ମଧ୍ୟରାତ୍ରିିରେ ଅସ୍ଥାୟୀ ଶିବିରରେ ଲାଗିଲା ଭୟଙ୍କର ନିଆଁ ! ଲକ୍ଷାଧିକ ଟଙ୍କାର ସମ୍ପତ୍ତି ପୋଡି ପାଉଁଶ, ପ୍ରଶାସନର ଅଣଦେଖା ଅଭିଯୋଗ ।
କନକ ବ୍ୟୁରୋ : ରାତି ଅଧିଆ ଅସ୍ଥାୟୀ ଶିବିରରେ ଲାଗିଲା ଭୟଙ୍କର ନିଆଁ । ମୟୂରଭଞ୍ଜ ଜିଲ୍ଲା ପାଞ୍ଚପୀଢ ଉପଖଣ୍ଡ ଶିମିଳିପାଳ ଜାତୀୟ ଉଦ୍ୟାନରୁ ଗତ ଜୁନ ମାସରେ ସ୍ଥାନାନ୍ତରଣ ହୋଇ ଆସିଥିବା ସିଆଳନଇ ଅସ୍ଥାୟୀ ବସ୍ତିରେ ଗତକାଲି ରାତି ସାଢେ ୧୧ଟା ସମୟରେ କୌଣସି କାରଣରୁ ନିଆଁ ଲାଗିଯାଇଥିଲା । ଏଥିରେ ୨୭ଟି ଅସ୍ଥାୟୀ ଝୁମ୍ପୁଡି ଘର ସମେତ ସମସ୍ତ ଆସବାବପତ୍ରରେ ନିଆଁ ଲାଗିବା ସହ ସମ୍ପୂର୍ଣ୍ଣ ନଷ୍ଟ ହୋଇଯାଇଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ସବୁଠାରୁ ବଡ କଥା ହେଉଛି, ଗତ ଜାନୁଆରୀ ୨୨ ତାରିଖ ଦିନ ମଧ୍ୟ ଏହି ସ୍ଥାନରେ ୧୬ଟି ଅସ୍ଥାୟୀ ଝୁମ୍ପୁଡି ଘରେ ନିଆଁ ଲାଗିଥିଲା । ଆଉ ଏଥିରେ ରାଧାରାଣୀ ଦେହୁରୀ ନାମକ ଜଣେ ମହିଳା ନିଆଁରେ ପୋଡି ହୋଇଥିଲେ । ବର୍ତ୍ତମାନ ସୁଦ୍ଧା ସେ କଟକ ବଡ ମେଡିକାଲରେ ଚିକିତ୍ସିତ ହେଉଥିବା ଜଣାପଡିଛି । ତେବେ ଏହି ଘଟଣାକୁ ୧୫ଦିନ ବିତିଥିବା ବେଳେ ଗତକାଲି ରାତିରେ ପୁଣି ଥରେ ଲାଗିଛି ଭୟଙ୍କର ନିଆଁ । ଆଉ ଏଥିରେ ଲକ୍ଷାଧିକ ଟଙ୍କାର ସମ୍ପତି ପୋଡି ପାଉଁଶ ହୋଇଯାଇଛି ।
ଏହି ସ୍ଥାନକୁ ସ୍ଥାନାନ୍ତର ହୋଇ ଆସିଥିବା ବସ୍ତିବାସିନ୍ଦାଙ୍କୁ ତିନି ମାସ ମଧ୍ୟରେ ପକ୍କା ଘର ଯୋଗାଇ ଦେବା ନେଇ ପ୍ରଶାସନ ପକ୍ଷରୁ ପ୍ରତିଶ୍ରୁତି ଦିଆଯାଇଥିଲା । ଯାହାକି ପାଣିର ଗାର ପାଲଟିଛି । ଅଗ୍ନିକାଣ୍ଡ ଭଳି ଭୟଙ୍କର ଘଟଣା ଦୁଇ ଦୁଇ ଥର ଘଟିଥିବାରୁ ପ୍ରଶାସନ ସେମାନଙ୍କୁ ଅଣଦେଖା କରୁଥିବା ଏବଂ ସୁବିଧା ସୁଯୋଗ ଯୋଗାଇଦେବା ପରିବର୍ତ୍ତେ ମରଣ ମୁହଁକୁ ଠେଲି ଦେଉଛି ବୋଲି ବସ୍ତିବାସିନ୍ଦା ଅଭିଯୋଗ କରିଛନ୍ତି । ସ୍ଥାନାନ୍ତରଣ ହେବାର ୬ରୁ ୭ ମାସ ବିତିଯାଇଥିଲେ ସୁଦ୍ଧା, ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉନଥିବା ବେଳେ ନାଲିଆଖି ଦେଖାଇ ଦିନ ପରେ ଦିନ ଗଡେଇ ଚାଲିଥିବା ବସ୍ତିବାସିନ୍ଦା ଅଭିଯୋଗ କରିଛନ୍ତି ।