ଓ୍ଵିକିଲିକ୍ସର ଖୁଲାସା ! ସିଆଇଏ ହାତରେ ଆଧାର ତଥ୍ୟ
ଓ୍ଵିକିଲିକ୍ସ ପକ୍ଷରୁ ସନ୍ଦେହ ପ୍ରକଟ କରାଯାଇଛି ଯେ ଆମେରିକାର ସିଆଇଏ ଆଧାର ସମ୍ପର୍କିତ ତଥ୍ୟ ହାସଲ କରିଛି । ଆମେରିକାର ପ୍ରଯୁକ୍ତି କଂପାନି କ୍ରସ୍ ମ୍ୟାଚ୍ ଟେକ୍ନୋଲୋଜିସ୍ ଦ୍ୱାରା ବିକଶିତ କରାଯାଇଥିବା ପ୍ରଯୁକ୍ତିକୁ ବ୍ୟବହାର କରି ସିଆଇଏ ପକ୍ଷରୁ ଏହି ତଥ୍ୟ ହାସଲ କରାଯାଇଥିବା ସନ୍ଦେହ କରାଯାଉଛି । ଏ ସମ୍ପର୍କରେ ଏକ ୱେବସାଇଟରେ ଖବର ପ୍ରକାଶ ପାଇଥିବା ଓ୍ଵିକିଲିକ୍ସ ପକ୍ଷରୁ ସୂଚନା ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଭାରତରେ ଆଧାର କାର୍ଡ ପାଇଁ ଭାରତୀୟ ସ୍ୱତନ୍ତ୍ର ପରିଚୟପତ୍ର କର୍ତ୍ତୃପକ୍ଷ (ୟୁଆଇଡିଏଆଇ)କୁ କ୍ରସ୍ ମ୍ୟାଚ୍ ଟେକ୍ନୋଲୋଜିସ୍ ବାୟୋମେଟଅିକ୍ ସମାଧାନ ଯୋଗାଇ ଦେଇଛି । କ୍ରସ୍ ମ୍ୟାଚର ଭାରତୀୟ ଶାଖା କଂପାନି ନାମ ହେଉଛି ସ୍ମାର୍ଟ ଆଇଡେଣ୍ଟିଟି ଡିଭାଇସ୍ ପ୍ରାଇଭେଟ୍ ଲିମିଟେଡ୍ । ଏହି କଂପାନି ୧୨ ଲକ୍ଷ ଭାରତୀୟଙ୍କ ଆଧାର ପଞ୍ଜୀକରଣ କରିବା କାର୍ଯ୍ୟ କରିଛି । ଏହି ଦୃଷ୍ଟିରୁ ସିଆଇଏ ପାଖରେ ଆଧାର ସମ୍ପର୍କିତ ତଥ୍ୟ ପହଞ୍ଚିବା ସମ୍ଭାବନାକୁ ଏଡ଼ାଇ ହେବ ନାହିଁ ।
ଓ୍ଵିକିଲିକ୍ସ ପକ୍ଷରୁ ଟ୍ଵିଟର୍ ଜରିଆରେ ଆଧାର ତଥ୍ୟ ଲିକ୍ ସମ୍ପର୍କିତ ସୂଚନା ପ୍ରଦାନ କରାଯାଇଛି । ଏହା ଟୁଇଟ୍ କରି ପ୍ରଶ୍ନ କରିଛି ଭାରତର ଜାତୀୟ ପରିଚୟପତ୍ରର ଯେଉଁ ତଥ୍ୟ ତଥ୍ୟ ଚୋରି ହୋଇଛି ତାହାର ଗୁଇନ୍ଦାଗିରି ସିଆଇଏ କରିଛି କି ? କିଛି ସମୟ ପରେ ଓ୍ଵିକିଲିକ୍ସ ଆଉ ଏକ ଟିୁଇଟ୍ କରିଥିଲା ଯେ ସିଆଇଏ ଆଧାର କାର୍ଡ ତଥ୍ୟକୁ ଚୋରି କରିସାରିଲାଣି କି ?
ଏ ସମ୍ପର୍କରେ ସରକାରଙ୍କ ପକ୍ଷରୁ କୁହାଯାଇଛି ଯେ ଏହା ଓ୍ଵିକିଲିକ୍ସର ଲିକ୍ ନୁହେଁ । ଏ ସମ୍ପର୍କିତ ଖବର ଏକ ୱେବସାଇଟରେ ପ୍ରକାଶ ପାଇଛି । କ୍ରସ୍ ମ୍ୟାଚ୍ ହେଉଛି ବିଶ୍ୱ ସ୍ତରର ବାୟୋମେଟ୍ରିକ୍ ଡିଭାଇସ୍ (ଉପକରଣ) ଯୋଗାଣକାରୀ । ମାତ୍ର ଏହି କଂପାନି କିମ୍ବା ଅନ୍ୟ କେହି ଆଧାର ତଥ୍ୟ ହାସଲ କରିପାରିବେ ନାହିଁ । ଲୋକମାନଙ୍କର ଯେଉଁ ତଥ୍ୟ ଭେଣ୍ଡରମାନେ ସଂଗ୍ରହ କରିଛନ୍ତି ତାହା ଏନକ୍ରିପଟେଡ୍ ଏବଂ ତାହା ସଂଗ୍ରହ କରାଯିବା ପରେ ସିଧାସଳଖ ଆଧାର କାର୍ଡ ସର୍ଭରକୁ ଚାଲିଯାଇଥାଏ । ତେଣୁ କୌଣସି ଏଜେନ୍ସି ଦ୍ୱାରା ସେହି ତଥ୍ୟକୁ ହାସଲ କରିବା ସହଜ ନୁହେଁ । ରିପୋର୍ଟରେ ଯାହା ସବୁ ଲେଖାଯାଇଛି ତାହାର କୌଣସି ସତ୍ୟତା ନାହିଁ ବୋଲି ସରକାରଙ୍କ ପକ୍ଷରୁ କୁହାଯାଇଛି ।
ସିଆଇଏରେ ଏକ ବିଭାଗ ରହିଛି ଯାହାର ନାମ ହେଉଛି ଅଫିସ୍ ଅଫ୍ ଟେକ୍ନିକାଲ୍ ସର୍ଭିସେସ୍ । ଉକ୍ତ ବିଭାଗର ଏକ ବାୟୋମେଟ୍ରିକ୍ ସଂଗ୍ରହ ବିଭାଗ ରହିଛି ଏବଂ ଏହା ସମଗ୍ର ବିଶ୍ୱରେ ସମ୍ପର୍କ ସ୍ଥାପନ ବ୍ୟବସ୍ଥା ପ୍ରଦାନ କରିଥାଏ । କିନ୍ତୁ ଏକ ସ୍ୱତନ୍ତ୍ର ପ୍ରଯୁକ୍ତିକୁ ବ୍ୟବହାର କରି ସିଆଇଏ ଏହି ବ୍ୟବସ୍ଥାରୁ ତଥ୍ୟ ଚୋରି କରିନେଉଥିବା ଓ୍ଵିକିଲିକ୍ସ ଅଭିଯୋଗ କରିଛି ।