କନକ ବ୍ୟୁରୋ: ଦିଲ୍ଲୀରେ ଜ୍ଞାନବାପୀ ମସଜିଦ ବିବାଦ ତାତି । ବିବାଦୀୟ ବୟାନ ପାଇଁ ପ୍ରଫେସର ଗିରଫ । ରାସ୍ତାକୁ ଓହ୍ଲାଇଲା ଛାତ୍ରସଂଗଠନ । ଦିଲ୍ଲୀ ପୁଲିସ ସାଇବର ସେଲ ସମ୍ମୁଖରେ ଛାତ୍ର ସଂଗଠନର ହଲ୍ଲାବୋଲ । ନାରାବାଜୀ, ଦାବି ସହ ହାତରେ ପ୍ଲାକାର୍ଡ ଧରି କରୁଛନ୍ତି ଜୋରଦାର ବିକ୍ଷୋଭ । ରାଜଧାନୀ ଦିଲ୍ଲୀରେ ଶୁକ୍ରବାର ବିଳମ୍ବିତ ରାତିରୁ ଏଭଳି କିଛି ଘଟଣା ଆରମ୍ଭ ହୋଇଛି । ଜ୍ଞାନବାପୀ ମସଜିଦ ମାମଲାରେ ଆପତିଜନକ ମନ୍ତବ୍ୟ ଦେଇ ଗିରଫ ହୋଇଥିଲେ ଦିଲ୍ଲୀ ବିଶ୍ୱବିଦ୍ୟାଳୟର ଇତିହାସ ପ୍ରଫେସର ରତନ ଲାଲ । ପରେ ତାଙ୍କୁ ମୁକଳାଇବା ପାଇଁ ଦିଲ୍ଲୀ ପୁଲିସର ସାଇବର ସେଲ କାର୍ଯ୍ୟାଳୟ ଓ ଅନ୍ୟାନ୍ୟ ସ୍ଥାନରେ ପ୍ରଦର୍ଶନ କରି ଦାବି ଜଣାଇଥିଲେ ଷ୍ଟୁଡେଂଟ ଫେଡେରେସନ ଅଫ ଇଣ୍ଡ୍ରି୍ରଆ ଓ ଇଣ୍ଡିଆନ ଷ୍ଟୁଡେଂଟ ଆସୋସିଏସନ । ପରେ ଅବଶ୍ୟ ଦିଲ୍ଲୀର ତିସ୍ ହଜାରୀ କୋର୍ଟରେ ତାଙ୍କୁ ହାଜର କରାଯିବା ପରେ ତାଙ୍କୁ ଜାମିନ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ନଜର ପକାଇବା ପୂରା ଘଟଣା ଉପରେ…
ଜ୍ଞାନବାପୀ ମସଜିଦ ପରିସରରୁ ଜବତ ହୋଇଥିବା ଶିବଲିଙ୍ଗର ଫଟୋକୁ ସୋସିଆଲ ମିଡିଆରେ ପୋଷ୍ଟ କରିଥିଲେ ଡିୟୁର ଆସିଷ୍ଟାଂଟ ପ୍ରଫେସର ରତନଲାଲ । ବିବାଦୀୟ ଟିପ୍ପଣି ଦେବା ଏକ କଟାକ୍ଷ ଏମୋଜୀ ବି ପୋଷ୍ଟ କରିଥିଲେ । କ୍ରମଶ ଏହାକ ଭାଇରାଲ ହେବା ସହ ସମାଲୋଚନାକୁ ଘେରକୁ ଆସିଥିଲେ ପ୍ରଫେସର । ମେ ୧୮ରେ ସୁପ୍ରିମକୋର୍ଟ ଆଇନଜୀବୀ ବିନିତ ଜିନ୍ଦଲ ଦିଲ୍ଲୀ ପୁଲିସର ସାଇବର ସେଲରେ ଅଭିଯୋଗ ଆଣିଥିଲେ । ମେ ୨୦ ମଧ୍ୟ ରାତ୍ରରେ ରତନ ଲାଲଙ୍କୁ ଗିରଫ କରାଯାଇଥିଲା ।
ଘଟଣାକୁ ନେଇ ରାଜନୀତି ଆରମ୍ଭ ହୋଇଛି । କଂଗ୍ରେସ ନେତା ଦିଗବିଜୟ ସିଂ ଓ ଆପ ସାଂସଦ ସଂଜୟ ସିଂ ଘଟଣାକୁ ନିନ୍ଦା କରିଛନ୍ତି । ଆପ କହିଛି ଦେଶରେ ଦଳିତଙ୍କ ଉପରେ ହେଉଥିବା ଅନ୍ୟାୟର ଏହା ତାଜା ଉଦାହରଣ । ସେପଟେ କଂଗ୍ରେସ କହିଛି ଦେଶବାସୀଙ୍କୁ ନିଜ ବିଚାର ଉପସ୍ଥାପନା କରିବା ଅଧିକାର ରହିଛି ।
ଗୋଟେ ପଟେ କାଠଗଡାରେ ମସଜିଦ ମାମଲା ଅନ୍ୟପଟେ ଶିକ୍ଷାନୁଷ୍ଠାନରେ ପ୍ରତିବାଦର ନିଆଁ । ଏଭଳି ସ୍ଥିତିରେ ପ୍ରଫେସରଙ୍କ ଗିରଫ ମାମଲାକୁ ନେଇ ରାଜନୀତି ଜୋର ଧରିଛି । ପ୍ରଶ୍ନ ଉଠୁଛି ଏଭଳି ସମ୍ବେଦନଶୀଳ ପ୍ରସଙ୍ଗରେ ଅଧ୍ୟାପକ, ଛାତ୍ରଛାତ୍ରୀଙ୍କ ଭୂମିକା ପ୍ରକୃତରେ କଣ ରହିବା ଉଚିତ?