ରାଫେଲକୁ ନେଇ ମୋଦି ସରକାରଙ୍କୁ ମିଳିଲା ସିଏଜି ସାର୍ଟିଫିକେଟ୍ ! ୟୁପିଏ ଠାରୁ ଏନଡିଏର ଡିଲ୍ ୨ ପ୍ରତିଶତରୁ ଅଧିକ ଶସ୍ତା, ରିପୋର୍ଟକୁ କଂଗ୍ରେସର ପ୍ରତ୍ୟାଖାନ ।
କନକ ବ୍ୟୁରୋ : ରାଫେଲ ପ୍ରସଙ୍ଗରେ ମୋଦି ସରକାରଙ୍କୁ ସିଏଜିଙ୍କ କ୍ଲିନଚିଟ୍ । ଏନଡିଏ ସରକାର ୨ ଦଶମିକ୮୬ ପ୍ରତିଶତ ଶସ୍ତାରେ ଏହି ଲଢ଼ୁଆ ବିମାନ କିଣିଥିବା ତାଙ୍କ ରିପୋର୍ଟରେ କହିଛନ୍ତି ସିଏଜି । ହେଲେ ଏହି ରିପୋର୍ଟ ବିରୋଧୀଙ୍କୁ ସନ୍ତୁଷ୍ଟ କରିପାରି ନାହିଁ । ରାଫେଲ ଡିଲ୍ ନେଇ ଜେପିସି ତଦନ୍ତ ଦାବି କରି ସଂସଦ ପରିସରରେ ବିକ୍ଷୋଭ କରିଛି କଂଗ୍ରେସ । ସିଏଜି ରିପୋର୍ଟକୁ କଂଗ୍ରେସ ପ୍ରତ୍ୟାଖାନ କରିଥିବା ବେଳେ ଏପଟେ ସାମ୍ବାଦିକ ସମ୍ମଳନୀ କରି ମୋଦି ସରକାର ଉପରେ ବର୍ଷିଛନ୍ତି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ।
Kanak News is now on WhatsApp
Join and get latest news updates delivered to you via WhatsApp
ସଂସଦରେ ଉପସ୍ଥାପିତ ସିଏଜି ରିପୋର୍ଟକୁ ପ୍ରତ୍ୟାଖାନ କରିଛି କଂଗ୍ରେସ । ସିଏଜି ରାଜୀବ ମେହରିଶିଙ୍କ ନିରପେକ୍ଷତା ଉପରେ ପ୍ରଶ୍ନ ଉଠାଇଛି ଦଳ । ସେହିପରି ସିଏଜି ଦେଇଥିବା ରିପୋର୍ଟକୁ ଅଧା ପନ୍ତରିଆ କହିବା ସହ ରାଫେଲର ଚୂଡ଼ାନ୍ତ ଦାମ ଆହୁରି ଅଧିକ ହେବ ବୋଲି ଅଭିଯୋଗ କରିଛନ୍ତି କଂଗ୍ରେସର ଅଧ୍ୟକ୍ଷ ରାହୁଲ ଗାନ୍ଧୀ । ଫ୍ରାନ୍ସ ସହ ରାଫେଲ ଡିଲ ନେଇ ଉପସ୍ଥାପିତ ସିଏଜିଙ୍କ ରିପୋର୍ଟ ଏକ ପ୍ରକାର କ୍ଲିନଚିଟ୍ ଦେଇଛି ମୋଦି ସରକାରଙ୍କୁ । କାରଣ ରିପୋର୍ଟରେ କୁହାଯାଇଛି ୟୁପିଏ ସରକାରଙ୍କ ଡିଲ୍ ତୁଳନାରେ ମୋଦି ସରକାରଙ୍କ ଡିଲ୍ ଶସ୍ତା । ରାଫେଲ ସଂପର୍କରେ ତୁଳନାତ୍ମକ ଚିତ୍ର ଦେଇଛନ୍ତି ସିଏଜି ।
– ୨୦୦୭ ତୁଳନାରେ ୨୦୧୬ ଡିଲ ୨.୮୬% ଶସ୍ତା
– ଏନଡିଏ ସରକାର ଯୋଡିଛନ୍ତି ୬ଟି ନୂଆ ଫିଚର
– ୬ଟି ନୂଆ ଫିଚରରେ ୧୪ଟି ସାମଗ୍ରୀ ଯୋଡା ଯାଇଛି
– ସେଥିଭିତରୁ ୭ଟି ସାମଗ୍ରୀର ଦାମ୍ ଅଧିକ
– ୩ଟି ଦାମ୍ ୟୁପିଏ ସରକାରଙ୍କ ଡିଲ ସହ ସମାନ
– ୪ଟି ସାମଗ୍ରୀର ଦାମ୍ ପୂର୍ବ ଡିଲ ତୁଳନାରେ ବହୁତ୍ କମ
– ନୂଆ ଡିଲରେ ଶୀଘ୍ର ରାଫେଲ ବିମାନ ପାଇବ ଭାରତ
ୟୁପିଏ ଠାରୁ ୯ ପ୍ରତିଶତ କମ ଦାମରେ ରାଫେଲ କିଣିବାକୁ ଡିଲ କରାଯାଇଛି ବୋଲି ମୋଦୀ ସରକାରଙ୍କ ଦାବିକୁ ଅଗ୍ରାହ୍ୟ କରିଦେଇଛନ୍ତି ସିଏଜି । ତେବେ ଅଡିଟରଙ୍କ ରିପୋର୍ଟକୁ ନେଇ ମୁହାଁମୁହିଁ ହୋଇଛନ୍ତି ବିଜେପି ଓ କଂଗ୍ରେସ । ରାଫେଲ ସମ୍ବଦ୍ଧରେ ସିଏଜି ରିପୋର୍ଟ ଉପସ୍ଥାପିତ ହେବା ପରେ କାଗଜ ବିମାନ ଉଡାଇ କଂଗ୍ରେସ ପ୍ରତିବାଦ କରିଥିବା ବେଳେ କେନ୍ଦ୍ରମନ୍ତ୍ରୀ ଅରୁଣ ଜେଟଲୀ କହିଛନ୍ତି ସତ୍ୟର ଜୟ ହୋଇଛି ।
କଂଗ୍ରେସ ଓ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ବାରମ୍ବାର ଅଭିଯୋଗ କରିଆସୁଛନ୍ତି ଯେ, ଅନୀଲ ଅମ୍ବାନିଙ୍କୁ ଫାଇଦା ଦେବାପାଇଁ ୟୁପିଏ ସରକାର ଅମଳରେ ହୋଇଥିବା ଡିଲକୁ ପରିବର୍ତନ କରିଥିଲେ । ଶିଳ୍ପପତି ମିତ୍ରଙ୍କୁ ୩୦ ହଜାର କୋଟି ଟଙ୍କାର ଫାଇଦା ଦେବାକୁ ଏଭଳି ପରିବର୍ତନ କରାଯାଇଛି ବୋଲି ଅଭିଯୋଗ କରିଆସୁଛି କଂଗ୍ରେସ । ଲୋକସଭାରେ ଶେଷ ଅଧିବେସନର ଶେଷ ଦିନରେ କଂଗ୍ରେସ ଓ ରାହୁଲ ଗାନ୍ଧୀଙ୍କୁ ଜୋରଦାର ସମାଲୋଚନା କରିଛନ୍ତି ପ୍ରଧାନମନ୍ତ୍ରୀ । ଗୋଟିଏ ପଟେ ଲୋକସଭାରେ ମୋଦୀ ଅଭିଭାଷଣ ରଖୁଥିବା ବେଳେ ଅନ୍ୟପଟେ ପ୍ରେସମିଟ୍ ଡାକି ରାଫେଲ ଡିଲ୍ ନେଇ ସରକାରଙ୍କ ଉପରେ ବର୍ଷିଥିଲେ ରାହୁଲ୍ ।