କନକ ବ୍ୟୁରୋ : ନବୀନଙ୍କ ରାସ୍ତାରେ ଗଲେ ମୋଦି । ଆଗାମୀ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ମୋଦି ଖେଳିଲେ କୃଷକ କାର୍ଡ଼ । ବଜେଟରେ କୃଷକଙ୍କୁ ଆକର୍ଷିତ କରିବା ପାଇଁ ବଡ଼ ଘୋଷଣା କରିଛନ୍ତି ମୋଦି ସରକାର । ବଜେଟରେ ହୋଇଥିବା ଘୋଷଣା ଅନୁସାରେ ୨ ହେକ୍ଟରରୁ କମ୍ ଜମି ଥିବା ଚାଷୀଙ୍କୁ ବାର୍ଷିକ ୬ ହଜାର ଟଙ୍କାର ସହାୟତା ମିଳିବ । ତାହା ସମ୍ପୃକ୍ତ କୃଷକଙ୍କ ଜମାଖାତାରେ ସିଧାସଳଖ ଜମା ହେବ । ପିଏମ କିଷାନ ଯୋଜନାରେ ଲାଭ ପାଇବେ ଚାଷୀ । ପ୍ରଥମ କିସ୍ତିରେ ୨ ହଜାର ଟଙ୍କା ସିଧାସଳକ ଚାଷୀଙ୍କ ଖାତାକୁ ଯିବ । ୩ଟି କିସ୍ତିରେ ଏହି ଟଙ୍କା ଯୋଗାଇ ଦିଆଯିବ । ପିଛିଲା ଭାବେ ଏହି ବ୍ୟବସ୍ଥା ୨୦୧୮ ଡିସେମ୍ବର ୧ ତାରିଖରୁ ଲାଗୁ ହେବ। ଏଥିରେ ମୋଟ୍ ୧୨ କୋଟି କୃଷକ ଉପକୃତ ହେବେ।
Kanak News is now on WhatsApp
Join and get latest news updates delivered to you via WhatsApp
କୃଷକଙ୍କ ଖୁସି କରିବା ପାଇଁ ନବୀନଙ୍କ କାଳିଆ ଯୋଜନା ପରି ମୋଦି ସରକାର ବଜେଟରେ ଘୋଷଣା କରିଛନ୍ତି ବୋଲି ଚର୍ଚ୍ଚା ହେଉଛି । କାରଣ କୃଷକଙ୍କ ପାଇଁ କିଛି ଏପରି ଯୋଜନା କରିବା ପୂର୍ବରୁ ନବୀନ ସରକାର ରାଜ୍ୟର କୃଷକଙ୍କ ପାଇଁ ଏପରି ଯୋଜନାର ଶୁଭାରମ୍ଭ କରିସାରିଛନ୍ତି । ଓଡ଼ିଶାରେ ଏପରି ଯୋଜନା ଆରମ୍ଭ ହୋଇସାରିଛି । ଆଉ ଲୋକଙ୍କ ପାଖରେ ଟଙ୍କା ମଧ୍ୟ ପହଞ୍ଚିସାରିଛି । ନବୀନ ସରକାରଙ୍କ କାଳିଆ ଯୋଜନାରେ ପ୍ରଥମ ପର୍ଯ୍ୟାୟ ଟଙ୍କା ପ୍ରାୟ ୧୨ ଲକ୍ଷ ଚାଷୀଙ୍କ ଆକାଉଂଟକୁ ଆସିଯାଇଛି । ନବୀନ ସରକାରଙ୍କ ଏହି ଯୋଜନାର ଲକ୍ଷ୍ୟ ଥିଲା ୩୦ଲକ୍ଷରୁ ଅଧିକ କ୍ଷୁଦ୍ର ଓ ନାମମାତ୍ର ଚାଷୀ କିପରି ଉପକୃତ ହୋଇପାରିବେ । କାଳିଆ ଯୋଜନା ଅନୁସାରେ ପ୍ରତି ଚାଷୀ ପରିବାରକୁ ଉଭୟ ଖରିଫ ଓ ରବି ଫସଲ ପାଇଁ ୫ ହଜାର ଟଙ୍କା ସହାୟତା ଦିଆଯାଉଛି । ଭୂମିହୀନ ଚାଷୀ ପରିବାରକୁ ଆର୍ଥିକ ସହାୟତା ସହ ବୀମା ସୁରକ୍ଷା,ବିନା ସୁଧରେ ଫସଲ ଋଣ ଯୋଗାଇ ଦିଆଯାଉଛି ।
ପୂର୍ବରୁ କୃଷି ସଙ୍କଟ ଓ କୃଷକଙ୍କ ଅସୁବିଧା ମୁଦ୍ଦାରେ ଲଗାତାର ମୋଦି ସରକାର ବିରୋଧୀଙ୍କ ଟାର୍ଗେଟରେ ରହୁଥିଲେ । ମୋଦି ସରକାର ଦେଶର ମେରୁଦଣ୍ଡ କୁହାଯାଉଥିବା କୃଷକଙ୍କ ପାଇଁ କିଛି କରୁନାହାନ୍ତି ବୋଲି ବାରମ୍ବାର ସମାଲୋଚନାର ଶିକାର ହେଉଥିଲେ । ଆଉ ଏହାକୁ ଦୃଷ୍ଟିରେ ରଖି ମୋଦି ସରକାର ଶେଷ ବଜେଟରେ କୃଷକଙ୍କ ପାଇଁ ବଡ଼ ଘୋଷଣା କରିଛନ୍ତି । ସୂଚନାଯୋଗ୍ୟ ହିନ୍ଦି ବେଲ୍ଟର ୩ ପ୍ରମୁଖ ରାଜ୍ୟ ବିଜେପି ହାତରୁ ଖସିଗଲା । ଆଉ ଲୋକସଭା ନିର୍ବାଚନ ପୂର୍ବରୁ ବିଜେପିକୁ ଶକ୍ତ ଧକ୍କା ଦେଇଥିଲା । ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡ଼ରେ ବିଜେପିକୁ ଧୂଳି ଚଟାଇବା କଂଗ୍ରେସ ।
କୃଷକଙ୍କୁ ଋଣଛାଡ଼ ପ୍ରତିଶ୍ରୁତି ଦେଇ ବାଜିମାରିନେଲା କଂଗ୍ରେସ । ତେବେ କଂଗ୍ରେସ ଯେ କେବଳ ପ୍ରତିଶ୍ରୁତି ଦେଇଥିଲା ତା’ନୁହେଁ ନିର୍ବାଚନ ଜିତିବା ପରେ ଋଣ ଛାଡ଼ ପ୍ରତିଶ୍ରୁତିକୁ ପାଳନ ମଧ୍ୟ କରିଥିଲା । ତିନି ବିଜେପି ସତ୍ତାରୂଢ଼ ରାଜ୍ୟରେ କାମ କଲାନି ମୋଦି ଲେହେର । ଏସବୁ ପରେ ମୋଦି ସରକାର ଆଗାମୀ ନିର୍ବାଚନ ପାଇଁ ଖେଳିଛନ୍ତି କୃଷକ କାର୍ଡ଼ । ଆଗାମୀ ଲୋକସଭା ନିର୍ବାଚନରେ କୃଷକଙ୍କୁ ଫୋକସରେ ରଖି ତିଆରି କରିଛନ୍ତି ଚଳିତ ବଜେଟ୍ ।
ସୂଚନାଯୋଗ୍ୟ ନବୀନ ସରକାରଙ୍କ କାଳିଆ ଯୋଜନା ପରି ମୋଦି ସରକାର ଚଳିତ ବଜେଟରେ ଘୋଷଣାଳଅନୁସାରେ କୃଷକଙ୍କ ଆକାଉଂଟକୁ ସିଧାସଳଖ ଟଙ୍କା ଯିବ । ତେବେ ଏପରି କିଛି ସ୍କିମ ଦେଶର କିଛି ରାଜ୍ୟରେ ପୂର୍ବରୁ ଚାଲୁଅଛି । ତେଲେଙ୍ଗାନାର ଚନ୍ଦ୍ରଶେଖର ରାଓ ସରକାର ରାୟତୁ ବନ୍ଧୁ ଯୋଜନା ଅନୁସାରେ କୃଷିରେ ନିବେଶ-ଖାଦ, ବିହନ, କୀଟନାଶକ ଆଦିରେ ସହାୟତା ଯୋଗାଇବା ପାଇଁ ୪୦୦୦ ହଜାର ପ୍ରତି ଏକରରେ ପ୍ରଦାନ କରୁଛିନ୍ତି । ସେହିପରି ଝାଡରଖଣ୍ଡରେ ସରକାର ଚଳିତ ବିତ୍ତ ବର୍ଷରେ ୨୩ ଲକ୍ଷ ମଧ୍ୟମ ଓ ସୀମାନ୍ତ କୃଷକଙ୍କୁ ପ୍ରତିମାସ ୫୦୦୦ ଟଙ୍କା ପ୍ରତି ପ୍ରଦାନ କରୁଛନ୍ତି । ପଶ୍ଚିମବଙ୍ଗ ସରକାର ମଧ୍ୟ କୃଷକଙ୍କ ପାଇଁ କିଛି ଏପରି ଯୋଜନା କରିଛନ୍ତି ।