କନକ ବ୍ୟୁରୋ : ବିଜେପି-ପିଡିପି ମେଂଟ୍ ସରକାର ଭାଙ୍ଗିବା ପରେ ଜାମ୍ମୁକାଶ୍ମୀରରେ ରାଜ୍ୟପାଳ ଶାସନ ପ୍ରସ୍ତାବ ଉପରେ ମୋହର ମାରିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ । ଫଳରେ ରାଜ୍ୟର ଶାସନ ଭାର ଆସିଯାଇଛି ରାଜ୍ୟପାଳ ନରେନ୍ଦ୍ର ନାଥ ବୋରାଙ୍କ କାନ୍ଧକୁ । ପ୍ରଶାସନିକ ପରିଚାଳନା ପାଇଁ ଅମଲାତାନ୍ତ୍ରିକ ନିଯୁକ୍ତି ପ୍ରକ୍ରିୟା ବି ଆରମ୍ଭ ହୋଇଛି । ଆଉ ଏସବୁ ଭିତରେ ଜୋରଧରିଛି ଆରୋପ-ପ୍ରତ୍ୟୋରୋପ ରାଜନୀତି ।
Kanak News is now on WhatsApp
Join and get latest news updates delivered to you via WhatsApp
ବିଜେପି, ପିଡିପିର ହାତ ଛାଡ଼ିବା ଏବଂ ରାଷ୍ଟ୍ରପତି, ରାଜ୍ୟପାଳ ଶାସନର ପ୍ରସ୍ତାବ ଉପରେ ମୋହର ମାରିବା ପରେ ଜାମ୍ମୁ-କାଶ୍ମୀରର ଶାସନ ଦାୟିତ୍ୱ ଏବେ ନରେନ୍ଦ୍ର ନାଥ ବୋରାଙ୍କ ହାତରେ । ଶାସନ ବ୍ୟବସ୍ଥାକୁ ପୁଣି ଥରେ କ୍ରିୟାଶୀଳ କରିବାର ଗୁରୁଦାୟିତ୍ୱ ରାଜ୍ୟପାଳ ନରେନ୍ଦ୍ର ନାଥ ବୋରାଙ୍କ କାନ୍ଧରେ । ମେଂଟ ସରକାର ଭାଙ୍ଗିବା ପରେ ଯେଉଁ ସାମ୍ବିଧାନିକ ଅସ୍ଥିରତା ସୃଷ୍ଟି ହୋଇଛି, ତାକୁ ଅନ୍ତଃତ ୬ମାସ ଯାଏଁ, ରାଜ୍ୟପାଳ ଶାସନ ଜରିଆରେ ସ୍ଥିରତା ଆଣିବାକୁ ପ୍ର୍ରୟାସ ହେବ । ବଡ କଥା ହେଉଛି-ଜୁନ୍ ୨୭ ତାରିଖରେ ରାଜ୍ୟପାଳ ଏନଏନ୍ ବୋରାଙ୍କ କାର୍ଯ୍ୟକାଳ ଶେଷ ହେଉଥିବାରୁ ପୁଣି ଏକ ଅଡୁଆ ସ୍ଥିତି ସୃଷ୍ଟି ହେବାର ଆଶଙ୍କା ରହିଛି । ତେବେ ବିଜେପି ସୂତ୍ରରୁ ମିିଳିଥିବା ଖବର ଅନୁସାରେ ରାଜ୍ୟପାଳଙ୍କ କାର୍ଯ୍ୟକାଳକୁ ଆହୁରି ୩ରୁ ୬ ମାସ ଯାଏଁ ବୃଦ୍ଧି କରାଯାଇପାରେ ।
ସୂଚନା ଅନୁସାରେ, ଅନ୍ତତଃ ଅମରନାଥ ଯାତ୍ରା ଯାଏଁ କାର୍ଯ୍ୟକାଳ ବଢ଼ାଇବାକୁ କେନ୍ଦ୍ର ନେତୃତ୍ୱ ବିଚାର କରୁଥିବା ବେଳେ, ବ୍ୟବସ୍ଥାର ପରିଚାଳନା ପାଇଁ ଛତିଶଗଡ଼ ସରକାରର ଗୃହ ବିଭାଗର ଅତିରିକ୍ତ ମୁଖ୍ୟ ସଚିବଙ୍କୁ ନିଯୁକ୍ତି ଦିଆଯାଇଛି । ଏପଟେ ଜାମ୍ମୁକାଶ୍ମୀର ପ୍ରସଙ୍ଗରେ ବିଜେପିକୁ କାଠଗଡ଼ାରେ ଠିଆ କରିଛି କଂଗ୍ରେସ । କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଟ୍ୱିଟ୍ କରି ଲେଖିଛନ୍ତି- ବିଜେଡି-ପିଡିପିର ସୁବିଧାବାଦୀ ମେଂଟ ଯୋଗୁଁ ଜାମ୍ମୁ-କାଶ୍ମୀରରେ ଯବାନଙ୍କ ସମେତ ନିରୀହ ଜନତା ପ୍ରାଣ ହରାଇଛନ୍ତି । ୟୁପିଏ ସରକାର ସମୟରେ ହୋଇଥିବା ସବୁ ପ୍ରୟାସ ବୃଥା ହୋଇଯାଇଛି । ରାଜ୍ୟପାଳ ଶାସନରେ ବି ସେଇଆ ହେବ ।
କୌଣସି ରାଜ୍ୟରେ ସମ୍ବିଧାନିକ ଅସ୍ଥିରତା ସୃଷ୍ଟିହେଲେ ସମ୍ବିଧାନର ଧାରା ୩୫୬ରେ ଯେଉଁ ରାଷ୍ଟ୍ରପତି ଶାସନ ବ୍ୟବସ୍ଥା ରହିଛି, ଠିକ୍ ସେହିଭଳି ଜାମ୍ମୁ-କାଶ୍ମୀର ସମ୍ବିଧାନର ସେକ୍ସନ ୫୨ ଅନୁସାରେ ସେଠି ରାଜ୍ୟପାଳ ଶାସନର ବ୍ୟବସ୍ଥା ରହିଛି । ଏହା ଅନ୍ତତଃ ୬ ମାସ ଯାଏଁ ଚାଲିବ । ଏପଟେ ନେସନାଲ କନଫରେନ୍ସ ନେତା ଉମର ଅବଦୁଲ୍ଲା, ବିଧାନସଭାକୁ ଭଙ୍ଗ କରି ପୁଣି ଥରେ ନିର୍ବାଚନ କରିବା ସପକ୍ଷରେ ମତ ଦେଇଛନ୍ତି । ବଡ କଥା ହେଉଛି- ଯେଉଁ ଆତଙ୍କବାଦ ଏବଂ ଅରାଜକତା ପ୍ରସଙ୍ଗକୁ ନେଇ ବିଜେପି ମେଂଟରୁ ଓହରିଗଲା, ଏବେ ରାଜ୍ୟପାଳ ଶାସନ ଲାଗୁ ହେବା ପରେ ପୂର୍ବଭଳି ଜାମ୍ମୁକାଶ୍ମୀରେ ସେନାର କାର୍ଯ୍ୟାନୁଷ୍ଠାନ କରିବ ବୋଲି କହିଛନ୍ତି ସେନାମୁଖ୍ୟ ।
ଜାମ୍ମୁ-କାଶ୍ମୀର ହେଉଛି ଦେଶର ସେହି ରାଜ୍ୟ, ଯେଉଁଠି ସର୍ବାଧିକ ଥର ଏହି ରାଜ୍ୟପାଳ ଶାସନ ଲାଗୁ ହୋଇଛି । ଇତି ମଧ୍ୟରେ ୮ ଥର ଏହି ରାଜ୍ୟରେ ରାଜ୍ୟପାଳ ଶାସନ ଲାଗୁ ହୋଇଛି । ତେଣୁ ରାଜ୍ୟପାଳ ଶାସନ ସହ ଅଭ୍ୟସ୍ତ ଥିବା ଜାମ୍ମୁ-କାଶ୍ମୀର ବାସିନ୍ଦା କେବେ ସ୍ୱାଭାବିକ୍ ସ୍ଥିତିକୁ ଫେରୁଛନ୍ତି ତାହା ଦେଖିବାର କଥା ।