମଧ୍ୟରେ କଡା ଟକ୍କର ହେବ ବୋଲି ଜଣାପଡିଛି । ଏହି ଆସନରେ ୫ଟି ପଂଚାୟତର ୨୩ହଜାର ଭୋଟର ୧୦ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ । ଏହି ଜିଲ୍ଲାପରିଷଦ ଜୋନରେ ୨୦୧୭ ନିର୍ବାଚନରେ ବିଜେପି ପ୍ରାର୍ଥୀ ବିଜୟୀ ହୋଇଥିଲେ । ଏବଂ ବିଜେପି ଜିଲ୍ଲାପରିଷଦଙ୍କର ଦେହାନ୍ତ ହୋଇଯିବାରୁ ସେଠାରେ ଏବେ ଉପନିର୍ବାଚନ ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଏହା ଜିଲ୍ଲାପରିଷଦ ଉପନିର୍ବାଚନ ହୋଇଥିଲେ ମଧ୍ୟ ଏହାକୁ ପ୍ରମୁଖ ରାଜନୈତିକ ଦଳ ଗୁଡିକ ବେଶ୍ ଗୁରୁତ୍ୱ ଦେଉଥିବା ଦେଖିବାକୁ ମିଳିଛି । ୨୦୧୭ରେ ହୋଇଥିବା ଜିଲ୍ଲା ପରିଷଦ ନିର୍ବାଚନରେ ଏଠାରେ ନମ୍ବର ୱାନ ଦଳ ଭାବେ ବିଜେପି ସାମ୍ନାକୁ ଆସିଥିଲା । ପଂଚାୟତ ନିର୍ବାଚନରେ ବିଜେଡିକୁ ବିଜେପି କଡା ଟକ୍କର ଦେଇଥିବା ବେଳେ ଉପନିର୍ବାଚନରେ ବିଜେପିକୁ ମାତ ଦେବା ବିଜେଡି ପାଇଁ ବଡ ଚ୍ୟାଲେଞ୍ଜ ।
ସେହିପରି ନିଜ ଭୋଟରଙ୍କ ବିଶ୍ୱାସ ବଜାୟ ରଖିବା ବିଜେପି ପାଇଁ ବି ସମ୍ମାନର ପ୍ରଶ୍ନ । ସେହିପରି ଜେଏମଏମର ବି ସଙ୍ଗଠନ ସୁଦୃଢ ଥିବାରୁ ଛୋଟ ନିର୍ବାଚନରେ ବି ବଡ ଧରଣର କସରତ ଦେଖିବାକୁ ମଳିଛି । ଗତ ନିର୍ବାଚନରେ ଜେଏମଏମ ଦ୍ୱିତୀୟ ସ୍ଥାନରେ ରହିଥିଲା । ଏହି ନିର୍ବାଚନର ଫଳାଫଳ ଲୋକଙ୍କ ମିଜାଜ ଓ ରାଜନୈତିକ ଦଳର ବିଶ୍ୱସନୀୟତାକୁ ଜାହିର କରିବ ବୋଲି କୁହାଯାଉଛି ।