କୁଖ୍ୟାତ ଆତଙ୍କୀର କେନ୍ଦ୍ରାପଡା କନେକ୍ସନ ନେଇ ଚାଲିଛି ଖୋଳତାଡ଼ ! ପଟିଆଲା ହାଉସକୋର୍ଟରେ ହାଜର ପରେ ଜେରା କରୁଛି ଏନଆଇଏ, ପରିବାର କହିଲା ୨୦୦୬ରୁ ନାହିଁ ସଂପର୍କ
କନକ ବ୍ୟୁରୋ : ଆତଙ୍କବାଦୀ ସଂଗଠନ ଲସ୍କର–ଇ-ତୋଏବା ଲିଙ୍କରେ ଗିରଫ ହବିବୁର ରେହମାନକୁ ଜେରା କରୁଛି ନାସନାଲ୍ ଇନଭେଷ୍ଟିଗେଟିଭ୍ ଏଜେନ୍ସି । ସେପଟେ ହବିବୁର୍ ଓଡିଶାର କେନ୍ଦ୍ରାପଡା ବାସିନ୍ଦା ହୋଇଥିବାରୁ ପୋଲିସ ତାଙ୍କ ପରିବାରକୁ ପଚରାଉଚରା କରିଛି । ହବିବୁରର ପରିବାର କହିଛନ୍ତି, ଶେଷଥର ପାଇଁ ୨୦୦୬ରେ ଭାଇର ବାହାଘରରେ ଯୋଗ ଦେବାକୁ ହବିବୁର ଘରକୁ ଆସିଥିଲା । ସେପଟେ ଏନଆଇଏର ତଦନ୍ତରେ ସବୁ ପ୍ରକାର ସହଯୋଗ କରାଯିବ ବୋଲି ପୁଲିସ ଡିଜି ଦାୟିତ୍ୱରେ ଥିବା ପୋଲିସ କମିଶନର ସତ୍ୟଜିତ୍ ମହାନ୍ତି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀ ବିମାନ ବନ୍ଦରରୁ ଲସ୍କର ଆତଙ୍କବାଦୀ ହବିବୁର ରେହମାନକୁ ଗିରଫ କରିବା ପରେ ପଟିଆଲା କୋର୍ଟରେ ହାଜର କରିଛି ଏନଆଇଏ । ରିମାଣ୍ଡରେ ନେଇ ଆତଙ୍କବାଦୀ ସଂଗଠନ ଲସ୍କର-ଇ-ତୋଇବା ସହ ଲିଙ୍କର ଅଧିକ ଖୋଳତାଡ କରୁଛି ଜାତୀୟ ତଦନ୍ତକାରୀ ସଂସ୍ଥା । କେନ୍ଦ୍ରାପଡା ଜିଲ୍ଲା ପାଟକୁରା ଥାନା ତେଣ୍ଡାକୁଦାର ମୁସଲିମ୍ ବସ୍ତି । ଏହି ଘରେ ରହୁଛନ୍ତି ହବିବର ପରିବାର । ହେଲେ ୩୫ ବର୍ଷ ହେଲା ଘର ଛାଡିଦେଇଥିଲା ହବିବୁର, ରହୁଥିଲା ରିୟାଦରେ । ଏନଆଇଏ ହବିବକୁ ଗିରଫ କରିବା ପରେ ପରିବାରକୁ ପଚରାଉଚରା କରିଛି ପୋଲିସ । ହବିବୁର ସହ ଏବେ ପରିବାରର କଣ ସମ୍ପର୍କ ରହିଛି, ସେ କେବେ ଘରକୁ ଆସିଥିଲା, ପରିବାର ସହ ଫୋନରେ କଥା ହୋଇଛି କି, ଘରକୁ ଟଂକା ଦିଏ କି ନାହିଁ, ପରିବାରକୁ ଏସବୁ ପ୍ରଶ୍ନ କରିଛି ପୋଲିସ । ସେପଟେ ପୋଲିସ ଡିଜି ଦାୟିତ୍ୱରେ ଥିବା କମିଶନର ସତ୍ୟଜିତ୍ ମହାନ୍ତି କହିଛନ୍ତି, ହବିବୁର ସମ୍ପର୍କରେ ଯଦି ଏନଆଇଏ ତଥ୍ୟ ଜାଣିବା ପାଇଁ ଚାହିଁବ ତେବେ ସହଯୋଗ କରାଯିବ ।
ହବିବୁର ରେହମାନ ଓରଫ୍ ହବିବ୍ । ଲସ୍କର ଆତଙ୍କବାଦୀ ସେଖ୍ ଅବଦୁଲ ନଇମର ସହଯୋଗୀ । ଆତଙ୍କବାଦୀଙ୍କୁ ଦେଶକୁ ଆଣିବା, ସେମାନଙ୍କୁ ରଖିବାର ବ୍ୟବସ୍ଥା କରିବା ଏବଂ ସଂଗଠନ ପାଇଁ ଚାନ୍ଦା ଆଦାୟ କରିବା ଭଳି ଦାୟିତ୍ୱ ସମ୍ଭାଳୁଥିଲା ହବିବୁର । ନଇମ୍ ଓ ହବିବୁରଙ୍କ ସମେତ ୧୦ ଜଣଙ୍କ ନାଁରେ ଚାର୍ଜସିଟ୍ କରିଥିଲା ଏନଆଇଏ । ଏବେ ଧରାପଡିଛି ଏହି ଆତଙ୍କବାଦୀ ।