ଛତିଶଗଡ଼ ନିର୍ବାଚନକୁ ନେଇ ଜୋର ଧରିଲା ରାଜନୀତି ! ଯୋଗୀ ଆଦିତ୍ୟନାଥଙ୍କ ପାଦ ଛୁଇଁଲେ ମୁଖ୍ୟମନ୍ତ୍ରୀ ରମଣ ସିଂହ, ସୋସିଆଲ ମିଡିଆରେ ଚର୍ଚ୍ଚା ।
ଛତିଶଗଡର ରାଜନନ୍ଦଗାଓଁ ବିଧାନସଭା ଆସନ ନିର୍ବାଚନ ପାଇଁ ମଙ୍ଗଳବାର ନାମାଙ୍କନ ପତ୍ର ଦାଖଲ ଶେଷ ହୋଇଛି । ନାମାଙ୍କନ ଦାଖଲ କରିବା ପୂର୍ବରୁ ଛତିଶଗଡ ମୁଖ୍ୟମନ୍ତ୍ରୀ ରମଣ ସିଂହ ଏବଂ ତାଙ୍କ ପୁଅ ଅଭିଷେକ ସିଂହ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କର ପାଦ ଛୁଇଁ ଆଶୀର୍ବାଦ ନେଇଛନ୍ତି । ନାମାଙ୍କନ ଭରିବା ପରେ ରମଣ କହିଛନ୍ତି, ରାଜନନ୍ଦଗାଓଁ ଏବଂ ସମଗ୍ର ଛତିଶଗଡବାସୀଙ୍କ ଭଲପାଇବା ବିଜେପି ସରକାରଙ୍କୁ ମିଳିଆସିଛି ଏବଂ ଆଗକୁ ମଧ୍ୟ ମିଳିବ । ଏବଂ ଛତିଶଗଡରେ ବିଜେପି ସରକାର ମିଶନ ୬୫ ଟାର୍ଗେଟ ପୁରା କରିବାରେ ସମର୍ଥ ହେବ । ଏହି ନିର୍ବାଚନ ସମଗ୍ର ଦେଶ ପାଇଁ ମହତ୍ତ୍ୱପୂର୍ଣ୍ଣ ଅଟେ ବୋଲି ରମଣ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଯୋଗୀ ଆଦିତ୍ୟନାଥଙ୍କ ଉପସ୍ଥିତି ନେଇ ଗଣମାଧ୍ୟମର ପ୍ରଶ୍ନର ଉତ୍ତର ଦେଇ ରମଣ କରିଛନ୍ତି, ଯୋଗୀ ଆଦିତ୍ୟନାଥଙ୍କ ଆଶୀର୍ବାଦ ସବୁ ପ୍ରାର୍ଥୀଙ୍କୁ ମିଳିବ ଏବଂ ଛତିଶଗଡରେ ପୁଣି ଥରେ ବିଜେପି ସରକାର ଗଢିବ । ସେହିପରି ରାଜନନ୍ଦଗାଓଁରୁ କଂଗ୍ରେସ ପ୍ରାର୍ଥୀ ହୋଇଥିବା କରୁଣା ଶୁକ୍ଳାଙ୍କ ବାବଦରେ ରମଣ ସିଂହ କହିଛନ୍ତି, ଯଦି କରୁଣା ଶୁକ୍ଳା ତାଙ୍କ ବିରୋଧରେ ନିର୍ବାଚନ ଲଢନ୍ତି, ତେବେ ତାଙ୍କୁ କୌଣସି ସମସ୍ୟା ନାହିଁ । ସୂଚନା ଅନୁଯାୟୀ, ଛତିଶଗଡରେ ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ନାମାଙ୍କନ ଭରିବାର ଆଜି ଅନ୍ତିମ ତାରିଖ ଅଟେ । ନଭେମ୍ବର ୧୨ ତାରିଖରେ ନିର୍ବାଚନ ହେବାକୁ ଥିବା ବେଳେ ଡିସେମ୍ବର ୧୧ ତାରିଖରେ ଭୋଟ ଗଣନା ହେବ ।