କନକ ବ୍ୟୁରୋ : ଗଜପତି ଜିଲ୍ଲା ମୋହନାରେ ବିଭତ୍ସ ହତ୍ୟାକାଣ୍ଡ । ଜଣେ ସରପଂଚ ପ୍ରାର୍ଥିନୀଙ୍କୁ ଅପହରଣ ପରେ ଦୁଷ୍କର୍ମ କରିବା ସହ ହତ୍ୟା କରାଯାଇଥିବା ଅଭିଯୋଗ ହୋଇଛି । ମୋହନା ବ୍ଲକର ବାଘମାରୀ ପଂଚାୟତର ସରପଂଚ ପ୍ରାଥୀନୀ ୩୧ ବର୍ଷୀୟ ମିନି ଦଳବେହେରା ପ୍ରାର୍ଥୀପତ୍ର ଦାଖଲ କରିବାର ୨ ଦିନ ପରେ ନିଖୋଜ ହୋଇଯାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଗତ ୧୩ ତାରିଖରୁ ନିଖୋଜ ହେବା ପରେ ଗତକାଲି ତାଙ୍କ ଦରପୋଡା ଶବ ଚନ୍ଦ୍ରଗିରି ଫାଣ୍ଡି ଅଧୀନ ଜିରାଙ୍ଗ ବୌଦ୍ଧ ମନ୍ଦିର ନିକଟ ପାହାଡ ଉପରୁ ମିଳିଛି । ରାଜନୈତିକ ଷଡଯନ୍ତ୍ର କରି ବିପକ୍ଷ ଗୋଷ୍ଠୀ ତାଙ୍କ ଝିଅକୁ ମାରିଦେଇଛନ୍ତି ବୋଲି ଅଭିଯୋଗ କରିଛନ୍ତି ବାପା ପାଉଲ୍ ।
ପ୍ରାଥମିକ ତଦନ୍ତରୁ ମିନିଙ୍କ ସହ ଦୁଷ୍କର୍ମ ଓ ପରେ ହତ୍ୟା କରାଯାଇଥିବା ପୁଲିସ ସନ୍ଦେହ କରିଛି । ଗତକାଲି ସକାଳୁ ଛେଳି ଚରାଳିମାନେ ଦରପୋଡା ଶବ ଦେଖି ପୁଲିସକୁ ଖବର ଦେଇଥିଲେ । ଖବର ପାଇ ଗଜପତି ଏସପି ପହଁଚି ତଦନ୍ତ କରିଥିଲେ । ସନ୍ଧ୍ୟାରେ ସନ୍ଧାନୀ କୁକୁର, ଫରେନସିକ୍ ଟିମ୍ ଆସି ତଦନ୍ତ କରି ଫେରିଛି ।
ଏହି ଘଟଣା ପରେ ସ୍ଥାନୀୟ ଅଂଚଳରେ ଉତ୍ତେଜନା ଲାଗି ରହିଛି । ପଂଚାୟତ ନିର୍ବାଚନ ବାତିଲ କରିବା ସହ ଅଭିଯୁକ୍ତକୁ ତୁରନ୍ତ ଗିରଫ କରିବା ପାଇଁ ଗ୍ରାମବାସୀ ଦାବି କରିଛନ୍ତି । ମିଳିଥିବା ସୂଚନା ଅନୁଯାୟୀ ମିନି ୧୧ତାରିଖରେ ନାମାଙ୍କନପତ୍ର ଦାଖଲ କରିଥିଲେ ଏବଂ ୧୩ତାରିଖରେ ଚନ୍ଦ୍ରଗିରି କାନାରା ବ୍ୟାଙ୍କ ଶାଖାକୁ ଟଙ୍କା ଉଠାଇବାକୁ ଯାଇ ଆଉ ଫେରିନଥିଲେ ।