ହାତ ଟେକିଦେଲେ ସରକାର: ଏବେ କମିବନି ତେଲ ଦର । ଜିଏସଟି ପ୍ୟାନେଲ୍ ନେଟୱାର୍କ ମୁଖ୍ୟ କହିଲେ, ଏବେ ଜିଏସଟି ପରିସରକୁ ଆସିବ ନାହିଁ ପେଟ୍ରୋଲ-ଡିଜେଲ
କନକ ବ୍ୟୁରୋ: ବର୍ତ୍ତମାନ କମିବ ନାହିଁ ତେଲ ଦର । ପ୍ରତିଦିନ ପେଟ୍ରୋଲ ଓ ଡିଜେଲ ମୂଲ୍ୟରେ ବୃଦ୍ଧି ହେଉଥିବାବେଳେ ବର୍ତ୍ତମାନ ଏଥିରୁ ଆଶ୍ୱସ୍ତି ମିଳିବାର ନାହିଁ । କାରଣ ଜିଏସଟି ପ୍ୟାନେଲ ଟେଟୱର୍କ ମୁଖ୍ୟ ଥିବା ବିହାର ଉପମୁଖ୍ୟମନ୍ତ୍ରୀ ସୁଶୀଲ କୁମାର ମୋଦି କିଛି ଏହିଭଳି ସଂକେତ ଦେଇଛନ୍ତି । ଗୋଟିଏ ପଟେ ସେ କହିଛନ୍ତି ଯେ, ପେଟ୍ରୋଲ ଓ ଡିଜେଲ ଜିଏସଟି ପରିସରକୁ ଆସିଲେ ମଧ୍ୟ ମୂଲ୍ୟରେ ବିଶେଷ ଫରକ ଆସିବ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟ ପକ୍ଷରେ ବର୍ତ୍ତମାନ ଜିଏସଟି ପରିଧି ଭିତରକୁ ପେଟ୍ରୋଲିୟମ ପଦାର୍ଥ ଆଣିବାର ଯୋଜନା ନାହିଁ ବୋଲି ସେ ସୂଚନା ଦେଇଛନ୍ତି । କାରଣ ଦେଶରେ ଲାଗୁ ହୋଇଥିବା ଏକକ ଟିକସ ଜିଏସଟି ବ୍ୟବସ୍ଥାରେ ଯେପର୍ଯ୍ୟନ୍ତ ସ୍ଥିରତା ନଆସିଛି ସେ ପର୍ଯ୍ୟନ୍ତ ପେଟ୍ରୋଲ ଓ ଡିଜେଲ ଉପରେ ଜିଏସଟି ଲାଗୁ ନକରିବାକୁ ଜିଏସଟି କାଉନସିଲରେ ସ୍ଥିର ହୋଇଥିବା ସେ ସୂଚନା ଦେଇଛନ୍ତି ।
କିନ୍ତୁ ପେଟ୍ରୋଲିୟମ ବିଭାଗ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ବାରମ୍ବାର କହିଆସୁଛନ୍ତି ଯେ, ପେଟ୍ରୋଲ ଓ ଡିଜେଲ ଦର ଜିଏସଟି ପରିସରକୁ ଆସିଲେ ମୂଲ୍ୟରେ ହ୍ରାସ ଘଟିବ । ଗତ କିଛିଦିନ ହେଲା ପେଟ୍ରୋଲ ଓ ଡିଜେଲ ଦର ପ୍ରତିଦିନ ବଢିଚାଲିଥିବା ବେଳେ ଏହାକୁ ନେଇ ଗ୍ରାହକଙ୍କ ଭିତରେ ଅସନ୍ତୋଷ ବଢିବାରେ ଲାଗିଛି । ଆଉ ଅନ୍ତର୍ଜାତୀୟ ବଜାରରେ ଅସ୍ଥିରତାର ପ୍ରଭାବ ଭାରତୀୟ ବଜାରରେ ପଡୁଥିବା ସେ ସଫେଇ ଦେଇଥିଲେ ।