ବିଦ୍ୟୁତ ସଂଯୋଗ କାଟିଦେଇଛି ବିତରକ କମ୍ପାନୀ। ଗରମରେ ହନ୍ତସନ୍ତ ବସ୍ତିବାସିନ୍ଦା ।
କନକ ବ୍ୟୁରୋ: ରାଜଧାନୀର ନିଳାଦ୍ରିବିହାର ଟ୍ରାଞ୍ଜିଟ୍ କ୍ୟାମ୍ପ । ଗଛମୂଳେ ଏକାଠି ହୋଇଛନ୍ତି ଲୋକେ । ଘରେ ବିଦ୍ୟୁତ୍ ସଂଯୋଗ କଟିଯାଇଛି, ପାଣି ବି ଆସୁନାହିଁ । ବିଜୁଳୀ ବିଲ୍ ବାକି ଥିବା କହି ସଂଯୋଗ କାଟିଦେଇଛି ବିଦ୍ୟୁତ ବିତରକ ସଂସ୍ଥା ଟାଟା ପାୱାର । ଫଳରେ ଅସହ୍ୟ ଗରମରେ ଆଉ କ’ଣ କରିବେ, ଗଛମୂଳ ହିଁ ଭରସା ପାଲଟିଛି । ଖାଲି ଏତିକି ନୁହେଁ, ରାତି ସାରା ଗରମରୁ ରକ୍ଷା ପାଇବାକୁ ଫୁଟପାଥରେ ଶୋଇବାକୁ ବାଧ୍ୟ ହେଉଛନ୍ତି । ବିଜୁଳି କଟିବା ପରେ ଅସହ୍ୟ ଗରମରେ ଜଣଙ୍କ ମୃତ୍ୟୁ ହୋଇଥିବା ମଧ୍ୟ ଅଭିଯୋଗ କରିଛନ୍ତି ବସ୍ତିବାସିନ୍ଦା ।
Kanak News is now on WhatsApp
Join and get latest news updates delivered to you via WhatsApp
୨୦୧୦ ମସିହାରେ ବିଏମସିର ୪୭ ନମ୍ବର ୱାର୍ଡରୁ ପ୍ରାୟ ଦୁଇ ଶହ ପରିବାରକୁ ସ୍ଥାନାନ୍ତର କରାଯାଇ ଏହି ଟ୍ରାନଜିଟ୍ ହାଉସକୁ ଅଣାଯାଇଥିଲା । ସେତେବେଳେ ଏମାନଙ୍କୁ କୁହାଯାଇଥିଲା ଯେ, ପ୍ରଶାସନ ପକ୍ଷରୁ ମାଗଣାରେ ବିଦ୍ୟୁତ ଓ ପାନୀୟ ଜଳଯୋଗାଇ ଦିଆଯିବ । ଏହାସହ ଆବାସ ଯୋଜନାରେ ଆଗାମୀ ଦିନରେ ଅନ୍ୟତ୍ର ସ୍ଥାୟୀ ଘର ଦିଆଯିବାକୁ ମଧ୍ୟ ପ୍ରତିଶ୍ରୁତି ମିଳିଥିଲା । ସେହି କଥା ଅନୁସାରେ କୌଣସି ଘରେ ବିଜୁଳି ମିଟର ଲାଗିନାହିଁ । ସେମାନଙ୍କ ପାଖକୁ କୌଣସି ବିଜୁଳି କି ପାଣି ବିଲ୍ ଆସିନାହିଁ । ହେଲେ ୧୨ ବର୍ଷରେ ୫୮ ଲକ୍ଷ ଟଙ୍କା ବକେୟା ଥିବା ଦର୍ଶାଇ ବିଜୁଳି ସଂଯୋଗ କାଟିଦିଆଯାଇଥିବା ଅଭିଯୋଗ ହୋଇଛି । ଫଳରେ ଏବେ ବିଜୁଳି ଓ ପାଣି ବିନା ଏହି ପରିବାରଗୁଡ଼ିକ ପାଇଁ ଚଳିବା କଷ୍ଟକର ହୋଇପଡ଼ିଛି ।
ହେଲେ ପ୍ରଶ୍ନ ଉଠୁଛି, ଯଦି ପ୍ରଶାସନ କହିଥିଲା, ଏମାନଙ୍କ ବିଜୁଳି ଓ ପାଣି ବିଲ୍ ଦେବ, ତାହେଲେ ଦେଇନାହିଁ କାହିଁକି ? ଆଉ ଏହି କଥା ଲୋକଙ୍କୁ ନକହି କେମିତି ସେମାନଙ୍କ ଘରର ବିଦ୍ୟୁତ ସଂଯୋଗ କାଟି ଦିଆଗଲା? ତେବେ ଟାଟା ପାୱାରର କହିବା କଥା ହେଲା, ଦୀର୍ଘ ଦିନ ଧରି ବିଡିଏ ମାଧ୍ୟମରେ ବସ୍ତି ବାସିନ୍ଦାଙ୍କୁ ବିଜୁଳି ଯୋଗାଯାଉଥିଲା । ହେଲେ ସେମାନେ ନିଜ ବିଲ୍ ଦେବାକୁ ଆଗ୍ରହ ପ୍ରକାଶ କଲେ ନାହିଁ । ଗତ ତିନି ବର୍ଷ ଧରି ବକେୟା ରହିଛି । ଏହାସହ ବସ୍ତି ବାସିନ୍ଦାଙ୍କ ସହ ୱାନଟାଇମ୍ ସେଟଲମେଣ୍ଟ କରାଯିବ ଓ ପ୍ରତିଘରକୁ ମିଟର ଲଗାଯାଇ ଖୁବ୍ ଶୀଘ୍ର ବିଜୁଳି ସଂଯୋଗ ଦିଆଯିବ ବୋଲି ଟାଟା ପାୱାର ପକ୍ଷରୁ କୁହାଯାଇଛି ।