ରାଷ୍ଟ୍ରପତିଙ୍କ ବିରୋଧରେ ବିବାଦୀୟ ବୟାନକୁ ବିଭିନ୍ନ ଦଳର ବିରୋଧ। ବିଜେପି ମହିଳା ମୋର୍ଚ୍ଚାର ପ୍ରତିବାଦ। ବିଜେଡି, କଂଗ୍ରେସ ବି କଲେ ନିନ୍ଦା।
କନକ ବ୍ୟୁରୋ: ଓଡିଆ ଝିଅ ତଥା ଦେଶର ପ୍ରଥମ ନାଗରିକ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ପଶ୍ଚିମବଙ୍ଗର ମନ୍ତ୍ରୀ ତାତ୍ସଲ୍ୟ କରିବା ଘଟଣା ଓଡିଶାବାସୀଙ୍କୁ ଶକ୍ତ ଆଘାତ ଦେଇଛି । ଦଳ ମତ ନିବିଶେଷରେ ବିଜେପି, ବିଜେଡି ଓ କଂଗ୍ରେସ ପକ୍ଷରୁ ଏଭଳି ମନ୍ତବ୍ୟକୁ ନିନ୍ଦା କରାଯାଇଛି । ରାଜ୍ୟ ବିଜେପି ମହିଳା ମୋର୍ଚ୍ଚା ପକ୍ଷରୁ ଭୁବନେଶ୍ୱରରେ ବିକ୍ଷୋଭ କରାଯାଇଛି । ଦ୍ରୌପଦୀ ମୁର୍ମୁଙ୍କ ପ୍ରତି ଅଶାଳୀନ, ଅଭଦ୍ର ଓ ଆଇନ ବିରୋଧୀ ମନ୍ତବ୍ୟ ଦେଇଥିବା ମନ୍ତ୍ରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରି, ରାଜ୍ୟ ବିଜେପି କାର୍ଯ୍ୟାଳୟରୁ ରାମ ମନ୍ଦିର ପର୍ଯ୍ୟନ୍ତ ବିକ୍ଷୋଭ ପ୍ରଦର୍ଶନ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଦ୍ରୌପଦୀ ମୁର୍ମୁଙ୍କୁ ନେଇ ସାରା ଓଡିଶା ଗର୍ବ କରୁଥିବାରୁ ଦଳ ମତ ଉପରକୁ ଉଠି ନିନ୍ଦା କରିଛନ୍ତି ବିଜେଡି ଓ କଂଗ୍ରେସ । କଂଗ୍ରେସ ନେତା କହିଛନ୍ତି, ଓଡିଶାର ଝିଅ ଓ ଦେଶର ମହାମହିମଙ୍କୁ ନେଇ ଏଭଳି ବୟାନକୁ ବରଦାସ୍ତ କରାଯିବନି । ବିଜେଡି କହିଛି, ଏଭଳି ମନ୍ତବ୍ୟ ଦେଇଥିବା ମମତାଙ୍କ ମନ୍ତ୍ରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ ।
ରାଷ୍ଟ୍ରପତିଙ୍କ ସମ୍ପର୍କରେ ବିବାଦୀୟ ମନ୍ତବ୍ୟ ଦେଇଥିବା ମନ୍ତ୍ରୀଙ୍କ ବିରୋଧରେ ଭୁବନେଶ୍ୱର ଓ ସୁନ୍ଦରଗଡରେ ଏତଲା ଦିଆଯାଇଛି । ଭୁବନେଶ୍ୱର କ୍ୟାପିଟାଲ ଥାନାରେ ବିଜେପି ଆଦିବାସୀ ସମାଜ ପକ୍ଷରୁ ଅଖିଲ ଗିରିଙ୍କ ବିରୋଧରେ ଏତଲା ଦିଆଯାଇଛି । ସେପଟେ ସୁନ୍ଦରଗଡରେ ମଧ୍ୟ ଅଖିଲ ଗିରିଙ୍କ ବିରୋଧରେ ଥାନାରେ ଏତଲା ଦେଇଛନ୍ତି ବିଜେପି ବିଧାୟକ କୁସୁମ ଟେଟେ । ତୁରନ୍ତ ମନ୍ତ୍ରୀଙ୍କୁ ଗିରଫ କରିବା ପାଇଁ ଦାବି କରିଛନ୍ତି ।
ଦ୍ରୌପଦୀ ମୁର୍ମୁ ରାଷ୍ଟ୍ରପତି ହେବା ପରେ ତାଙ୍କୁ ନେଇ ବାରମ୍ବାର ଏଭଳି ଆପତ୍ତିଜନକ ଟିପଣୀ ଦେଉଛନ୍ତି ବିରୋଧୀ ଦଳର ନେତା । ଯାହା ଦେଶର ସର୍ବୋଚ୍ଚ ସାମ୍ବିଧାନିକ ପଦବୀର ଗରିମାକୁ ନଷ୍ଟ କରୁଛି । ତେଣୁ ଏଭଳି ବୟାନ ଦେବାରୁ ରାଜନେତା ବିରତ ନରହିଲେ ଏହା ଏକ ଖରାପ ପରମ୍ପରା ସୃଷ୍ଟି କରିବ ।