କନକ ବ୍ୟୁରୋ: ଗିରଫ ହେଲା କରିତକର୍ମା କନେଷ୍ଟବଳ ପ୍ରସନ୍ନ ବେହେରା । ଯିଏ ଥିଲା ପୁଲିସ କନେଷ୍ଟବଳ ସଂଘର ସଂପାଦକ । ଖାକି ନାଁରେ କଳଙ୍କ । ଏହି କରିତକର୍ମା କନେଷ୍ଟବଳଙ୍କ କାରନାମା କୌଣସି ପାୱାରଫୁଲ ନେତା ମନ୍ତ୍ରୀଙ୍କଠାରୁ କିଛି କମ୍ ନଥିଲା । କୋଭିଡ ନିୟମ ଅନୁସାରେ ଯେତେବେଳେ ସମସ୍ତ ମଦ ଦୋକାନର ସଟର ପଡି ଯାଉଥିଲା ସେତେବେଳେ ବିନା ଲାଇସେନ୍ସରେ ପ୍ରସନ୍ନ ଚଳାଉଥିଲା ସାଉଥ ସିଟି ବାର । ନିଜ ପଦବୀର ଅପବ୍ୟବହାର କରି ବାର ଗର୍ଲଙ୍କୁ ଡ୍ୟାନ୍ସ ଫ୍ଲୋରରେ ନଚାଇ ବୋହି ନେଉଥିଲା ଲକ୍ଷ ଲକ୍ଷ ଟଙ୍କା । ପୁଲିସର ଗେହ୍ଲା ପୁଅ ଭଳି ରାତି ତମାମ ହୋଟେଲର ଜମାଉଥିଲା ମଦର ଆସର । ଆଉ ଏସବୁରେ ତାକୁ ସହଯୋଗ କରୁଥିଲା ଗିରଫ ହୋଇଥିବା ହୋଟେଲ ମାଲିକ ପ୍ରଦ୍ୟୁମ୍ନ ଜେନା ।
Kanak News is now on WhatsApp
Join and get latest news updates delivered to you via WhatsApp
୨୦୦୧ ଫେବ୍ରୁଆରୀ ୧୫ରେ ବାଲିଅନ୍ତା ମଦ ମୃତ୍ୟୁ ମାମଲାରେ ଅଭିଯୁକ୍ତଙ୍କୁ ସହଯୋଗ କରି ପ୍ରସନ୍ନଙ୍କ ଉପରେ କାର୍ଯ୍ୟାନୁଷ୍ଠାନ ହୋଇଥିଲା । ୨୦୧୮ରେ ପ୍ରସନ୍ନ ଜଣେ ଓକିଲଙ୍କୁ କଟକରେ ନିସ୍ତୁକ ମାଡ ମାରିବା ପ୍ରତିବାଦରେ ପୁଣି ବିବାଦକୁ ଆସିଥିଲା ।
୨୦୨୦ରେ କରୋନା କଟକଣା ବେଳେ ପ୍ରସନ୍ନ ମଦ ପିଉଥିବାର ଭିଡିଓ ଭାଇରାଲ ହୋଇଥିଲା । ଚାକିରିରେ ଥାଇ ବାରମ୍ବାର କ୍ଷମତାର ଅପବ୍ୟବହାର ସାଙ୍ଗକୁ ବିଶୃଙ୍ଖଳିତ ଆଚରଣ ପାଇଁ ତାଙ୍କ ଉପରେ ୪ଥର କଳାଦାଗ ଲାଗି ସାରିଲାଣି ।
ପ୍ରତିଦିନ ଏହି ବେଆଇନ ବାରରେ ଉଡୁଥିବା ଲକ୍ଷ ଲକ୍ଷ ଟଙ୍କା ଗଲା କୁଆଡେ? କେଉଁଠି ବିନିଯୋଗ ହୋଇଛି ଏହି କୋଟି କୋଟି ଟଙ୍କା? ଏହି ଟଙ୍କା ପ୍ରସନ୍ମ ଓ ପ୍ରଦ୍ୟୁମ୍ନଙ୍କ ପାଖରେ ଅଛି ନାଁ ଏମାନଙ୍କ ଗଡ ଫାଦର ସାଜିଥିବା ବାବୁ ସବୁ ଟଙ୍କା ହଜମ କରିଛନ୍ତି? ସେମାନଙ୍କ ପାଖରେ କେବେ ପହଂଚିବ କମିଶନରେଟ ପୁଲିସ?