କନକ ବ୍ୟୁରୋ : ଦେବସ୍ନାନ ପୂର୍ଣ୍ଣିମାରେ ୧୦୮ ଗରା ଜଳରେ ମହାସ୍ନାନ କରିବାପରେ ଜରରେ ପଡିଛନ୍ତି ମହାବାହୁ । ଆଜିଠୁ ଆଉ ନିଜର ପ୍ରିୟ କାଳିଆ ଠାକୁରଙ୍କୁ ଦର୍ଶନ କରିପାରିବେ ନାହିଁ ଭକ୍ତ । ଅତ୍ୟଧିକ ସ୍ନାନ କରିବା ପରେ ଜରରେ କାଳିଆ ସାଆନ୍ତ । କାଲି ଦେବସ୍ନାନ ମଣ୍ଡପରେ ମହାସ୍ନାନ କରିବା ପରେ ହାତିବେଶର ଦର୍ଶନ ଦେଇଥିଲେ ବଡଭାଇ ବଳଭଦ୍ର ଓ ସାନ ଭାଇ ଜଗନ୍ନାଥ । ଏହି ନୀତି ଦେଖିବା ପାଇଁ ଭକ୍ତଙ୍କ ମନରେ ଅଶୁମାରି ଆଶା ରହିଥିଲା । ଆଶା ରହିବା ମଧ୍ୟ ସ୍ୱାଭାବିକ । କାରଣ ପ୍ରତିଦିନ ଗର୍ଭ ଗୃହରେ ଦର୍ପଣ ଜରିଆରେ ମହାସ୍ନାନ କରନ୍ତି ଚତୁର୍ଦ୍ଧାମୂରତି ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ କାଲି ଗୋଟିଏ ଦିନ ଥିଲା ଯେଉଁ ଦିନରେ ସମସ୍ତଙ୍କ ସମ୍ମୁଖରେ ୧୦୮ ଗରା ଜଳରେ ମହାସ୍ନାନ କରିଛନ୍ତି ଠାକୁର । ଏହି ନୀତି କେବଳ ପୁରୀରେ ନୁହେଁ ବରଂ ଦେଶ ଓ ବିଦେଶରେ ମଧ୍ୟ କରାଯାଏ । ନିଜ ନିଜର ପରମ୍ପରା ମୁତାବକ ବିଭିନ୍ନ ମନ୍ଦିରରେ ଏହା ସମ୍ପାଦନ କରାଯାଏ । ତେବେ ନଜର ପକାନ୍ତୁ ରାଜ୍ୟର କେତେ ପ୍ରମୁଖ ତଥା ଅନ୍ୟ ମନ୍ଦିର ଉପରେ ।
ପୁରୀରେ ଯେପରି ପ୍ରତିଦିନ ନୀତିକାନ୍ତି ହୋଇଥାଏ । ସେପରି ଠିକ କେନ୍ଦୁଝରରେ ମଧ୍ୟରେ ଦୈନଦୀନ ନୀତିକାନ୍ତି କରାଯାଏ । ସ୍ନାନମଣ୍ଡପ ଅବସରରେ ରତ୍ନବେଦୀରୁ ପ୍ରଥମେ ସୁଦର୍ଶନ ପରେ ବଡଭାଇ ବଳଭଦ୍ର, ସୁଭଦ୍ରା ଓ ଶେଷରେ ପ୍ରଭୁ କାଳିଆ ସାଆନ୍ତ ଜଗନ୍ନାଥ ପହଣ୍ଡି ବିଜେ କରିଥିଲେ । ଶୂନ୍ୟ ପହଣ୍ଡିରେ ଆସି ବିରାଜ ହୋଇଥିଲେ ଅଧା ବାଟରେ । କାରଣ ଏଠାରେ ଶୂନ୍ୟ ପହଣ୍ଡି ହେଉଥିବା କାରଣରୁ ଚକାଭିଡାର ଅଧିକ ମହତ୍ୱ ରହିଥାଏ ।
ତେବେ ଏହି ଚକାଭିଡା ପରେ ବାଟପହଣ୍ଡି ଭୋଗ ସହ ପୁଷ୍ପାଞ୍ଜଳି ହେବାର ବିଧି ରହିଛି । ଏହାପରେ ପହଣ୍ଡିଆ ସେବକମାନେ ପହଣ୍ଡି କରନ୍ତି ଶ୍ରୀଜିଉଙ୍କୁ । ଦେବସ୍ନାନ ମଣ୍ଡପରେ ପହଞ୍ଚିବା ପରେ ଯଥାବିଧି ପୂଜା ହେବା ପରେ ମହାସ୍ନାନ କରାଯାଏ । ଏହାପରେ ନିୟମ ଅନୁସାରେ ହାତୀବେଶ ମଧ୍ୟ କରାଯାଏ । ହେଲେ ଏହି ବେଶରେ ବ୍ୟତିକ୍ରମ ଦେଖାଯାଏ । ଅନ୍ୟ ସର୍ବତ୍ର ସୋଲ ଦ୍ୱାରା ପ୍ରସ୍ତୁତ ହେଉଥିବା ସାମଗ୍ରୀରେ ହାତିବେଶ ହେଉଥିବା ବେଳେ ଏଠାରେ ଅଁଳା ଓ ତୁଳସୀ ପତ୍ରରେ ହିଁ ଠାକୁରଙ୍କୁ ହାତିବେଶ କରାଯିବାର ବ୍ୟବସ୍ଥା ରହିଛି । ଏହି ବେଶ ଦେଖିବା ପାଇଁ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଥିଲା । ନିୟମ ଅନୁସାରେ ବିଳମ୍ବିତ ରାତ୍ରିରେ ଚତୁର୍ଦ୍ଧାମୂର୍ତୀଙ୍କୁ ଅଣସର ପିଣ୍ଡିକୁ ନିଆଯିବା ପରେ ଆରମ୍ଭ ହୋଇଥାଏ ଅଣସର ବା ଗୁପ୍ତନୀତି ।