ବାତ୍ୟା ପରର ସ୍ଥିତି ସୁଧାରିବାକୁ ପ୍ରୟାସ । ‘ଫୋନି’ ପ୍ରଭାବିତ କେଉଁ ଜିଲ୍ଲାରେ ନିୟୋଜିତ ଅଛନ୍ତି କେତେ ଟିମ୍, ତଥ୍ୟ ଦେଲେ ଏସଆରସି ।
କନକ ବ୍ୟୁରୋ: ବାତ୍ୟା ‘ଫୋନି’ରେ ଧ୍ୱସ୍ତ ବିଧ୍ୱସ୍ତ ହୋଇଯାଇଥିବା ଓଡ଼ିଶାକୁ ପୁନଃରୁଦ୍ଧାର କରିବା ପାଇଁ ରାଜ୍ୟ ସରକାରଙ୍କ ମାରାଥନ୍ ଅପରେସନ ଜାରି ରହିଛି । ଆଉ ଏହାକୁ ତ୍ୱରିତ ଭାପେ ସମ୍ପୂର୍ଣ୍ଣ କରିବା ପାଇଁ ଏନଡ଼ିଆରଏଫ, ଓଡ୍ରାଫ୍, ଅଗ୍ନଶମ ବାହିନୀ ଏବଂ ଓଏଫଡ଼ିସିର କର୍ମଚାରୀମାନେ ଦିନରାତି ଏକ କରି ପୁନଃରୁଦ୍ଧାର କାର୍ଯ୍ୟ କରୁଛନ୍ତି । ବିଶେଷ ଭାବେ ବାତ୍ୟାରେ ଅଧିକ ପ୍ରଭାବିତ ହୋଇଥିବା ରାଜ୍ୟର ୬ଟି ଜିଲ୍ଲାରେ କେଉଁ ଟିମ୍ କେତେ ପରିମାଣରେ ନିୟୋଜିତ ରହିଛନ୍ତି ସେନେଇ ତଥ୍ୟ ଦେଇଛନ୍ତି ଏସଆରସି ।
Kanak News is now on WhatsApp
Join and get latest news updates delivered to you via WhatsApp
ଏସଆରସି ବିଷ୍ଣୁପଦ ସେଠୀଙ୍କ ସୂଚନା ମୁତାବକ, ବାତ୍ୟା ‘ଫୋନି’ରେ ଅଧିକ ପ୍ରଭାବିତ ହୋଇଥିବା ପୁରୀ ଜିଲ୍ଲାରେ ଓଡ୍ରାଫ୍ ଟିମର ୯ଟି ୟୁନିଟ୍, ଏନଡ଼ିଆରଏଫର ୨୦ଟି ୟୁନିଟ୍, ଅଗ୍ନିଶମ ବିଭାଗ ତରଫରୁ ୫୮ଟି ଟିମ୍ ଏବଂ ଓଏଫଡ଼ିସି ତରଫରୁ ୯୦ଟି ଟିମ୍ ନିୟୋଜିତ ରହି ପୁନଃରୁଦ୍ଧାର କାର୍ଯ୍ୟ କରୁଛନ୍ତି । ସେହିଭଳି ଭୁବନେଶ୍ୱରରେ ଓଡ୍ରାଫ୍ ଟିମର ୭ଟି ୟୁନିଟ୍, ଏନଡ଼ିଆରଏଫର ୨୦ଟି ୟୁନିଟ୍, ଅଗ୍ନିଶମ ବିଭାଗ ତରଫରୁ ୯୦ଟି ଟିମ୍ ଏବଂ ଓଏଫଡ଼ିସି ତରଫରୁ ୧୨୦ଟି ଟିମ୍ ନିୟୋଜିତ ରହି କାର୍ଯ୍ୟ କରୁଛନ୍ତି ।
ସେହିଭଳି ଜଗତସିଂହପୁର କେବଳ ଏନଡ଼ିଆରଏଫର ୨ଟି ୟୁନିଟ୍ ଏବଂ ଅଗ୍ନିଶମ ବିଭାଗ ତରଫରୁ ୫ଟି ଟିମ୍ ପୁନଃରୁଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି । ଅନ୍ୟପଟେ ଖୋର୍ଦ୍ଧା ଜିଲ୍ଲାରେ ଓଡ୍ରାଫ୍ ଟିମର ୧ଟି ୟୁନିଟ୍, ଏନଡ଼ିଆରଏଫର ୩ଟି ୟୁନିଟ୍, ଅଗ୍ନିଶମ ବିଭାଗ ତରଫରୁ ୩୨ଟି ଟିମ୍ ସହ ମୋଟ୍ ୩୬ଟି ରାସ୍ତାଘାଟ ପ୍ରତିବନ୍ଧକ ଦୂରୀକରଣ କାର୍ଯ୍ୟରେ ନିୟୋଜିତ ରହିଛନ୍ତି । ସେହିପରି କଟକ ଏବଂ ବାଲେଶ୍ୱରରେ ବିଭିନ୍ନ ବିଭାଗରୁ ମୋଟ୍ ୮୭ଟି ଟିମ୍ ନିୟୋଜିତ ରହିଛନ୍ତି । ତେବେ ବର୍ତ୍ତମାନ ସର୍ବ ମୋଟ୍ ୫୪୪ଟି ୟୁନିଟ୍ ଏବଂ ଟିମ୍ ପୁନଃରୁଦ୍ଧାର କାର୍ଯ୍ୟ ଜାରି ରଖିଛନ୍ତି ବୋଲି ଏସଆରସି ସୂଚନା ଦେଇଛନ୍ତି ।