ଜେଲରୁ ବାହାରିଲେ ୭ଶହ କୋଟି ଚିଟଫଣ୍ଡ ଠକେଇର ମାଷ୍ଟର ମାଇଣ୍ଡ ! ସିସୋର ମୁଖ୍ୟ ପ୍ରଶାନ୍ତ ଦାସଙ୍କୁ ହାଇକୋର୍ଟରୁ ମିଳିଲା ଜାମିନ
କନକ ବ୍ୟୁରୋ : ଓଡିଶାର ହଜାର ହଜାର ଜମାକାରୀଙ୍କୁ ଲୁଟି ଥିବା ବଡ ଚିଟଫଣ୍ଡ ସଂସ୍ଥା ସିସୋର କମ୍ପାନୀର ମୁଖ୍ୟ ପ୍ରଶାନ୍ତ ଦାସଙ୍କୁ ମିଳିଲା ମୁକ୍ତି । ୭ଶହ କୋଟି ଟଙ୍କା ଠକେଇର ଏହି ମାଷ୍ଟରମାଇଣ୍ଡଙ୍କୁ ସର୍ତମୂଳକ ଜାମିନ ଦେଇଛନ୍ତି ହାଇକୋର୍ଟ । ସୁପ୍ରିମକୋର୍ଟଙ୍କ ତତ୍ୱାବଧାନରେ କେନ୍ଦ୍ରୀୟ ତଦନ୍ତକାରୀ ସଂସ୍ଥା ସିବିଆଇର ତନାଘନା ଭିତରେ ପ୍ରଶାନ୍ତ ଦାସଙ୍କୁ ମିଳିଛି ସାମୟିକ ଆଶ୍ୱସ୍ତି । କାରଣ ୨୦୧୩ରୁ ଜେଲର ଚାରିକାନ୍ଥ ଭିତରେ ଥିବା ଏହି ଚିଟଫଣ୍ଡ ଠକ ଏବେ ଜାମିନରେ ମୁକୁଳିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅଧିକ ଲାଭର ଲୋଭ ଦେଖାଇ ଜମାକାରୀଙ୍କ ଟଙ୍କା ହଡପ କରିନେବା ପରେ ପୁଲିସ ଆଖିରେ ଧୂଳି ଦେଇ ଗାୟବ ହୋଇଯାଇଥିଲେ ପ୍ରଶାନ୍ତ ଦାସ । ଆଉ ଅନେକ ଦିନର ଛକାପଂଝା ପରେ ତାଙ୍କୁ ମୁମ୍ବାଇରୁ ଗିରଫ କରିଥିଲା କ୍ରାଇମବ୍ରାଂଚ । ସିବିଆଇ ତଦନ୍ତ ବେଳେ ଅନେକ ପ୍ରଭାବଶାଳୀ ବ୍ୟକ୍ତିଙ୍କ ସହ ପ୍ରଶାନ୍ତ ଦାସଙ୍କ ସଂପୃକ୍ତି ସାମ୍ନାକୁ ଆସିଥିଲା । ସିସୋର ସହ ସଂପର୍କ ରଖିଥିବା ଅନେକ ପ୍ରଭାବଶାଳୀ ବ୍ୟକ୍ତିମଧ୍ୟ ସିବିଆଇ ସ୍କାନରକୁ ଆସିଥିଲେ । ଏବେ ଚିଟଫଣ୍ଡ କ୍ଷତିଗ୍ରସ୍ତ ଜମାକାରୀ ସେମାନଙ୍କ ଟଙ୍କା କେମିତି ଫେରି ପାଇବେ ସେନେଇ ଅନିଶ୍ଚିତତା ଲାଗି ରହିଥିବା ବେଳେ ବେଲ୍ରେ ବାହାରକୁ ଆସିଛନ୍ତି ପ୍ରଶାନ୍ତ ଦାସ । ପୂର୍ବରୁ ୨୦୧୭ ଅଗଷ୍ଟ ମାସରେ କେତେକ ମାମଲାରେ ସର୍ତମୂଳକ ଜାମିନ ମିଳିଥିଲା । କିନ୍ତୁ ଅନ୍ୟ ମାମଲାରେ ଜାମିନ ମିଳି ନଥିଲା ।