କନକ ବ୍ୟୁରୋ : ଆରମ୍ଭ ହୋଇଛି ୧୭ତମ ଲୋକସଭାର ପ୍ରଥମ ଅଧିବେଶନ । ଅଧିବେଶନର ପ୍ରଥମ ଦିନରେ ସାଂସଦ ଭାବେ ଶପଥ ଗ୍ରହଣ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ବାରଣାସୀ ଲୋକସଭା ଆସନରୁ ବିଜୟୀ ହୋଇଥିବା ମୋଦି ପଦ ଓ ଗୋପନୀୟତାର ଶପଥ ନେଇଛନ୍ତି । ତେବେ ସଂସଦୀୟ ସଚିବ ମୋଦିଙ୍କ ନାମ ଘୋଷଣା କରିବା ମାତ୍ରେ ମୋଦି ମୋଦି ନାରାରେ ଉଛୁଳି ପଡିଥିଲା ଲୋକସଭା ଗୃହ ।
ମୋଦିଙ୍କ ପରେ ପରେ କେନ୍ଦ୍ର ମନ୍ତ୍ରିମଣ୍ଡଳର ଦୁଇ ବରିଷ୍ଠ ମନ୍ତ୍ରୀ ରାଜନାଥ ସିଂହ ଓ ଅମିତ ଶାହ ମଧ୍ୟ ସାଂସଦ ଭାବେ ଶପଥ ଗ୍ରହଣ କରିଛନ୍ତି । ତେବେ ସବୁଠାରୁ ବଡ କଥା ହେଉଛି ଶପଥ ନେବା ବେଳେ ସମସ୍ତଙ୍କ ନଜରର କେନ୍ଦ୍ରବିନ୍ଦୁ ସାଜିଥିଲେ ଓଡିଆ ସାଂସଦ । ମୋଦିଙ୍କ ପରେ ଓଡିଶାର ମୋଦି କୁହା ଯାଉଥିବା ପ୍ରତାପଙ୍କ ଶପଥକୁ ସମସ୍ତେ ଶୁଣୁଥିଲେ । କାରଣ ପ୍ରତାପ ଷଡଙ୍ଗୀ ଗୃହରେ ସାଂସଦ ଭାବେ ସଂସ୍କୃତ ଭାଷାରେ ଶପଥ ନେଇଥିଲେ । ସାଧାରଣ ଜୀବନ ଶୈଳୀ ପାଇଁ ଚର୍ଚ୍ଚାରେ ରହିଥିବା ବାଲେଶ୍ୱରର ସାଂସଦ ତଥା କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀ ସଂସ୍କୃତରେ ଶପଥ ନେଇ ପୁଣି ଥରେ ଆକର୍ଷଣର କେନ୍ଦ୍ରବିନ୍ଦୁ ସାଜିଥିଲେ । ଯାହା, କିଛି ଦିନ ତଳେ ଦୂରଦର୍ଶନକୁ ଦେଇଥିବା ସଂସ୍କୃତର ସାକ୍ଷାତକାରକୁ ମନେପକାଇ ଦେଇଥିଲା ।
Kanak News is now on WhatsApp
Join and get latest news updates delivered to you via WhatsApp
ତେବେ ଖାଲି ପ୍ରତାପ ନୁହଁନ୍ତି କେନ୍ଦୁଝର ସାଂସଦ ଚନ୍ଦ୍ରାଣୀ ମୁର୍ମୁ ମଧ୍ୟ ସାନ୍ତାଳି ଭାଷାରେ ଶପଥ ଗ୍ରହଣ କରିଛନ୍ତି । ସେହିପରି ଆସ୍କା ସାଂସଦ ପ୍ରମିଳା ବିଷୋୟୀ ଓଡିଆରେ ଶପଥ ନେଇଛନ୍ତି । କଂଗ୍ରେସର ଏକ ମାତ୍ର ସାଂସଦ ସପ୍ତଗିରି ଉଲାକା ଇଂରାଜୀରେ ଶପଥ ଗ୍ରହଣ କରିିଛନ୍ତି । ବିଜେଡିର ବରିଷ୍ଠ ସାଂସଦ ଭର୍ତ୍ତୃହରି ମହତାବ ଓଡିଆରେ ଶପଥ ଗ୍ରହଣ କରିବା ସହ ଅନ୍ୟ ଓଡିଆ ସାଂସଦମାନେ ମଧ୍ୟ ଓଡିଆରେ ଶପଥ ଗ୍ରହଣ କରିଛନ୍ତି ।