ଶୁଣିଲେନି ପ୍ରଧାନମନ୍ତ୍ରୀ, ଚାଲିଗଲା ଜୀବନ । ଗଙ୍ଗା ନଦୀ ପାଇଁ ୧୧୧ ଧରି ଆମରଣ ଅନଶନ କରୁଥିବା ସନ୍ନ୍ୟାସୀ ଜ୍ଞାନ ସ୍ୱରୂପ ସାନନ୍ଦଙ୍କ ପରଲୋକ
ଗଙ୍ଗା ମାତା ପାଇଁ ଜୀବନ ହାରିଦେଲେ ସନ୍ନ୍ୟାସୀ ଜ୍ଞାନ ସ୍ୱରୂପ ସାନନ୍ଦ ତଥା ପ୍ରଫେସର ଜିଡି ଅଗ୍ରୱାଲ । ଦେଶର ପବିତ୍ର ଗଙ୍ଗା ନଦୀର ସମସ୍ୟାକୁ ନେଇ ଆମରଣ ଅନଶନରେ ବସିଥିବା ପରିବେଶବିତ୍ ଜିଡି ଅଗ୍ରୱାଲଙ୍କ ନିଧନ ହୋଇଯାଇଛି । ହରିଦ୍ୱାରରୁ ଦିଲ୍ଲୀ ଅଣାଯିବା ସମୟରେ ତାଙ୍କର ମୃତ୍ୟୁ ହୋଇଥିବା ଜଣାପଡିଛି । ଆଉ ଏହି ଖବର ସାମ୍ନାକୁ ଆସିବା ପରେ ଦେଶରେ ଶୋକର ଛାୟା ଖେଳି ଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ପେଶାରେ ଆଇଆଇଟି ପ୍ରଫେସର ଥିବା ଜିଡି ଅଗ୍ରୱାଲ ଗଙ୍ଗା ନଦୀରେ ହେଉଥିବା ବେଆଇନ ଖନନ, ବନ୍ଧ ନିର୍ମାଣ ଏବଂ ଏହାକୁ ପ୍ରଦୂଷଣ ମୁକ୍ତ ରଖିବାକୁ ଆମରଣ ଅନଶନରେ ବସିଥିଲେ । ସ୍ୱାମୀ ସାନନ୍ଦ ପୂର୍ବରୁ ମଧ୍ୟ ଗଙ୍ଗା ନଦୀ ସହ ଜଡିତ ବିଭିନ୍ନ ସମସ୍ୟା ସର୍ମ୍ପକରେ ସରକାରଙ୍କୁ ଅବଗତ କରିଥିଲେ । ଏପରିକି ଚଳିତ ବର୍ଷ ଫେବ୍ରଆରୀ ମାସରେ ପ୍ରଧାନମନ୍ତ୍ରୀଙ୍କୁ ପତ୍ର ଲେଖି ଗଙ୍ଗା ନଦୀ ପାଇଁ ସ୍ୱତନ୍ତ୍ର ଆଇନ କାନୁନ କରିବାକୁ ଦାବି କରି ଆସୁଥିଲେ । କିନ୍ତୁ ବାରମ୍ବାର କହିବା ସତ୍ତେ୍ୱ ମଧ୍ୟ ସରକାର ତାଙ୍କ କଥା ପ୍ରତି କର୍ଣ୍ଣପାତ ନ କରିବାରୁ ୮୬ ବର୍ଷୀୟ ସ୍ୱାମୀ ସାନନ୍ଦ ୨୨ ଜୁନରୁ ଆମରଣ ଅନଶନରେ ବସିଥିଲେ । ଏପରିକି ଏହି ସମୟରେ ଦୁଇ କେନ୍ଦ୍ରମନ୍ତ୍ରୀ ଉମା ଭାରତୀ ଓ ନୀତିନ ଗଡକରୀ ତାଙ୍କୁ ଅନଶନ ଭଙ୍ଗ କରିବାକୁ ଅପିଲ କରିଥିଲେ । ଯାହାକୁ ମାନି ନଥିଲେ ସାନେ ସ୍ୱାମୀ ସାନନ୍ଦ । ଦୀର୍ଘ ୧୧୧ ଦିନ ଆମରଣ ଅନଶନରେ ବସିବା ପରେ ତାଙ୍କର ପରଲୋକ ହୋଇଛି ।
ଏହା ପୂର୍ବରୁ ମଧ୍ୟ ଜ୍ଞାନ ସ୍ୱରୂପ ସାନନ୍ଦ ଗଙ୍ଗା ସଫା କରିବାକୁ ନେଇ ୨୦୧୨ରେ ଆମରଣ ଅନଶନରେ ବସିଥିଲେ । ସେତେବେଳେ ସରକାରଙ୍କ ପକ୍ଷରୁ ତାଙ୍କ ଦାବି ମାନି ନେବାକୁ ପ୍ରତିଶୃତି ମିଳିବା ପରେ ସେ ଅନଶନ ଭାଙ୍ଗି ଥିଲେ । ସ୍ୱାମୀ ଜ୍ଞାନ ସ୍ୱରୂପ ସାନନ୍ଦଙ୍କ ପୂର୍ବରୁ ୨୦୧୧ରେ ଗଙ୍ଗାର ସମସ୍ୟାକୁ ନେଇ ଅନଶନରେ ବସିଥିବା ସ୍ୱାମୀ ନିଗମାନନ୍ଦଙ୍କର ମଧ୍ୟ ମୃତ୍ୟୁ ହୋଇଥିଲା ।