ଭୁବନେଶ୍ୱର ବ୍ୟୁରୋ, କନକ ନ୍ୟୁଜ୍ : ମେକ ଇନ୍ ଓଡିଶା କନକ୍ଲେଭରୁ ବିଶାଳ ପୁଂଜିନିବେଶର ପ୍ରତିଶ୍ରୁତି ପାଇଛି ଓଡିଶା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ବିଭିନ୍ନ ପ୍ରକଳ୍ପରେ ୨ ଲକ୍ଷ ୩ହଜାର ୨୭୦ କୋଟିର ପୁଂଜିନିବେଶ ପ୍ରତିଶ୍ରୁତି ମିଳିଛି । ଏହା ରାଜ୍ୟରେ ଅତିରିକ୍ତ ୧ ଲକ୍ଷ ୪୦ ହଜାର ନିଯୁକ୍ତି ସୁଯୋଗ ସୃଷ୍ଟି କରିବ ବୋଲି ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ପୁଂଜିନିବେଶକୁ ଦୃଷ୍ଟିରେ ରଖି ରାଜ୍ୟରେ ପ୍ରତିଷ୍ଠା ହେବ ବୈଷୟିକ ତାଲିମ କେନ୍ଦ୍ର ଏବଂ ଦକ୍ଷତା ବିକାଶ କେନ୍ଦ୍ର । ବୈଷୟିକ ତାଲିମ ପାଇଁ ଅନୁଗୁଳ ଏବଂ ଭୁବନେଶ୍ୱରରେ ଗୋଟିଏ ଲେଖାଏଁ ପ୍ରତିଷ୍ଠାନ ନିର୍ମାଣ ହୋଇଥିବା ବେଳେ ଆଗକୁ ଆହୁରି ୫ଟି ପ୍ରତିଷ୍ଠାନ ସ୍ଥାପନ ହେବ । ସେହିପରି ଦକ୍ଷତା ବିକାଶ ପାଇଁ ରାଜ୍ୟରେ ପ୍ରତିଷ୍ଠା ହେବା ୭୪ଟି ସ୍କିଲ୍ଡ ଡେଭଲପମେଂଟ୍ ସେଂଟର ପ୍ରତିଷ୍ଠା କରାଯିବା ନେଇ ସୂଚନା ଦିଆଯାଇଛି ।ସେହିପରି ଓଡ଼ିଶାରେ ସ୍କିଲ୍ଡ ୟୁନିଭର୍ସିଟି ପ୍ରତିଷ୍ଠା ପାଇଁ ମଧ୍ୟ ଲକ୍ଷ୍ୟ ରଖାଯାଇଥିବା ସୂଚନା ଦିଆଯାଇଛି ।
ଆଜି ଏହି କନକ୍ଲେଭର ଉଦ୍ୟାପନୀ ଦିବସରେ ମୁଖ୍ୟମନ୍ତ୍ରୀ ଏଥିରେ ଅଂଶଗ୍ରହଣ କରିଥିବା ଶିଳ୍ପପତି ଏବଂ ପ୍ରତିଷ୍ଠାନ ଗୁଡ଼ିକୁ ଧନ୍ୟବାଦ ଜଣାଇବା ସହ ପୁଂଜି ନିବେଶ କ୍ଷେତ୍ରରେ ସରକାରଙ୍କ ପୂର୍ଣ୍ଣ ସହଯୋଗ ରହିବ ବୋଲି କହିଛନ୍ତି । ସେହିପରି ଆସନ୍ତା ୨୦୧୮ ମସିହାରେ ପୁଣି ଥରେ ମେକ୍ ଇନ୍ ଓଡ଼ିଶା କନକ୍ଲେଭର ଆୟୋଜନ କରାଯିବା ନେଇ ସୂଚନା ଦିଆଯାଇଛି ।
ସେପଟେ ମୁଖ୍ୟମନ୍ତ୍ରୀ ଦେଖାଇଥିବା ଏହି ସ୍ୱପ୍ନକୁ ଭିନ୍ନ ଢ଼ଙ୍ଗରେ ଦେଖିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । କିଛିତଥ୍ୟ ଦେଇ ଧର୍ମେନ୍ଦ୍ର କହିଛନ୍ତି ୨୦୧୧ ଜନଗଣନା ଅନୁସାରେ, ୨୦ରୁ ୩୫ ବର୍ଷ ବୟସର ବେକାର ଓଡିଶା ଯୁବକ ଯୁବତୀଙ୍କ ସଂଖ୍ୟା ଥିଲା ୧ କୋଟି ୪ ଲକ୍ଷ । ଯାହା ୨୦୧୬ ସୁଦ୍ଧା ୧ କୋଟି ୨୫ ଲକ୍ଷ ହୋଇଯାଇଛି । ଏମାନଙ୍କୁ ନିଯୁକ୍ତି ଦେଲେ ଭିଜନ୍ ୨୦୩୬ର ସ୍ୱପ୍ନ ସଫଳ ହେବ ବୋଲି କଟାକ୍ଷ କରିଛନ୍ତି ଧର୍ମେନ୍ଦ୍ର ପ୍ରଧାନ ।
ତେବେ କେନ୍ଦ୍ର କୋଇଲା ମନ୍ତ୍ରୀ ପିୟୁଷ ଗୋୟଲ ରାଜ୍ୟ ସରକାରଙ୍କ ଉଦ୍ୟମକୁ ପ୍ରଶଂସା କରିଛନ୍ତି । ଦେଶର ବିକାଶ ପାଇଁ ପୂର୍ବ ଭାରତର ବିକାଶ ପ୍ରଧାନମନ୍ତ୍ରୀ ମୋଦିଙ୍କ ମୁଖ୍ୟ ଲକ୍ଷ୍ୟ, ଆଉ ଏଥିରେ ଓଡିଶା ଏକ ପ୍ରମୁଖ ଭୂମିକା ନିର୍ବାହ କରୁଛି ବୋଲି ସେ କହିଛନ୍ତି ।
ଦେଶର ଏକ ପଛୁଆ ରାଜ୍ୟ ଭାବରେ ପରିଗଣିତ ହୁଏ ଓଡ଼ିଶା । ନିକଟରେ ଦାନମାଝୀ ପରି ପ୍ରସଙ୍ଗ ବିଶ୍ୱ ଦରବାରରେ ଓଡ଼ିଶାର ପରିଚୟକୁ ଆହୁରୀ ବିଗାଡ଼ି ଦେଇଛି । ଏସବୁ ଭିତରେ ନୂଆ ଆଶା ସଂଚାର କରିଛି ମେକ୍ ଇନ୍ ଓଡ଼ିଶା କନକ୍ଲେଭ । କିନ୍ତୁ ସବୁଠାରୁ ବଡ଼ ପ୍ରଶ୍ନ ହେଉଛି ଏସବୁ ପ୍ରତିଶ୍ରୁତି ପୁରଣ ହେବ ନା’ ପାଣିର ଗାର ପରି ମିଳେଇ ଯିବ ।