ଓଡ଼ିଶାରେ ଅଟୋମୋବାଇଲ ସେକ୍ଟରରେ ପଡିନି ଆର୍ଥିକ ମାନ୍ଦାବସ୍ଥାର ପ୍ରଭାବ, ଗତବର୍ଷ ଅପେକ୍ଷା ଅଧିକ ରାଜସ୍ୱ ଆଦାୟ କଲା ପରିବହନ ବିଭାଗ ।
କନକ ବ୍ୟୁରୋ : ଓଡ଼ିଶା ଉପରେ ପଡିନି ଆର୍ଥିକ ମାନ୍ଦାବସ୍ଥାର ପ୍ରଭାବ । ସାରା ଦେଶରେ ଯେତେବେଳେ ଆର୍ଥିକ ମାନ୍ଦାବସ୍ଥା ଯୋଗୁଁ ଅଟୋମୋବାଇଲ ସେକ୍ଟରରେ ହାହାକାର ପଡିଛି ସେତେବେଳେ ଓଡ଼ିଶା କରିଛି ନୂଆ ରେକର୍ଡ । ଆର୍ଥିକ ମାନ୍ଦାବସ୍ଥା ସତ୍ତେ୍ୱ ମଧ୍ୟ ପରିବହନ ବିଭାଗ ପୂର୍ବବର୍ଷ ଅପେକ୍ଷା ଅଧିକ ଟଙ୍କା ରାଜସ୍ୱ ଆଦାୟ କରିଛି । ଯାହା ଦର୍ଶାଉଛି ଓଡ଼ିଶା ଉପରେ ମାନ୍ଦାବସ୍ଥାରେ ସେମିତି ଖାସ୍ ପ୍ରଭାବ ପଡିନି ।
Kanak News is now on WhatsApp
Join and get latest news updates delivered to you via WhatsApp
ଗତ ୧୦ ମାସ ହେବ ଦେଶର ଅଟୋମୋବାଇଲ ସେକ୍ଟରରେ ଆର୍ଥିକ ମାନ୍ଦାବସ୍ଥାର ବଡ ଧରଣର ପ୍ରଭାବ ଦେଖିବାକୁ ମିଳିଛି । ଉଭୟ ଚାରି ଚକିଆ ଓ ଦୁଇ ଚକିଆ ଗାଡି ବିକ୍ରି କମିଥିବା ବେଳେ ଅଟୋମୋବାଇଲ ସେକ୍ଟର କ୍ଷତିରେ ଚାଲିଛି । ଏପରିକି ଅଟୋମୋବାଇଲ ଇଣ୍ଡଷ୍ଟ୍ରିରେ ଆର୍ଥିକ ମାନ୍ଦାବାସ୍ଥାକୁ ଦେଖି କିଛି କମ୍ପାନି କର୍ମଚାରୀଙ୍କୁ ଛଟେଇ କରିଥିବା ବେଳେ ମାରୁତି ସୁଜୁକି କମ୍ପାନି ସେପ୍ଟେମ୍ବର ମାସରେ ୨ ଦିନ ଉତ୍ପାଦନ ବନ୍ଦ ରଖିଥିଲା । କିନ୍ତୁ ଏଭଳି ସ୍ଥିତିରେ ଓଡ଼ିଶା ଅନ୍ୟ ରାଜ୍ୟ ପାଇଁ ଏକ ବଡ ବାର୍ତ୍ତା ଦେଇଛି ।
ଅକ୍ଟୋବର ଶେଷ ସୁଦ୍ଧା ଯେତେବେଳେ ପୂରା ଦେଶରେ ଗାଡି ବିକ୍ରି ସଂଖ୍ୟା କମିଛି ସେତେବେଳେ ଓଡ଼ିଶାରେ ଗାଡି ବିକ୍ରି ବୃଦ୍ଧି ପାଇଛି । ପରିବହନ ବିଭାଗର ସ୍ୱତନ୍ତ୍ର ଶାସନ ସଚିବ ମନୋଜ ମିଶ୍ରଙ୍କ କହିବା ଅନୁଯାୟୀ, ଚଳିତ ଆର୍ଥିକ ବର୍ଷ ଅକ୍ଟୋବର ଶେଷ ସୁଦ୍ଧା ପରିବହନ ବିଭାଗ ରାଜସ୍ୱ ବାବଦରେ ୧୦୦୪ କୋଟି ଟଙ୍କା ପାଇଛି । ତେବେ ଗତବର୍ଷ ଅକ୍ଟୋବର ଶେଷ ସୁଦ୍ଧା ରାଜସ୍ୱ ବାବଦକୁ ୧୦୦୧ କୋଟି ଟଙ୍କା ଆଦାୟ କରିଥିଲା ପରିବହନ ବିଭାଗ । ଏହି ରାଜସ୍ୱର ପ୍ରାୟ ୮୦ ଭାଗ ନୂଆ ଗାଡି ପଞ୍ଜୀକରଣ ଓ ରୋଡ ଟ୍ୟାକ୍ସ ବାବଦକୁ ଆଦାୟ କରାଯାଉଛି । ଯାହା ଦର୍ଶାଉଛି, ଓଡ଼ିଶାରେ ଗତବର୍ଷ ଅପେକ୍ଷା ଚଳିତବର୍ଷ ଅଧିକ ଗାଡି ବିକ୍ରି ହୋଇଛି ।