ପଦ୍ମ ପୋଖରୀରୁ ପୁଣି ଟିଏମସିକୁ ଫେରିବେ କି ମୁକୁଲ ରାୟ ? ସରଗରମ ପଶ୍ଚିମବଙ୍ଗ ରାଜନୀତି ।
କନକ ବ୍ୟୁରୋ : ପଶ୍ଚିମବଙ୍ଗ ବିଧାନସଭା ନିର୍ବାଚନରେ ମମତା ବାନାର୍ଜୀଙ୍କ ବଡ ବିଜୟ ପରେ ରାଜ୍ୟ ରାଜନୀତି ପୁଣି ଥରେ ନୂଆ ମୋଡ଼ ନେବା ଆରମ୍ଭ କରିଛି । ନିର୍ବାଚନ ପୂର୍ବରୁ ବିଜେପି ଏବଂ ଟିଏମସିରେ କ୍ଷମତା ପାଇଁ ଯେଉଁଭଳି ପ୍ରତିଯୋଗିତା ହୋଇଥିଲା, ବର୍ତ୍ତମାନ ପୁଣିଥରେ ଟିଏମସିରେ ନିର୍ବାଚନ ପୂର୍ବରୁ ବିଜେପିରେ ଯୋଗ ଦେଇଥିବା ଅନେକ ନେତାଙ୍କ ପ୍ରତ୍ୟାବର୍ତ୍ତନ ନେଇ କଳ୍ପନାଜଳ୍ପନା ଚାଲିଛି । ଏହି ନେତାଙ୍କ ମଧ୍ୟରେ ମୁକୁଲ ରାୟଙ୍କର ନାମକୁ ନେଇ ଚର୍ଚ୍ଚା ଜୋର ଧରିଛି ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ଜନତା ପାର୍ଟି ଏବଂ ତୃଣମୂଳ କଂଗ୍ରେସ ଏହି ପ୍ରସଙ୍ଗରେ ମୁହଁ ଖୋଲୁନଥିଲେ ବି କୋଲକାତାରେ ବିଜେପିର ଏକ ଗୁରୁତ୍ୱପୂର୍ଣ୍ଣ ସମୀକ୍ଷା ବୈଠକରେ ମୁକୁଲ ରାୟଙ୍କ ଅନୁପସ୍ଥିତି ଏହି କଳ୍ପନା ଜଳ୍ପନାର କାରଣ ହୋଇଛି । ଟିଏମସି ସାଂସଦ ସୌଗତ ରାୟ କହିଛନ୍ତି ଯେ, ‘ଅଭିଷେକ ବାନାର୍ଜୀଙ୍କ ସହ ଅନେକ ଲୋକ ଅଛନ୍ତି ଏବଂ ସେମାନେ ଫେରି ଆସିବାକୁ ଚାହୁଁଛନ୍ତି । ମୁଁ ଭାବୁଛି ସେ ଆବଶ୍ୟକ ସମୟରେ ଦଳ ପ୍ରତି ବିଶ୍ୱାସଘାତକତା କରିଥିଲେ । ମମତା ଅନ୍ତିମ ନିଷ୍ପତ୍ତି ନେବେ । ମୁଁ ଭାବୁଛି ଏହିପରି ନେତାମାନଙ୍କୁ ଦୁଇ ଭାଗରେ ବିଭକ୍ତ କରିବାକୁ ପଡିବ ।
ସଫ୍ଟ ଲାଇନର ଏବଂ ହାର୍ଡ ଲାଇନର । ସଫ୍ଟ ଲାଇନର ନେତାମାନେ ଦଳ ଛାଡିଥିଲେ କିନ୍ତୁ ମମତା ବାନାର୍ଜୀଙ୍କୁ କେବେ ଅପମାନିତ କରିନଥିଲେ । କିନ୍ତୁ ହାର୍ଡ ଲାଇନରମାନେ ସର୍ବସାଧାରଣରେ ମମତାଙ୍କୁ ଅପମାନିତ କରିଥିଲେ । ବିଜେପିରେ ଯୋଗଦେବା ପରେ ଶୁଭେନ୍ଦୁ ଅଧିକାରୀ ମମତା ବାନାର୍ଜୀଙ୍କୁ ବଦନାମ କରିଥିଲେ, କିନ୍ତୁ ମୁକୁଲ ରାୟ କେବେ ମଧ୍ୟ ଖୋଲାଖୋଲି ଭାବେ ମୁଖ୍ୟମନ୍ତ୍ରୀଙ୍କୁ ଦୁର୍ବ୍ୟବହାର କରିନଥିଲେ’। ସୂଚନା ଥାଉ କି ଯେ ବିଧାନସଭା ନିର୍ବାଚନର ବହୁ ପୂର୍ବରୁ ମୁକୁଲ ରାୟ ବିଜେପିରେ ଯୋଗ ଦେଇଥିଲେ । ଅନେକ ବିଧାୟକ ଏବଂ ଟିଏମସିର ନେତା ମୁକୁଲଙ୍କ ଯୋଗୁଁ ବିଜେପିରେ ଯୋଗ ଦେଇଥିଲେ ।