ଟିମ୍ ଇଣ୍ଡିଆର ପେସ ବାହିନୀ ଆଗରେ ମୁଣ୍ଡ ନୁଆଁଇଲା ଦକ୍ଷିଣ ଆଫ୍ରିକା! ୧୩୦ ରନରେ ଚିତପଟାଙ୍ଗ ମାରିଲା ଘରୋଇ ଦଳ । ଭାରତ ପାଇଁ ୨୦୮ ରନର ଟାର୍ଗେଟ
କନକ ବ୍ୟୁରୋ : ରୋମାଞ୍ଚକ ମୋଡରେ କେପଟାଉନ ଟେଷ୍ଟ । ଟିମ ଇଣ୍ଡିଆ ପାଇଁ ସୁବର୍ଣ୍ଣ ସୁଯୋଗ । ଭାରତ-ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଉଥିବା ପ୍ରଥମ ଟେଷ୍ଟ ମ୍ୟାଚର ଦ୍ୱିତୀୟ ଇନିଂସରେ ମାତ୍ର ୧୩୦ ରନରେ ଅଲଆଉଟ ହୋଇଛି ଘରୋଇ ଟିମ ଦକ୍ଷିଣ ଆଫ୍ରିକା । ଫଳରେ ପ୍ରଥମ ଟେଷ୍ଟକୁ ଜିତିବା ପାଇଁ ଟିମ ଇଣ୍ଡିଆ ଆଗରେ ୨୦୮ ରନର ବିଜୟ ଲକ୍ଷ୍ୟ ରହିଛି । ପ୍ରଥମ ଟେଷ୍ଟ ସମାପ୍ତ ହେବାକୁ ଆହୁରି ଗୋଟିଏ ଦିନ ବାକି ଥିବା ବେଳେ ଭାରତ ପାଇଁ ବିଜୟ ସମ୍ଭାବନା ସୃଷ୍ଟି ହୋଇଛି । ଭାରତର ପେସବାହିନୀ ଆଗରେ ଆତ୍ମସମର୍ପଣ କରିଥିଲେ ଦକ୍ଷିଣ ଆଫ୍ରିକା ବ୍ୟାଟସମ୍ୟାନ । କେବଳ ଡି ଭିଲିୟର୍ସ ଶେଷ ଯାଏଁ ଲଢିଥିଲେ ମଧ୍ୟ ତାହା ଦଳ ପାଇଁ ଯଥେଷ୍ଟ ନଥିଲା ।
Kanak News is now on WhatsApp
Join and get latest news updates delivered to you via WhatsApp
୬୫ ରନରେ ଦୁଇ ୱିକେଟ ହରାଇ ଚତୁର୍ଥ ଦିନର ଖେଳ ଆରମ୍ଭ କରିଥିବା ଘରୋଇ ଦଳ ଦକ୍ଷିଣ ଆଫ୍ରିକା ଭାରତୀୟ ବୋଲରଙ୍କୁ ସମ୍ମୁଖୀନ ହେବାରେ ବିଫଳ ହୋଇଥିଲେ । ଦଳ ନିୟମିତ ବ୍ୟବଧାନରେ ୱିକେଟ ହରାଇଚାଲିଥିଲା । ଏପରିକି ଦଳର ୬ ଜଣ ବ୍ୟାଟସମ୍ୟାନ ଦୁଇଅଙ୍କ ମଧ୍ୟ ଛୁଇଁ ପାରିନଥିଲେ । ମହମ୍ମଦ ସାମି ଓ ଯଶପ୍ରୀତ ବୁମରାହଙ୍କ ଘାତକ ବୋଲିଂ ଆଗରେ ତିଷ୍ଠି ପାରିନଥିଲେ ଦକ୍ଷିଣ ଆଫ୍ରକାର ଟପ୍ ଅର୍ଡର ବ୍ୟାଟସମ୍ୟାନ । ବୁମରାହ ଓ ଯଶପ୍ରୀତ ୩ଟି ଲେଖାଏଁ ୱିକେଟ ନେଇଥିବା ବେଳେ ଭୁବନେଶ୍ୱର କୁମାର ଓ ହାର୍ଦ୍ଦିକ ପାଣ୍ଡ୍ୟା ୨ଟି ଲେଖାଏଁ ୱିକେଟ ନେଇ ଦକ୍ଷିଣ ଆଫ୍ରିକା ପାଇଁ ବିପର୍ଯ୍ୟୟ ସୃଷ୍ଟି କରିଥିଲେ ।
ଦକ୍ଷିଣ-ଆଫ୍ରିକା ଟସ ଜିତି ପ୍ରଥମ ବ୍ୟାଟିଂ କରି ପ୍ରଥମ ଇନିଂସରେ ୨୮୬ ରନରେ ଅଲଆଉଟ ହୋଇଥିଲା । ତେବେ ପ୍ରଥମ ଇନିଂସରେ ଭାରତ ମଧ୍ୟ ସେହିଭଳି ଖାସ ପ୍ରଦର୍ଶନ କରିପାରିନଥିଲା । ଦକ୍ଷିଣ -ଆଫ୍ରିକା ବୋଲରଙ୍କ ଘାତକ ବୋଲିଂ ହାତ ଟେକି ଦେଇଥିଲେ ଭାରତର ଟପ ଅର୍ଡର ବ୍ୟାଟସମ୍ୟାନ । ହାର୍ଦ୍ଦିକ ପାଣ୍ଡ୍ୟାଙ୍କ ୯୩ ରନର ଇନିଂସ ବଳରେ ଭାରତ ୨୦୦ ରନ ପାର କରିଥିଲା । ତେବେ ହାର୍ଦ୍ଦିକଙ୍କ ୱିକେଟ ପତନ ପରେ ଭାରତ ୨୦୯ ରନରେ ଅଲଆଉଟ ହୋଇଥିଲା । ତେବେ ଦ୍ୱିତୀୟ ଇନିଂସରେ ଦକ୍ଷିଣ-ଆଫ୍ରିକାର ବ୍ୟାଟିଂ ବିପଯ୍ୟୟ ଭାରତ ପାଇଁ ବିଜୟ ସମ୍ଭାବନା ସୃଷ୍ଟି କରିଛି ।