କମୁଛି କି ଶିକ୍ଷାର ମାନ ! ମେଧାବୀ ତାଲିକାରେ ନାହାନ୍ତି ରେଭେନ୍ସା, ବିଜେବି ଓ ରମାଦେବୀ
କନକ ବ୍ୟୁରୋ : କେମିତି ଚାଲିଛି ସରକାରୀ କଲେଜରେ ପାଠପଢା । ଚଳିତବର୍ଷ ଯୁକ୍ତ ଦୁଇ ବିଜ୍ଞାନରେ ମାତ୍ର ୨୭ ଜଣ ୯୦ ପ୍ରତିଶତରୁ ଅଧିକ ମାର୍କ ରଖି ପାସ୍ କରିଛନ୍ତି । ଏହାପରେ ରାଜ୍ୟର ବଡ ବଡ ସରକାରୀ କଲେଜରେ ପାଠପଢା ନେଇ ଉଠିଛି ପ୍ରଶ୍ନ । ଯୁକ୍ତ ଦୁଇରେ ପାଠ ପଢିବାକୁ ହେଲେ ଏସବୁ କଲେଜରେ ଛାତ୍ରଛାତ୍ରୀଙ୍କୁ ୯୦ ପ୍ରତିଶତରୁ ଅଧିକ ମାର୍କ ନିହାତି ଦରକାର । ହେଲେ ଯୁକ୍ତ ଦୁଇ ଫଳାଫଳ ତାର ବିପରିତ ହୋଇଛି । ରେଜଲ୍ଟ ଏପରି ହୋଇଛି ଯେ, ଗୋଟିଏ ବେସରକାରୀ କଲେଜର ଫଳାଫଳ ରାଜ୍ୟର ସମସ୍ତ କଲେଜଠାରୁ ଅଧିକ ।
Kanak News is now on WhatsApp
Join and get latest news updates delivered to you via WhatsApp
ଭୁବନେଶ୍ୱରର ନାମକରା ବିଜେବି କଲେଜରେ ଜଣେ ମାତ୍ର ଛାତ୍ର ୯୦ ପ୍ରତିଶତରୁ ଅଧିକ ମାର୍କ ରଖି ପାସ କରିଛନ୍ତି । ସେହିପରି ରେଭେନ୍ସା କଲେଜରୁ ମାତ୍ର ୨ଜଣ ୯୦ ପ୍ରତିଶତରୁ ଅଧିକ ମାର୍କ ରଖିବାକୁ ସମର୍ଥ ହୋଇଛନ୍ତି । ପ୍ରତିଷ୍ଠିତ ରମାଦେବୀ କଲେଜରୁ କେହି ୯୦ ପ୍ରତିଶତ ଉପରେ ମାର୍କ ରଖିନାହାନ୍ତି । ପ୍ରଶ୍ନ ଉଠୁଛି ନାମଲେଖା ପାଇଁ ୯୦ ପ୍ରତିଶତ ତଳକୁ ମାର୍କ ରଖିଥିବା ଛାତ୍ରଛାତ୍ରୀଙ୍କୁ ଏସବୁ କଲେଜ ନେଉନଥିବାବେଳେ ଯୁକ୍ତ ଦୁଇ ବିଜ୍ଞାନରେ ଏଭଳି ନୈରାଶ୍ୟ ଜନକ ପ୍ରଦର୍ଶନ କାହିଁକି ?
ଚଳିତବର୍ଷ ପରୀକ୍ଷା ଫଳ ଭଲ ରହିଥିଲେ ବି ମେଧାବୀ ତାଲିକାରେ କମିଛି ଛାତ୍ରଛାତ୍ରୀଙ୍କ ସଂଖ୍ୟା । ଗତବର୍ଷ ୪୩ ଜଣ ୯୦ ପ୍ରତିଶତରୁ ଅଧିକ ମାର୍କ ରଖି ପାସ କରିଥିବାବେଳେ ଚଳିତବର୍ଷ ଏହା ୨୭କୁ ଖସିଆସିଛି । ରାଜ୍ୟର ନାମକରା ସରକାରୀ କଲେଜରୁ ମାତ୍ର ୧୦ ଜଣ ୯୦ ପ୍ରତିଶତରୁ ଅଧିକ ମାର୍କ ରଖିବାକୁ ସମର୍ଥ ହୋଇଛନ୍ତି । ଯେଉଁ କଲେଜଗୁଡିକର ପ୍ରଥମ କଟଅପ ମାର୍କ ୯୦ ପ୍ରତିଶତ । ପ୍ରଶ୍ନ ଉଠୁଛି
• ସରକାରୀ କଲେଜରେ ପଢୁଥିବା ଛାତ୍ରଛାତ୍ରୀଙ୍କ ଏ ଦୁର୍ଦ୍ଦଶା କ’ଣ ପାଇଁ?
• ଭର୍ତ୍ତି ହେଲା ବେଳକୁ ୯୦ ପ୍ରତିଶତ ହେଲେ ବାହାରିଲା ବେଳକୁ କାହିଁ?
ଶିକ୍ଷା ବ୍ୟବସ୍ଥାରେ ସଂସ୍କାର ଆଣିବା ଲାଗି ଗଣଶିକ୍ଷା ଓ ଉଚ୍ଚଶିକ୍ଷା ବିଭାଗ ରିତିମତ ଚେଷ୍ଟା ଚଳାଇଥିବାବେଳେ ସରକାରୀ କଲେଜଗୁଡିକର ଫଳାଫଳ ଏସବୁ ଉଦ୍ୟମକୁ ପ୍ରଶ୍ନ ଘେରରେ ଛିଡା କରାଇଛି ।