ଅନଲାଇନ ଠକେଇର ଶିକାର ହେଲେ ମୁଖ୍ୟମନ୍ତ୍ରୀଙ୍କ ଝିଅ । ପୁରୁଣା ସୋଫା ବିକ୍ରି କରିବାକୁ ଦେଇଥିଲେ ବିଜ୍ଞାପନ, ଗ୍ରାହକ ସାଜି ୩୪ ହଜାର ଚଳୁ କରିଦେଲେ ସାଇବର ଠକ ।
କନକ ବ୍ୟୁରୋ : ଅନଲାଇନରେ କିଣାବିକା କରୁଥିଲେ ସାବଧାନ । ଗ୍ରାହକ ସାଜି ଆସିବେ, ଆଉ ଆକାଉଣ୍ଟ ଖାଲି କରିଦେବେ ସାଇବର ଠକ । ଆଉ ଏଭଳି ସାଇବର ଠକେଇର ଶିକାର ହୋଇଛନ୍ତି ମୁଖ୍ୟମନ୍ତ୍ରୀଙ୍କ ଝିଅ । ଅନଲାଇନରେ ସୋଫା ବିକ୍ରି କରିବାକୁ ଯାଇ ଠକେଇର ଶିକାର ହୋଇଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଝିଅ । ଅନଲାଇନ ଠକେଇ ମାଧ୍ୟମରେ ୩୪୦୦୦ ଟଙ୍କା କେଜ୍ରିୱାଲଙ୍କ ଝିଅ ଠାରୁ ଠକି ନେଇଛନ୍ତି ସାଇବର ଠକ ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ଅନଲାଇନରେ କିଣାବିକାର ମାଧ୍ୟମ ପାଲଟିଥିବା ଓଏଲଏକ୍ସରେ ନିଜର ପୁରୁଣା ସୋଫା ବିକ୍ରି କରିବାକୁ ବିଜ୍ଞାପନ ଦେଇଥିଲେ କେଜ୍ରିୱାଲଙ୍କ ଝିଅ ହର୍ଷିତା । ଆଉ ବିଜ୍ଞାପନ ଦେଖିବା ପରେ ଗ୍ରାହକ ସାଜି ଉଭା ହୋଇଥିଲେ ସାଇବର ଠକ । ପୁରୁଣା ସୋଫା କିଣିବାକୁ କହି ହର୍ଷିତାଙ୍କ ମନରେ ବିଶ୍ୱାସ ଜନ୍ମାଇ ପାରିଲା ସାଇବର ଠକ । ଆଉ ଏଥିପାଇଁ ପ୍ରଥମେ ହର୍ଷିତାଙ୍କ ଆକାଉଣ୍ଟକୁ କିଛି ଟଙ୍କା ମଧ୍ୟ ପଠାଇଲା । ତେବେ ପୂରା ଟଙ୍କା ଦେବା ପୂର୍ବରୁ ଗୋଟିଏ କ୍ୟୁଆର କୋଡ ପଠାଇ ଏହାକୁ ସ୍କାନ କରିବାକୁ ହର୍ଷିତାଙ୍କୁ କହିଥିଲା ସାଇବର ଠକ । ପ୍ରଥମରୁ ଆକାଉଣ୍ଟକୁ କିଛି ଟଙ୍କା ଆସିଥିବାରୁ ହର୍ଷିତାଙ୍କର ମଧ୍ୟ ସାଇବର ଠକଙ୍କ ଉପରେ ଟିକିଏ ବି ସନ୍ଦେହ ହୋଇନଥିଲା । ବରଂ ପୂରା ଟଙ୍କା ପାଇବାକୁ ସାଇବର ଠକଙ୍କ କହିବା ଅନୁଯାୟୀ କୋଡ ସ୍କାନ କରିଥିଲେ ହର୍ଷିତା । କିନ୍ତୁ ଏହି ଗୋଟିଏ ଭୁଲ ଯେ ତାଙ୍କ ଆକାଉଣ୍ଟ ଖାଲି କରିଦେବ ତାହା କେବେ କଳ୍ପନା ମଧ୍ୟ କରିନଥିଲେ ହର୍ଷିତା ।
ସାଇବର ଠକ ପଠାଇଥିବା କୋଡ ସ୍କାନ କରୁକରୁ ଖାଲି ହୋଇଯାଇଥିଲା ଆକାଉଣ୍ଟ । ଦୁଇଟି ପର୍ଯ୍ୟାୟରେ ପ୍ରାୟ ୩୪ ହଜାର ଟଙ୍କା ଠକି ନେଇଥିଲେ ସାଇବର ଠକ । ପ୍ରଥମେ ୨୦ ହଜାର ଓ ପରେ ୧୪ ହଜାର ଟଙ୍କା, ଏପରି ଭାବେ ମୋଟ ୩୪ ହଜାର ଟଙ୍କା ବାସ୍ କିଛି କ୍ଷଣ ମଧ୍ୟରେ ହର୍ଷିତାଙ୍କ ଆକାଉଣ୍ଟରୁ ଉଡାଇନେଇଥିଲେ ସାଇବର ଠକ । ଠକେଇର ଶିକାର ହେବା ପରେ ଏ ବାବଦରେ ସିଭିଲ ଲାଇନ୍ସ ଥାନାରେ ମାମଲା ରୁଜୁ କରାଯାଇଛି । ମାମଲା ରୁଜୁ ହେବା ପରେ ଅଭିଯୁକ୍ତଙ୍କୁ ଖୋଜିବା ଆରମ୍ଭ କରିଛି ପୋଲିସ । ତେବେ ଏଠାରେ ଆମେ ଆପଣଙ୍କୁ କହି ରଖୁଛୁ କି, ଅନଲାଇନରେ କାରବାର କରୁଥିଲେ ସାବଧାନ, ପ୍ରତିପକ୍ଷ ଟଙ୍କା ଯାଇପାରୁନି ବୋଲି କୌଣସି ବିକଳ୍ପ ଦେଲେ ତାହାକୁ ଗ୍ରହଣ କରନ୍ତୁ ନାହିଁ ।