ମହଙ୍ଗା ପଡିଲା ହେୟାର ଷ୍ଟାଇଲ, ଚୁଟି କାଟିଦେଲେ ଗୁରୁମା ! କପତେଶ୍ୱର ସ୍କୁଲର ୧୦ ଜଣ ଛାତ୍ରଙ୍କ ଚୁଟି କାଟିବା ପରେ ଅଭିଭାବକଙ୍କ ହୋ ହାଲ୍ଲା
କନକ ବ୍ୟୁରୋ : ମହଙ୍ଗା ପଡିଲା ହେୟାର ଷ୍ଟାଇଲ । ଚୁଟି କାଟିଦେଲେ ଗୁରୁମା । ପୁରୀ ଜିଲ୍ଲା ଚନ୍ଦନପୁରର କପତେଶ୍ୱର ଉନ୍ନୀତ ଉଚ୍ଚବିଦ୍ୟାଳୟରେ ଘଟିଛି ଏଭଳି ଘଟଣା । ଗତକାଲି ଖେଳ ପିରିୟଡରେ ସ୍କୁଲର କ୍ରୀଡା ଶିକ୍ଷୟିତ୍ରୀ ପିଲାଙ୍କ ଚୁଟି କାଟି ଦେଇଥିବା ଅଭିଯୋଗ ହୋଇଛି । କଇଁଚି ଧରି ରାସ୍ତା ଉପରେ ପିଲାଙ୍କୁ ଛିଡା କରି କ୍ରୀଡା ଶିକ୍ଷୟିତ୍ରୀ ତାଙ୍କ ଚୁଟି କାଟି ଦେଇଥିବା ଅଭିଯୋଗ କରି ଅଭିଭାବକ ହୋହାଲ୍ଲା କରିଛନ୍ତି । ପ୍ରାୟ ୧୦ରୁ ଅଧିକ ପିଲାଙ୍କ ଚୁଟି କାଟି ଦେଇଥିବା କହିଛନ୍ତି ଅଭିଭାବକ ।
Kanak News is now on WhatsApp
Join and get latest news updates delivered to you via WhatsApp
ପିଲାଙ୍କୁ ଚୁଟି କାଟି ସ୍କୁଲ ଆସିବା ପାଇଁ ବାରମ୍ବାର ତାଗିଦ ପରେ ମଧ୍ୟ ପିଲାମାନେ ତାଙ୍କ କଥା ମାନିନଥିବାରୁ ଏପରି କରି ଥିବା କହିଛନ୍ତି ସମ୍ପୃକ୍ତ କ୍ରୀଡା ଶିକ୍ଷୟିତ୍ରୀ । ଏପରିକି ବଡ ବଡ ଚୁଟି ରହିବା ଦ୍ୱାରା ଥଣ୍ଟା ଜ୍ୱର ହେଉଥିବାରୁ ଶିକ୍ଷୟତ୍ରୀ ଚୁଟି କାଟିଥିବା କହିଛନ୍ତି । ତେବେ ଏହି ଘଟଣା ପରେ ଭୟରେ ପିଲାମାନେ ସ୍କୁଲ ଆସିବା ପାଇଁ ମନା କରିଦେଇଥିଲେ । ଏବଂ ଅଭିଭାବକ ମାନେ ସ୍କୁଲକୁ ଆସି ହୋହାଲ୍ଲା କରିଥିଲେ । ଏପରିକି ଯଦି ଶିକ୍ଷୟତ୍ରୀଙ୍କୁ ପିଲାଙ୍କ ହେୟାର ଷ୍ଟାଇଲ ଭଲ ଲାଗୁନଥିଲା ତେବେ ସ୍କୁଲ ପରିଚାଳନା କମିଟିକୁ କହି ପାରିଥାନ୍ତେ ବୋଲି ଅଭିଭାବକ ମାନେ କହିଥିଲେ । କିନ୍ତୁ ଏପରି ନକରି ସିଧାସଳଖ ପିଲାଙ୍କ ଚୁଟି କାଟି ଦେବାରୁ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଇଛି । ଏହି ଘଟଣା ପରେ ସଂପୃକ୍ତ ଶିକ୍ଷୟତ୍ରୀ ଭୁଲ ମାଗିଥିବା ଜଣା ପଡିଛି ।