ରାଜନୀତିକୁ ତତାଇଲା ତିତଲି ! ରାଜ୍ୟ ବିଜେପି ଖୁଣ ବାହାର କରୁଛି, କେନ୍ଦ୍ର ବିଜେପି ପ୍ରଂଶସାରେ ପୋତୁଛି
ତିତଲି: ଓଡିଶା ପାଇଲା କେନ୍ଦ୍ର ପ୍ରଂଶସା
କନକ ବ୍ୟୁରୋ : ତିତଲି ମୁକାବିଲାରେ ବିଫଳ ହୋଇଥିବା ଅଭିଯୋଗ କରି ରାଜ୍ୟ ସରକାରଙ୍କୁ ଟାର୍ଗେଟ କରି ଆସୁଛନ୍ତି ବିରୋଧୀ । ୭୭ ଲୋକ ପ୍ରାଣ ହରାଇଥିବା ଯୋଗୁଁ ସରକାର ବେଶ୍ ସମାଲୋଚନାର ଶିକାର ହୋଇଛନ୍ତି । ତେବେ ସରକାରଙ୍କ ବାତ୍ୟା ମୁକାବିଲାକୁ ପ୍ରଶଂସାରେ ପୋତି ଦେଇଛି କେନ୍ଦ୍ର । ସରକାରଙ୍କ ଆଗୁଆ ପଦକ୍ଷେପ ଓ ସଫଳ ବାତ୍ୟା ମୁକାବିଲା ନେଇ ଜାତୀୟ ବିପର୍ଯ୍ୟୟ ପରିଚାଳନା କର୍ତୃପକ୍ଷର ପତ୍ରିକା ‘ଆପଦା-ସମ୍ବାଦ’ରେ ପ୍ରଶଂସାପୂର୍ଣ୍ଣ ଆଲେଖ୍ୟ ପ୍ରକାଶ ପାଇଛି । ତେବେ ରାଜ୍ୟ ବିଜେପି କହିଛି, କାଗଜପତ୍ରରେ ମିଛ ଦର୍ଶାଇ ପ୍ରଶଂସା ପାଉଛନ୍ତି ସରକାର ।
Kanak News is now on WhatsApp
Join and get latest news updates delivered to you via WhatsApp
ତିତଲି ମୁକାବିଲାରେ ଫେଲ୍ ମାରିଥିବା ଅଭିଯୋଗ କରି ନବୀନ ସରକାରଙ୍କୁ ରାଜ୍ୟ ବିଜେପି ଘେରୁଥିବା ବେଳେ ସାମନାକୁ ଆସିଛି କେନ୍ଦ୍ର ସରକାରଙ୍କ ପ୍ରଶଂସାପୂର୍ଣ୍ଣ ଆଲେଖ୍ୟ । ଜାତୀୟ ବିପର୍ଯ୍ୟୟ ପରିଚାଳନା କର୍ତୃପକ୍ଷ (ଏନଡିଏମଏ) ପକ୍ଷରୁ ପ୍ରକାଶିତ ଡିଜିଟାଲ ପତ୍ରିକା ‘ଆପଦା-ସମ୍ବାଦ’ର ଚଳିତ ମାସର ସଂସ୍କରଣରେ ତିତଲି ମୁକାବିଲା ପରିଚାଳନାରେ ରାଜ୍ୟ ସରକାରଙ୍କ ତତ୍ପରତାକୁ ଢେର୍ ପ୍ରଶଂସା କରାଯାଇଛି । ତିତଲିର ପ୍ରକୋପରେ ୧୪୯ କିଲୋମିଟର ବେଗରେ ପବନ ଓଡ଼ିଶା ଭିତରକୁ ମାଡି ଆସିଥିଲା । ତେବେ ଜିରୋ କାଜୁଆଲିଟିର ଲକ୍ଷ୍ୟ ରଖି ୩ ଲକ୍ଷ ଲୋକଙ୍କୁ ଖାଲୁଆ ଅଂଚଳରୁ ସ୍ଥାନାନ୍ତର କରାଯାଇଥିବା ଆପଦା-ସମ୍ବାଦରେ ଉଲ୍ଲେଖ ରହିଛି ।
ଆପଦା-ସମ୍ବାଦରେ ଦର୍ଶାଯାଇଛି ଯେ ସ୍କୁଲ ଓ ଅଙ୍ଗନବାଡ଼ି ଛୁଟି ଘୋଷଣା, କିଛି ରୁଟରେ ଟ୍ରେନ୍ ଚଳାଚଳ ବାତିଲ, ଏନଡିଆରଏଫ୍ ଟିମକୁ ଆଲର୍ଟ କରି ସରକାର ଆଗୁଆ ପଦକ୍ଷେପ ନେଇଥିଲେ । ସରକାର ସମୟ ପୂର୍ବରୁ ପଦକ୍ଷେପ ନେଇ ବାତ୍ୟା ଓ ବାତ୍ୟା ପର ବନ୍ୟାର ସଫଳ ମୁକାବିଲା କରିଥିଲେ । ତିତଲିର ଭୟଙ୍କର ପ୍ରକୋପ ସତ୍ୱେ ସଫଳ ମୁକାବିଲା ଯୋଗୁଁ ୬୦ ଲକ୍ଷ ଲୋକ ପ୍ରଭାବିତ ହୋଇଥିଲେ ବି ମୃତ୍ୟୁ ସଂଖ୍ୟା ୭୭ ଅର୍ଥାତ୍ ଦୁଇ ଅଙ୍କରେ ସୀମିତ ରହିଥିଲା ବୋଲି ଏହି ପତ୍ରିକାରେ କୁହାଯାଇଛି । ରାଜ୍ୟ ସରକାରଙ୍କ ପ୍ରସ୍ତୁତି ଓ ବିଭିନ୍ନ ସଂସ୍ଥାକୁ ତ୍ୱରିତ ନିୟୋଜନ କରି ସଫଳ ମୁକାବିଲା କରିବା ଯୋଗୁଁ ଖୁବ କମ୍ ସମୟ ମଧ୍ୟରେ ସ୍ୱାଭାବିକ ସ୍ଥିତି ଫେରି ଆସିଥିଲା ବୋଲି କହିଛି ଆପଦା-ସମ୍ବାଦ ।
ଏନଡିଏମଏର ଏଭଳି ପ୍ରଶଂସାରେ ବିଜେଡି ଉଲ୍ଲସିତ ହୋଇଥିବା ବେଳେ ବିଜେପି କହିଛି, କାଗଜ କଲମରେ ବାତ୍ୟା ମୁକାବିଲା କରି ପ୍ରଶଂସା ସାଉଂଟିଛନ୍ତି ସରକାର । ତିତଲି ମୁକାବିଲା ନେଇ ରାଜନୈତିକ ବୟାନବାଜି ଚାଲିଥିବା ବେଳେ ଓଡ଼ିଶାର ପଦକ୍ଷେପକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଗଠିତ ଏମଡିଏମଏ ପ୍ରଶଂସା କରିବା ରାଜ୍ୟ ସରକାରଙ୍କୁ ବେଶ୍ ଉତ୍ସାହିତ କରିଛି ।