ଜାରି ରହିଛି ରାଫେଲ ରଣ । ଆଉ ଏକ ଅଭଯୋଗ ଆଣିଲେ ରାହୁଲ୍ । କହିଲେ, ପ୍ରତିରକ୍ଷା ମନ୍ତ୍ରାଳୟ ଡିଲ କରୁଥିବା ବେଳେ ସମାନ୍ତରାଳ ଆଲୋଚନା କରିଥିଲେ ମୋଦି
କନକ ବ୍ୟୁରୋ: ସଂସଦରେ ରାଫେଲକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ବିରୋଧୀଙ୍କ ଉପରେ ବର୍ଷିବା ପରେ ଆଜି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି, ପ୍ରଧାନମନ୍ତ୍ରୀ ମୋଦିଙ୍କୁ ଘେରିଛନ୍ତି । ପ୍ରଧାନମନ୍ତ୍ରୀଙ୍କ ଅଫିସକୁ, ପ୍ରତିରକ୍ଷା ମନ୍ତ୍ରାଳୟ ଲେଖିଥିବା ଏକ ଚିଠି ଦେଖାଇ, ମୋଦିଙ୍କୁ ଟାର୍ଗେଟ୍ କରିଛନ୍ତି ରାହୁଲ । ରାଫେଲ ଡିଲ ନେଇ ଫ୍ରାନ୍ସ ସରକାରଙ୍କ ସହ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ସମାନ୍ତରାଳ କଥାବାର୍ତା ନେଇ ସେହି ଚିଠିରେ କ୍ଷୋଭ ପ୍ରକାଶ କରିଥିଲା ପ୍ରତିରକ୍ଷା ମନ୍ତ୍ରାଳୟ । ଆଉ ସେହି ଚିଠିକୁ ଅସ୍ତ୍ର କରି ମୋଦୀ ସରକାରଙ୍କ ଉପରେ ବର୍ଷିଛନ୍ତି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ।
Kanak News is now on WhatsApp
Join and get latest news updates delivered to you via WhatsApp
ରାଫେଲ ଯୁଦ୍ଧ ବିମାନ ଶତ୍ରୁ ପକ୍ଷ ଉପରେ କେତେ ପ୍ରଭାବୀ ହେବ, ତାହା ଅପେକ୍ଷା ନିର୍ବାଚନୀ ବର୍ଷରେ ପାଲଟିଯାଇଛି ରାଜନୈତିକ ଲଢ଼େଇର ମୁଖ୍ୟ ଅସ୍ତ୍ର । ଆଉ ଶୁକ୍ରବାର ଦିନ ନେଇଛି ଆଉ ଏକ ନାଟକୀୟ ମୋଡ଼ । ଦୈନିକ ଖବରକାଗଜ ‘ଦ ହିନ୍ଦୁ’ରେ ପ୍ରକାଶିତ ଏକ ରିପୋର୍ଟ ଆଧାରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଟାର୍ଗେଟ କରିଛନ୍ତି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ । ରିପୋର୍ଟ ଅନୁସାରେ ୨୦୧୫ ନଭେମ୍ବର ମାସରେ ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ପିଏମ୍ଓ ବା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ଏକ ଚିଠି ଲେଖାଯାଇଥିଲା । ରାଫେଲ ଡିଲ ନେଇ ଫ୍ରାନ୍ସ ସରକାରଙ୍କ ସହ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ସମାନ୍ତରାଳ କଥାବାର୍ତା ନେଇ ସେହି ଚିଠିରେ କ୍ଷୋଭ ପ୍ରକାଶ କରିଥିଲା ପ୍ରତିରକ୍ଷା ମନ୍ତ୍ରାଳୟ । ଏହାକୁ ଅସ୍ତ୍ର କରି ମୋଦୀ ସରକାରଙ୍କ ଉପରେ ହମଲା କରିଛନ୍ତି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ।
ତେବେ କଂଗ୍ରେସ କରି ଆସୁଥିବା ଅଭିଯୋଗ ସତ ଓ ପ୍ରମାଣିତ ହୋଇଥିବା କହିଛନ୍ତି ରାହୁଲ । ଫ୍ରାନ୍ସର ପୂର୍ବତନ ରାଷ୍ଟ୍ରପତି ଫ୍ରାଙ୍କଇସ୍ ଓଲାନ୍ଦେଂକ ନାଁ ମଧ୍ୟ ନେଇଛନ୍ତି କଂଗ୍ରେସ ଅଧ୍ୟକ୍ଷ । ପ୍ରଧାନମନ୍ତ୍ରୀ ମୋଦି ବ୍ୟକ୍ତିଗତ ଭାବେ ଅନୀଲ ଅମ୍ବାନୀଙ୍କ ନାଁ ସୁପାରିଶ୍ କରିଥିବା ଓଲାନ୍ଦେ କହିଥିଲେ ବୋଲି ଅଭିଯୋଗ ଦୋହରାଇଛନ୍ତି ରାହୁଲ । ସେପଟେ ରାହୁଲଙ୍କ ଅଭିଯାଗ ନେଇ ଜବାବ ରଖିଛନ୍ତି କେନ୍ଦ୍ର ସରକାର । ପ୍ରତିରକ୍ଷାମନ୍ତ୍ରୀ ନିର୍ମଳା ସୀତାରମଣ ଏନେଇ ଲୋକସଭାରେ ବିବୃତି ରଖିଛନ୍ତି । କହିଛନ୍ତି, କଂଗ୍ରେସ ପକ୍ଷରୁ ଅଣାଯାଇଥିବା ନୂଆ ଅଭିଯୋଗ ଆଉ ଏକ ପ୍ରପୋଗାଣ୍ଡା । ଗଣମାଧ୍ୟମରେ ପ୍ରକାଶ ପାଇଥିବା ଅଧା ଖବରକୁ ନେଇ ରାହୁଲ ଏହି ଅଭିଯୋଗ କରିଛନ୍ତି, ଏହା ମଲା ଘୋଡ଼ାକୁ ପିଟିବା ଭଳି ।
ଗତକାଲି ଲୋକସଭାରେ ରାଫେଲ ଅଭିଯୋଗକୁ ନେଇ କଂଗ୍ରେସ ଉପରେ ବର୍ଷିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ତେବେ ନିର୍ବାଚନ ଯେତିକି ପାଖେଇ ଆସୁଛି, ରାଫେଲକୁ ନେଇ ତାତି ସେତିକି ବଢିବାରେ ଲାଗିଛି । କଂଗ୍ରେସର ଲଗାତର ଅଭିଯୋଗ ଓ କେନ୍ଦ୍ର ସରକାରଙ୍କ ଜବାବ ପରେ ଏହି ବିବାଦକୁ ଆହୁରି ଘନିଭୂତ କରିଛି ।