ସଚିନଙ୍କ ଡେବ୍ୟୁ ଭାଷଣକୁ ଅଟକାଇଲା କଂଗ୍ରେସ ! ନିରାଶ ହେଲେ ମାଷ୍ଟରବ୍ଲାଷ୍ଟର
କ୍ରିକେଟ ମଇଦାନରେ ବୋଲରଙ୍କ ନିଦ ହଜାଇଦେଉଥିବା ଭାରତୀୟ କ୍ରିକେଟର ତଥା ରାଜ୍ୟସଭା ସାଂସଦ ସଚିନ ତେନ୍ଦୁଲକର ସଂସଦରେ କିନ୍ତୁ ଡେବ୍ୟୁ ଭାଷଣରେ ଦେଇ ନ ପାରିବା ଯୋଗୁଁ ନିରାଶ ହୋଇଛନ୍ତି । ଆଜି ପ୍ରଥମଥର ପାଇଁ ସଚିନ ତେନ୍ଦୁଲକର ସଂସଦର ଆଲୋଚନାରେ ଭାଗ ନେଇଛନ୍ତି । କିନ୍ତୁ ଆଲୋଚନାରେ ନିଜ ମତ ରଖିବା ପୂର୍ବରୁ ସଂସଦରେ କଂଗ୍ରେସର ହଙ୍ଗମା ଯୋଗୁଁ ସଚିନ ନିରାଶ ହୋଇଛନ୍ତି । ବିରୋଧୀ କଂଗ୍ରେସ ଜୋରାଦାର ହଙ୍ଗାମା କରିବା ଯୋଗୁଁ ଗତକାଲି ପର୍ଯ୍ୟନ୍ତ ରାଜ୍ୟସଭାକୁ ସ୍ଥଗିତ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
୨୦୧୨ ମସିହାରେ ସାଂସଦ ଭାବେ ସଚିନ ରାଜ୍ୟସଭାକୁ ମନୋନୀତ ହେବା ପରେ ପ୍ରଥମଥର ପାଇଁ ଆଲୋଚନାରେ ଭାଗ ନେଇଥିଲେ । ତେବେ ସଚିନ ଭାଷଣ ଦେବା ଆରମ୍ଭ କରିବା ମାତ୍ରେ ହୋ ହାଲ୍ଲା କରିଥିଲା ବିରୋଧୀ କଂଗ୍ରେସ । ମନମୋହନ ସିଂହଙ୍କ ଉପରେ ପ୍ରଧାନମନ୍ତ୍ରୀ ମୋଦି ଦେଇଥିବା ବୟାନକୁ ନେଇ କଂଗ୍ରେସ ବାରମ୍ବାର ସଂସଦରେ ହଙ୍ଗମା କରୁଛି । ସଚିନ ଆଲୋଚନା କରୁଥିବା ବେଳେ କଂଗ୍ରେସକୁ ଚୁପ ରହିବାକୁ ନିବେଦନ କରିଥିଲେ ଗୃହର ଅଧ୍ୟକ୍ଷ ତଥା ଉପରାଷ୍ଟ୍ରପତି ଭେଙ୍କିୟା ନାଇଡୁ । ଭାରତର ରତ୍ନ ହେଉଛନ୍ତି ସଚିନ, ତେଣୁ ସେ ଆଲୋଚନା କରିବା ବେଳେ ଶାନ୍ତ ରହିବାକୁ କଂଗ୍ରେସକୁ ଅନୁରୋଧ କରିଥିଲେ । କାରଣ ଏହି ଆଲୋଚନାକୁ ପୂରା ଦେଶ ଦେଖୁଛି । ତେଣୁ ଏହା ଆଦୌ ଶୋଭନୀୟ ନୁହେଁ ।
ଭାରତୀୟ କ୍ରୀଡା ଓ କ୍ରୀଡାବିତଙ୍କ ବିକାଶ, ଅଲମ୍ପିକ ପାଇଁ ପ୍ରସ୍ତୁତି ଓ ପୂରା ବିଶ୍ୱରେ ଭାରତୀୟ ଖେଳାଳି କିପରି ଭଲ ପ୍ରର୍ଦଶନ କରିପାରିବେ ସେ ନେଇ ମତ ରଖିଥାନ୍ତେ ସଚିନ । ଏହାଛଡା କ୍ରୀଡାର ବିକାଶ ପାଇଁ ସ୍କୁଲ ପାଠ୍ୟକ୍ରମରେ କ୍ରୀଡାକୁ ସ୍ଥାନ ଦେବା ଉପରେ ସଚିନ ସଂସଦରେ ଆଲୋଚନା କରିଥାନ୍ତେ । କିନ୍ତୁ ଏହି ଆଲୋଚନା କରିବା ପୂର୍ବରୁ ବିରୋଧ କଂଗ୍ରେସ ଗୃହ ଭିତରେ ଆରମ୍ଭ କରିଥିଲା ହଟ୍ଟଗୋଳ । ଯାହାଫଳରେ ସଂସଦରେ ନିଜର ମତ ରଖି ପାରିନଥିଲେ ସଚିନ ।
ଏହାପୂର୍ବରୁ ସଚିନ ରାଜ୍ୟସଭାର କୌଣସି ଆଲୋଚନାରେ ଭାଗ ନେଇ ନାହାନ୍ତି । ଯାହାକୁ ନେଇ ପୂର୍ବରୁ ଅନେକଥର ପ୍ରଶ୍ନ ଉଠିଛି । ଅଧିକାଂଶ ଅଧିବେଶନରେ ସଚିନଙ୍କ ଅନୁପସ୍ଥିତିକୁ ନେଇ ଚର୍ଚ୍ଚା ମଧ୍ୟ ହୋଇଛି । ଏପରିକି ତାଙ୍କ ରାଜ୍ୟସଭା ସଦସ୍ୟତାକୁ ରଦ୍ଦ କରିବା ପାଇଁ ମଧ୍ୟ ଅନେକ ସମୟରେ ସାଂସଦ ମାନେ ଦାବି କରିଛନ୍ତି । ଏପରିକି ସାଂସଦ ନରେଶ ଅଗ୍ରୱାଲ କହିଛନ୍ତି , ସଂସଦରେ ଅନୁପସ୍ଥିତ ପାଇଁ ଯଦି ବିଜୟ ମାଲ୍ୟାଙ୍କ ସଭ୍ୟପଦ ରଦ୍ଦ କରାଯାଇପାରୁଛି ତେବେ ସଚିନଙ୍କର ସସ୍ୟସତା କଣ ପାଇଁ ରଦ୍ଦ କରାଯିବନି ବୋଲି ପ୍ରଶ୍ନ ଉଠାଇଛନ୍ତି । ୨୦୧୨ରେ ରାଜ୍ୟସଭାକୁ ମନୋନୀତ ହୋଇଥିବା ସଚିନ ସଂସଦର ୩୪୮ଟି କାର୍ଯ୍ୟଦିବସ ମଧ୍ୟରୁ ମାତ୍ର ୨୩ ଦିନ ଯୋଗ ଦେଇଛନ୍ତି । ତେବେ ଆଜି ସଂସଦରେ ଆଲୋଚନାରେ ଭାଗ ନେଉଥିବାରୁ ସଚିନ ପତ୍ନୀ ଅଞ୍ଜଳୀଙ୍କ ସହ ରାଜ୍ୟସଭାକୁ ଆସିଥିଲେ । କିନ୍ତୁ ଆଲୋଚନା ପୂର୍ବରୁ କଂଗ୍ରେସର ହୋ ହାଲ୍ଳା ଯୋଗୁଁ ଅଧାରେ ରହିଗଲା ସଚିନଙ୍କ ଆଲୋଚନା ।