ହାଇପ୍ରୋଫାଇଲ ଆସନ ଗୁଡିକ ପାଇଁ ହେବ ହାଇଭୋଲଟେଜ ଲଢେଇ? ଭିଭିପାଟ ମେସିନରେ ଭୋଟର ଦେବେ ଉତ୍ତର । 

159

କନକ ବ୍ୟୁରୋ : ନିର୍ବାଚନୀ ମୈଦାନରେ ଚାଲିଛି କଡ଼ା ମୁକାବିଲା । କାହାକୁ କିଏ ଦେଉଛନ୍ତି ଟକ୍କର? କେଉଁ ଆସନରେ ହେବାକୁ ଯାଉଛି ବଡ ଲଢ଼େଇ? ୪ ଲୋକସଭା ଆସନରେ କାହା କାହା ମଧ୍ୟରେ ହେବ ବିଗ୍ ଫାଇଟ? ତାକୁ ନେଇ ଜନତାଙ୍କ ମଧ୍ୟରେ ଯେତିକି ଉକ୍ରଣ୍ଠା, ନେତାଙ୍କ ମଧ୍ୟରେ ସେତିକି ଆଶଙ୍କା । ବିଧାନସଭା ଲଢ଼େଇରେ ଶାସକ ଦଳର ନେତାଙ୍କୁ ଟକ୍କର ଦେଇ ପାରିବେ କି ବିରୋଧୀ ଦଳର ନେତା । ଏହାର ଉତ୍ତର ଆସନ୍ତାକାଲି ଭିଭିପାଟ ମେସିନରେ ଦେବେ ଭୋଟର ।

ବ୍ରହ୍ମପୁର ଲୋକସଭା। ରାଜ୍ୟ ରାଜନୀତିରେ ବେଶ ଗୁରୁତ୍ୱ ରଖୁଥିବା ଏହି ନିର୍ବାଚନୀ ମଣ୍ଡଳୀରେ ତିନି ପ୍ରମୁଖ ଦଳର ପ୍ରାର୍ଥୀଙ୍କ ହେବ ଭାଗ୍ୟ ପରୀକ୍ଷା । ନିର୍ବାଚନୀ ମଇଦାନରେ ରହିଛନ୍ତି ବିଜେଡି ପ୍ରାର୍ଥୀ ଚନ୍ଦ୍ରଶେଖର ସାହୁ । ଏହି ଆସନରୁ ତାଙ୍କୁ ଟକ୍କର ଦେଉଛନ୍ତି ବିଜେପିର ଭୃଗୁ ବକ୍ସିପାତ୍ର ଓ କଂଗ୍ରେସ ପ୍ରାର୍ଥୀ ଭି ଚନ୍ଦ୍ରଶେଖର ନାଇଡୁ ।

କଳାହାଣ୍ଡି ଲୋକସଭା । ପଶ୍ଚିମ ଓଡ଼ିଶାର ଏହି ଚର୍ଚ୍ଚିତ ନିର୍ବାଚନ ମଣ୍ଡଳୀରେ ହେଉଛି ତ୍ରିମୁଖୀ ଟକ୍କର । ବିଜେଡିର ପୁଷ୍ପେନ୍ଦ୍ର ସିଂଦେଓ, ବିଜେପି ପ୍ରାର୍ଥୀ ବସନ୍ତ ପଣ୍ଡା ଓ କଂଗ୍ରେସର ଭକ୍ତଚରଣ ଦାସଙ୍କ ମଧ୍ୟରେ ହେଉଛି ମୁକାବିଲା ।

ନବରଙ୍ଗପୁର ଲୋକସଭା । ଏହି ଲୋକସଭା ଆସନରେ ବାଜି ମାରିବାକୁ ତିନି ଦଳର ପ୍ରାର୍ଥୀ ତୟାର । ମଇଦାନରେ ରହିଛନ୍ତି ବିଜେଡି ପ୍ରାର୍ଥୀ ରମେଶ ମାଝି, କଂଗ୍ରେସ ପ୍ରାର୍ଥୀ ପ୍ରଦୀପ ମାଝି ଓ ବିଜେପି ପ୍ରାର୍ଥୀ ବଳଭଦ୍ର ମାଝି ।

କୋରାପୁଟ ଲୋକସଭା । କୋରାପୁଟ ଲୋକସଭା ଆସନରୁ ବିଜେଡି ପ୍ରାର୍ଥୀ ଭାବେ ଲଢ଼ୁଛନ୍ତି ସାଂସଦ ଝିନ ହିକ୍କାଙ୍କ ପତ୍ନୀ କୌଶଲ୍ୟା ହିକକା । ନିର୍ବାଚନୀ ମଇଦାନରେ ତାଙ୍କୁ ଟକ୍କର ଦେଉଛନ୍ତି ବିଜେପିର ଜୟରାମ ପାଙ୍ଗି ଓ କଂଗ୍ରେସର ସପ୍ତଗିରି ଉଲ୍ଲାକା ।

ପ୍ରଥମ ପର୍ଯ୍ୟାୟ ନିର୍ବାଚନରେ କେଉଁଠି ହେବ ବିଗ୍ ଫାଇଟ୍ ।

ଦିଗପହଣ୍ଡି ବିଧାନସଭା । ଏହି ବିଧାନସଭା ଆସନରେ ରହିଛନ୍ତି ବିଜେଡିର ହେଭିୱେଟ୍ ନେତା ସୂର୍ଯ୍ୟନାରାୟଣ ପାତ୍ର । ମନ୍ତ୍ରୀ ସୂର୍ଯ୍ୟନାରାୟଣ ପାତ୍ରଙ୍କୁ ଟକ୍କର ଦେଉଛନ୍ତି ଜଣାଶୁଣା ଅଭିନେତ୍ରୀ ତଥା ବିଜେପି ପ୍ରାର୍ଥୀ ପିଙ୍କି ପ୍ରଧାନ । ସେହିପରି ଏହି ଗୁରୁତ୍ୱପୂର୍ଣ୍ଣ ଆସନରେ କଂଗ୍ରେସର ପ୍ରାର୍ଥୀ ହୋଇଛନ୍ତି ପ୍ରଫୁଲ୍ଲ କୁମାର ପଣ୍ଡା ।

ଗୋପାଳପୁର ବିଧାନସଭା । ଏହି ଗୁରୁତ୍ୱପୂର୍ଣ୍ଣ ଆସନରେ ବିଜେଡି ପ୍ରାର୍ଥୀ ଭାବେ ମଇଦାନରେ ରହିଛନ୍ତିି ଦଳର ଟାଣୁଆ ନେତା ତଥା ମନ୍ତ୍ରୀ ରହିଥିବା ଡକ୍ଟର ପ୍ରଦୀପ ପାଣିଗ୍ରାହୀ । ଆଉ ତାଙ୍କୁ କଡା ଟକ୍କର ଦେବାକୁ ବିଜେପିର ବିଭୂତି ଭୂଷଣ ଜେନା ଓ କଂଗ୍ରେସର ଧର୍ମରାଜ ରେଡ୍ଡି ପ୍ରତିଦ୍ୱନ୍ଦିତା କରୁଛନ୍ତି ଗୋପାଳପୁର ବିଧାନସଭା ଆସନରୁ ।

ବ୍ରହ୍ମପୁର ବିଧାନସଭା । ଏହି ସମ୍ମାନଜନକ ବିଧାନସଭା ଆସନରୁ ବିଜେଡି ପ୍ରାର୍ଥୀ ବିକ୍ରମ ପଣ୍ଡାଙ୍କୁ ଟକ୍କର ଦେଉଛନ୍ତି ବିଜେପିର କାହ୍ନୁଚରଣ ପତି ଓ କଂଗ୍ରେସ ପ୍ରାର୍ଥୀ ଲିଙ୍ଗରାଜ ଚୌଧୁରୀ ।

ପାରଳାଖେମୁଣ୍ଡି ବିଧାନସଭା । ଗଜପତି ଜିଲ୍ଲାର ଏହି ଗୁରୁତ୍ୱପୂର୍ଣ୍ଣ ଆସନରେ ରାଜକୁମାରୀ କଲ୍ୟାଣୀ ଦେବୀଙ୍କୁ ପ୍ରାର୍ଥୀ କରିଛି ବିଜେଡି । କଲ୍ୟାଣୀ ଦେବୀଙ୍କୁ ଟକ୍କର ଦେଉଛନ୍ତି କଂଗ୍ରେସ ପ୍ରାର୍ଥୀ କେ. ସୂର୍ଯ୍ୟା ରାଓ ଏବଂ ବିଜେପି ପ୍ରାର୍ଥୀ କେ. ନାରାୟଣ ରାଓ ।

ଜୟପୁର ବିଧାନସଭା । ଏହି ଆସନରେ ପୁଣିଥରେ ସାମନା-ସାମନି ହେଉଛନ୍ତି ବିଜେଡି ପ୍ରାର୍ଥୀ ତଥା ପୂର୍ବତନ ମନ୍ତ୍ରୀ ରବିନାରାୟଣ ନନ୍ଦ ଓ କଂଗ୍ରେସ ପ୍ରାର୍ଥୀ ତଥା ଜୟପୁର ବିଧାୟକ ତାରାପ୍ରସାଦ ବାହିନୀପତି । ବିଜେପିରୁ ଗୌତମ ସାମନ୍ତରାୟ ଉଭୟ ପୁରୁଖା ନେତାଙ୍କୁ କଡା ଟକ୍କର ଦେବାକୁ ମୈଦାନକୁ ଓହ୍ଲାଇଛନ୍ତି ।

ମତାମତ

Your email address will not be published.