ଅପରାଜିତା ଆସିବେ ହେଲେ କେଉଁ ଭୂମିକାରେ? ୨୭ରେ ଦିଲ୍ଲୀ, ୧ରେ ଭୂବନେଶ୍ୱର
ଦିଲ୍ଲୀରେ କିରଣ ବେଦୀଙ୍କ ସ୍ଥିତି ମନେ ପକାଇ ଦେଇ ଗୁଗୁଲି ଛାଡିଲେ ପ୍ରଶାନ୍ତ ନନ୍ଦ
କନକ ବ୍ୟୁରୋ: କେଉଁ ଭୂମିକାରେ ଆସିବେ ଅପରାଜିତା? ବିଜେପିରେ ଅପରାଜିତା ଷଡଙ୍ଗୀକୁ ମିଳିବ କେଉଁ ଦାୟିତ୍ୱ? ବରିଷ୍ଠ ପ୍ରଶାସିକା ଅପରାଜିତା ଷଡଙ୍ଗୀ ବିଜେପିରେ ଯୋଗ ଦେବା ନେଇ ସ୍ପଷ୍ଟ ହେବା ପରେ ଏମିତି ଅନେକ ପ୍ରଶ୍ନ ଏବେ ଘୁରି ବୁଲୁଛି । ଆଉ ଏହାରି ଭିତରେ ଆସିଛି ବରିଷ୍ଠ ବିଜେପି ନେତା ବିଶ୍ୱଭୂଷଣ ହରିଚନ୍ଦନଙ୍କ ବୟାନ । ଯେଉଁଥରେ ସେ କହିଛନ୍ତି- ପୃଥ୍ୱୀରାଜ ହରିଚନ୍ଦନ ଲୋକସଭାରୁ ନୁହେଁ ବିଧାନସଭାରୁ ନିର୍ବାଚନ ଲଢ଼ିପାରନ୍ତି । ଭୁବନେଶ୍ୱର ଲୋକସଭା ବଦଳରେ ଚିଲିକା ବିଧାନସଭାରୁ ଲଢ଼ିପାରନ୍ତି ପୃଥ୍ୱୀରାଜ । ଏହି ବୟାନ ପରେ ଚର୍ଚ୍ଚା ହେଉଛି- ଭୁବନେଶ୍ୱର ଲୋକସଭାରୁ ନିର୍ବାଚନ ଲଢ଼ିିବେ କି ଅପରାଜିତା ଷଡଙ୍ଗୀ ।
Kanak News is now on WhatsApp
Join and get latest news updates delivered to you via WhatsApp
ଅପରାଜିତା ବିଜେପିରେ ମିଶିବା ନେଇ ସ୍ପଷ୍ଟ ହେବା ପରେ ଏବେ ସେ ଦଳରେ କେଉଁ ଭୂମିକା ତୁଲାଇବେ ତାକୁ ନେଇ ଭୁବନେଶ୍ୱରରୁ ଦିଲ୍ଲୀ ପର୍ଯ୍ୟନ୍ତ ଚର୍ଚ୍ଚା ଜୋରଧରିଛି । ଆସନ୍ତା ୨୭ ତାରିଖରେ ଦିଲ୍ଲୀରେ ହେବ ଅପରାଜିତାଙ୍କ ମିଶ୍ରଣ ପର୍ବ । ସୂଚନା ମିଳିଛି, ବିଜେପିର ବହୁ ତୁଙ୍ଗ ନେତାଙ୍କ ଉପସ୍ଥିତିରେ ପଦ୍ମ ଧରିବେ ଏହି ପୂର୍ବତନ ବ୍ୟୁରୋକ୍ରାଟ । ବିଜେପିରେ ଯୋଗ ଦେବା ପରେ ୨୮ରେ ସେ ଭୁବନେଶ୍ୱର ଫେରିବେ ।
ଡିସେମ୍ବର ୧ରେ ରାଜ୍ୟ ବିଜେପି କାର୍ଯ୍ୟାଳୟରେ ତାଙ୍କୁ ସମ୍ବର୍ଦ୍ଧନା ଦିଆଯିବା କାର୍ଯ୍ୟକ୍ରମ ରହିଛି । ରାଜ୍ୟ ରାଜନୀତିରେ କେଉଁ ଭୂମିକା ତୁଲାଇବେ ଏହାକୁ ନେଇ କଳ୍ପନା ଜଳ୍ପନା ଚାଲିଥିବା ବେଳେ ବିଜେପିର ବରିଷ୍ଠ ନେତା ବିଶ୍ୱଭୂଷଣଙ୍କ ବୟାନ ଏହି ଚର୍ଚ୍ଚାକୁ ଆହୁରି ଖୋରାକ ଯୋଗାଇଛି । ବିଶ୍ୱଭୂଷଣ କହିଛନ୍ତି, ତାଙ୍କ ପୁଅ ପୃଥ୍ୱୀରାଜ ହରିଚନ୍ଦନ ଭୁବନେଶ୍ୱର ଲୋକସଭା ଆସନ ଛାଡ଼ି ଚିଲିକା ବିଧାନସଭା ଆସନ ପାଇଁ ପ୍ରସ୍ତୁତ ହେଉଛି । ଯାହା ଅପରାଜିତାଙ୍କ ପାଇଁ ବାଟ ଫିଟାଇବ ବୋଲି ଆଲୋଚନା ହେଉଛି ।
ସେପଟେ ଅପରାଜିତାଙ୍କ ବିଜେପିରେ ଯୋଗଦାନ ପ୍ରସଙ୍ଗକୁ ହାଲୁକାର ସହ ନେଇଛି ବିଜେଡି । ତେବେ ଦିଲ୍ଲୀରେ କିରଣ ବେଦୀଙ୍କ ସ୍ଥିତି ମନେ ପକାଇ ଦେଇ ଗୁଗୁଲି ଛାଡିଛନ୍ତି ଦଳର ମୁଖପାତ୍ର ପ୍ରଶାନ୍ତ ନନ୍ଦ । ତେବେ ଦକ୍ଷ ପ୍ରଶାସକର ସୁନାମକୁ ପାଥେଇ କରି ରାଜନୀତିକୁ ଓହ୍ଲାଉଛନ୍ତି ଅପରାଜିତା । ହେଲେ ରାଜନୀତିର ଜଟିଳ ଗଣିତକୁ ସମାଧାନ କରି ସେ କିପରି ଆଗଉଛନ୍ତି, ତାହା ଉପରେ ରହିଛି ଓଡ଼ିଶାବାସୀଙ୍କ ନଜର ।