ସାବାଡ ହେବେ ଫେରାର୍ ଆର୍ଥିକ ଠକ ! ଫୁଜିଟିଭ ଇକୋନୋମିକ ଅଫେଣ୍ଡର ବିଲକୁ କେନ୍ଦ୍ର କ୍ୟାବିନେଟର ମଂଜୁରୀ
କନକ ବ୍ୟୁରୋ: ଏଣିକି ବ୍ୟାଙ୍କକୁ ଠକି କୋଟି କୋଟି ଟଙ୍କା ଚଳୁ କରି ଫେରାର ହେବା ମହଙ୍ଗା ପଡିବ । ବ୍ୟାଙ୍କକୁ ଚୂନା ଲଗାଇ ଫେରାର ହୋଇ ଯାଉଥିବା ଶିଳ୍ପପତିଙ୍କୁ ରୋକିବା ପାଇଁ ଆସିବ କଠୋର ଆଇନ । ହଜାର ହଜାର କୋଟି ଟଙ୍କା ବ୍ୟାଙ୍କ ଠକେଇ କରି ବିଜୟ ମାଲ୍ୟା ଓ ନିରବ ମୋଦି ଭଳି ବଡ଼ ବଡ଼ ଶିଳ୍ପପତି ଫେରାର ହେବା ପରେ ଚେତା ପଶିଛି ସରକାରଙ୍କର । ଫୁଜିଟିଭ୍ ଇକୋନମିକ୍ ଅଫେଣ୍ଡର ବିଲ୍-୨୦୧୭କୁ ମିଳିଛି କେନ୍ଦ୍ର କ୍ୟାବିନେଟରେ ମଂଜୁରୀ । ଏହି ବିଲ୍ ଆଇନରେ ପରିଣତ ହେଲେ ବ୍ୟାଙ୍କକୁ ସୁରକ୍ଷା ମିଳିବ ଏବଂ କର୍ପୋରେଟ୍ ଋଣ ଖିଲାପକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ । ବିଲରେ ତଦନ୍ତକାରୀ ଏଜେନ୍ସିକୁ ଅଧିକ କ୍ଷମତା ଦିଆଯାଇଛି । ଋଣ ଖିଲାପକାରୀଙ୍କ ସଂପତି ଜବତ କରିବା ପାଇଁ ମଧ୍ୟ ଆଇନଗତ ବ୍ୟବସ୍ଥା ରହିଛି । ବିଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟରେ ଏହି ବିଲ୍ ସଂସଦରେ ଆଗତ ହେବା ସମ୍ଭାବନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ଏହି ଚିଠା ଆଇନ ଅନୁସାରେ, ଜଣେ ଫେରାର ଆର୍ଥିକ ଅପରାଧୀର ଅର୍ଥ ହେଉଛି ଯାହା ବିରୋଧରେ ଏକ ଆର୍ଥିକ ଠକେଇକୁ ନେଇ ଓ୍ଵାରେଣ୍ଟ ଜାରି ହୋଇଛି, କିନ୍ତୁ ସେ ଦେଶଛାଡି ପଳାଇଛି ଓ ଫେରିବାକୁ ମନା କରୁଛି । ଏପରି କ୍ଷେତ୍ରରେ ଭାରତରେ ଥିବା ତାହାର ସଂପତ୍ତିକୁ ଚିହ୍ନଟ କରି ଜବତ କରାଯାଇପାରିବ । ୧୦୦ କୋଟି ଟଙ୍କାରୁ ଅଧିକ ପରିମାଣ ଅନାଦେୟ ଋଣ ଥିବା ବ୍ୟକ୍ତିମାନଙ୍କ ସମ୍ପତ୍ତି ଜବତ କରାଯାଇପାରିବ । ପୁଣି ଯେଉଁମାନେ ଭାରତ ଛାଡି ପଳାଇଯିବାର ସମ୍ଭାବନା ରହିଛି ସେମାନଙ୍କୁ ଚିହ୍ନଟ କରି ଆଗୁଆ ସେମାନଙ୍କ ପାସପୋର୍ଟ ରଦ୍ଦ କରିଦିଆଯିବ । ଅନ୍ୟପକ୍ଷରେ ଅଡିଟର ଓ ଚାଟାର୍ଡ ଆକାଉଣ୍ଟାଣ୍ଟ ମାନଙ୍କୁ ନିୟନ୍ତ୍ରଣ କରିବାକୁ ଏକ ଜାତୀୟ ଫାଇନାନ୍ସିଆଲ ରିପୋର୍ଟିଂ ଅଥରିଟି (ଏନଏଫଆରଏ) ଗଠନ କରିବାକୁ ନିଷ୍ପତ୍ତି ହୋଇଛି ।