ବିତିଗଲାଣି ୭୦ ବର୍ଷ , ହେଲେ ବ୍ରିଟିଶ ଜମାନାରେ ଓଡ଼ିଶା ବାବୁ ! ଅବକାରୀ ପୋଲିସକୁ ଏବେ ବି ମିଳୁଛି ମାସିକ ୩୦ ଟଙ୍କାର ସାଇକେଲ ଭତା ।
କନକ ବ୍ୟୁରୋ : ଅବକାରୀ ବିଭାଗରେ ବଦଳିନି ବ୍ରିଟିଶ ଅମଳର ଢାଂଚା । ଅଫିସରଙ୍କୁ ମିଳୁଛି ମାସିକ ୩୦ ଟଙ୍କାର ସାଇକଲ୍ ଭତା । ରାଜ୍ୟ ଅବକାରୀ ବିଭାଗ ଏବେ ବି ପୁରୁଣା ବ୍ରିଟିଶ ଅମଳର ନିୟମରେ ଚାଲିଛି । ନିଶା ବେପାରୀ ଗାଡ଼ିରେ ବେଧଡ଼କ ନିଶା କାରବାର କରୁଥିବା ବେଳେ ପୋଲିସ ସାଇକେଲରେ ପିଛା କରୁଛି । ଏପରିକି ସାଇକେଲ ହିଁ ବନିଛି ଶେଷ ସାହାରା ।
Kanak News is now on WhatsApp
Join and get latest news updates delivered to you via WhatsApp
ଇତିମଧ୍ୟରେ ସ୍ୱାଧୀନତାର ଦୀର୍ଘ ବର୍ଷ ବିତିଯାଇଛି, କିନ୍ତୁ ଆଜି ବି କାୟମ୍ ରହିଛି ବ୍ରିଟିଶ୍ ଅମଳର ନିୟମ୍ କାନୁନ୍ । ଆମେ କହୁଛୁ ରାଜ୍ୟ ଅବକାରୀ ପୁଲିସ୍ ବିଭାଗର କଥା, ଯେଉଁଠି ପୁଲିସ୍ ହାତରେ ବନ୍ଧୁକ ବଦଳରେ ଅଛି ଠେଙ୍ଗା ଓ ନିଶା ବେପାରୀଙ୍କ ପିଛା କରିବାକୁ ମିଳୁଛି ମାସିକ ୩୦ ଟଙ୍କାର ସାଇକଲ୍ ଭତା । ସମୟ ବଦଳିଛି, କିନ୍ତୁ ବଦଳିପାରିନାହିଁ ଅବକାରୀ ପୁଲିସର କଳେବର । ଅତ୍ୟାଧୁନିକ ଯୁଗରେ ନିଶା ବ୍ୟବସାୟର ରୋକିବାକୁ ମିଳୁନାହିଁ ଆବଶ୍ୟକୀୟ ସାଧନ ।
୩୦ ଟଙ୍କା ସାଇକଲ୍ ଭତାର ଏହି ନିୟମ ଆଜି ନୁହଁ ୧୯୧୫ ମସିହା ପାଖାପାଖି ୧୦୩ ବର୍ଷ ତଳର । ପୁଲିସ ବିଭାଗରେ ମାସିକ ୭୫୦ ଟଙ୍କାର ବାଇକ ଭତା ମିଳୁଥିବା ବେଳେ ଅବକାରୀ ବିଭାଗର ସ୍ଥିତି କିଛି ଏଭଳି । ଅନ୍ୟପଟେ ଅବକାରୀ ବିଭାଗ ଜରିଆରେ ସରକାର କୋଟି କୋଟି ଟଙ୍କାର ରାଜସ୍ୱ ପାଉଛନ୍ତି କିନ୍ତୁ ଯୋଜନାର ଅଭାବ ଓ ସରକାରୀ ନିଷ୍କ୍ରିୟତା ଯୋଗୁ ବଦଳିପାରୁନାହିଁ ବିଭାଗର ଦୟନୀୟ ସ୍ଥିତି । ରାଜ୍ୟରେ ବଢ଼ିଚାଲିଛି ନିଶା କାରବାର, ତା’ସହ ତାଳ ଦେଇ ବଢ଼ୁଛି ଅବକାରୀ ବିଭାଗର ଦାୟିତ୍ୱ । କିନ୍ତୁ ଅତ୍ୟାଧୁନିକ ହାଇସ୍ପିଡ୍ ଯୁଗରେ ଏବେ ବି ଅବକାରୀ ପୁଲିସ୍ ଯେପରି ଅଛି ବ୍ରିଟିଶ୍ ଅମଳରେ ।