କୃଷି ଋଣ ଛାଡ : ମୋଦି ମନାକଲେ, ରାଜ୍ୟ ବିଜେପି ମଙ୍ଗୁଆଳଙ୍କ ଗ୍ରୀନ୍ ସିଗନାଲ
କନକ ବ୍ୟୁରୋ : ଦେଶରେ ଏବେ କୃଷି ଋଣ ଛାଡ ଏକ ଚର୍ଚ୍ଚିତ ପ୍ରସଙ୍ଗ ଭାବେ ଉଭା ହୋଇଛି । ଖାସକରି ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡରେ କଂଗ୍ରେସ ସରକାରକୁ ଆସିବା ପରେ କୃଷି ଋଣ ଛାଡ କରିବାକୁ ଘୋଷଣା କରିବା ପରେ ଏହା ଏବେ ଜାତୀୟ ତଥା ରାଜ୍ୟ ରାଜନୀତିରେ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ପାଲଟିଛି । ଆଉ ଏସବୁ ଭିତରେ କୃଷି ଋଣ ପ୍ରସଙ୍ଗକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବଡ ବୟାନ ଦେଇଛନ୍ତି । କୃଷି ଋଣ ଛାଡ ଚାଷୀଙ୍କ ସମସ୍ୟାର ସମାଧାନର ବାଟ ନୁହେଁ । ନୂଆବର୍ଷରେ ମୋଦିଙ୍କ ଏହି ବୟାନ ସାମ୍ନାକୁ ଆସିବା ପରେ ସ୍ପଷ୍ଟ ହୋଇଯାଇଛି ଯେ, କୃଷି ଋଣ ଛାଡ ପ୍ରସଙ୍ଗରେ ପ୍ରଧାନମନ୍ତ୍ରୀ ମୋଦି ଓ ରାଜ୍ୟ ବିଜେପିର ରାସ୍ତା ସମ୍ପୂର୍ଣ୍ଣ ଅଲଗା ।
Kanak News is now on WhatsApp
Join and get latest news updates delivered to you via WhatsApp
ନିର୍ବାଚନୀ ବର୍ଷରେ ମୋଦି କୃଷି ଋଣ ଛାଡ କରିବା ସପକ୍ଷରେ ନାହାନ୍ତି ଏକଥା ତାଙ୍କ ବୟାନ ହିଁ ସ୍ପଷ୍ଟ କରୁଛି । ମୋଦି କହିଛନ୍ତି, କୃଷି ଋଣ ଛାଡ କରିବା କୃଷକଙ୍କ ସମସ୍ୟାର ସବୁଦିନିଆ ସମାଧାନ ନୁହେଁ । ବାରମ୍ବାର କୃଷି ଋଣ ଛାଡ କରାଯିବାପରେ ମଧ୍ୟ ଚାଷୀ ପୁଣି ଋଣୀ ହୋଇଯାଉଛି । ତେଣୁ ଏହା ପଛର କାରଣ ଖୋଜିବାକୁ ପଡିବ । ସେଥିପାଇଁ ଦୀର୍ଘକାଳିନ ଯୋଜନା କରିବାକୁ ପଡିବ । କୃଷକଙ୍କ ସମସ୍ୟାର ସମାଧାନ ପାଇଁ ବିହନ ଠାରୁ ବଜାର ପର୍ଯ୍ୟନ୍ତ ଆମ ସରକାର ବିଭିନ୍ନ ଯୋଜନା କରିଛି । କିନ୍ତୁ ନିର୍ବାଚନ ଜିତିବାକୁ ଏବେ କୃଷି ଋଣ ଛାଡ ସବୁଠୁ ବଡ ଟ୍ରମ୍ପକାର୍ଡ ପାଲଟିଛି । କିନ୍ତୁ ଏହା କୃଷକଙ୍କ ସମସ୍ୟାର ସବୁଦିନିଆ ସମାଧାନ ନୁହେଁ ବୋଲି କହିଛନ୍ତି ମୋଦି ।
ଗୋଟିଏ ପଟେ ମୋଦି କୃଷି ଋଣ ଛାଡ ସପକ୍ଷରେ ନଥିବା ବେଳେ ଅନ୍ୟପଟେ କିନ୍ତୁ ରାଜ୍ୟ ବିଜେପି କୃଷି ଋଣ ଛାଡ କରିବା ପାଇଁ ରାଜ୍ୟ ସରକାରଙ୍କୁ ଟାର୍ଗେଟ କରୁଛି । ଏପରିକି କୃଷି ଋଣ ଛାଡ ପ୍ରସଙ୍ଗରେ ବଡ ଘୋଷଣା ମଧ୍ୟ କରିଛି ରାଜ୍ୟ ବିଜେପି । ୨୦୧୯ରେ ଓଡିଶାରେ ବିଜେପି କ୍ଷମତାକୁ ଆସିଲେ କୃଷିଋଣ ଛାଡ ହେବ । କୃଷକଙ୍କୁ ସୁଧମୁକ୍ତ ଋଣ ଦେବା ଲାଗି ବନ୍ଦୋବସ୍ତ କରାଯିବ ବୋଲି ରାଜ୍ୟ ବିଜେପି ସଭାପତି ବସନ୍ତ ପଣ୍ଡା ପୂର୍ବରୁ କହି ସାରିଛନ୍ତି । ଏପରିକି ଧର୍ମେନ୍ଦ୍ର ମଧ୍ୟ ନିଜକୁ ଏହି କୃଷି ଋଣ ଛାଡ ରେସରେ ସାମିଲ କରି ସାରିଛନ୍ତି । ଏସବୁ ଭିତରେ ମୋଦି ନିର୍ବାଚନ ଜିତିବା କୃଷି ଋଣ ଛାଡ କରିବା ସପକ୍ଷରେ ନଥିବା ବେଳେ ରାଜ୍ୟ ବିଜେପି ସରକାରକୁ ଆସିବା ପାଇଁ ଚାଷୀ ମାନଙ୍କୁ କୃଷି ଋଣ ଛାଡ କରିବାର ସ୍ୱପ୍ନ ଦେଖାଉଛି । ଯାହା ଦର୍ଶାଉଛି କୃଷି ଋଣ ଛାଡ ପ୍ରସଙ୍ଗରେ ମୋଦିଙ୍କ ରାସ୍ତା ଅଲଗା ଓ ରାଜ୍ୟ ବିଜେପିର ରାସ୍ତା ଅଲଗା ।
ଏହାଛଡା ମୋଦି କୃଷି ଋଣ ଛାଡ ସପକ୍ଷରେ ନଥିବା ବେଳେ ପୂର୍ବରୁ ନବୀନ ମଧ୍ୟ କୃଷି ଋଣ ଛାଡ ବଦଳରେ ଚାଷୀଙ୍କ ପାଇଁ କାଳିଆ ଯୋଜନାର ଆରମ୍ଭ କରିଛନ୍ତି । ଯେଉଁଥିରେ ଅଳ୍ପ କିଛି ନୁହେଁ ବରଂ ରାଜ୍ୟର ସମସ୍ତ ଚାଷୀଙ୍କୁ ଫାଇଦା ମିଳିବ । କିନ୍ତୁ ଏସବୁ ଭିତରେ କୃଷି ଋଣ ଛାଡ ପ୍ରସଙ୍ଗରେ ରାଜ୍ୟ ବିଜେପିର ନୀତିକୁ ନେଇ ଦ୍ୱନ୍ଦ ଉପୁଜିଛି । କାରଣ ଯେତେବେଳେ ଦଳର ଶୀର୍ଷ ନେତା କୃଷି ଋଣ ଛାଡ ସପକ୍ଷରେ ନାହାନ୍ତି ସେତେବେଳେ ରାଜ୍ୟ ବିଜେପି କିଭଳି ଛାତି ବାଡେଇ ସରକାରକୁ ଆସିଲେ କୃଷି ଋଣ ଛାଡ କରାଯିବ ବୋଲି କହୁଛି ତାହା ଆଶ୍ଚର୍ଯ୍ୟ କରୁଛି । କୃଷି ଋଣ ଛାଡ କରିବାର ସ୍ୱପ୍ନ ଦେଖାଇ ୨୦୧୯ ନିର୍ବାଚନୀ ବୈତରଣୀ ପାର ହେବାକୁ ଲକ୍ଷ୍ୟ ରଖିନି ତ ରାଜ୍ୟ ବିଜେପି ।