କନକ ବ୍ୟୁରୋ : ପୁରୀ ଶ୍ରୀଜଗନ୍ନାଥ ମନ୍ଦିରରେ ନିରାମିଷ ସାଙ୍ଗକୁ ପରଷା ଯାଉଛି ଆମିଷ ଭୋଜନ । ଏୟାର ଇଣ୍ଡିଆ ଶୁଭଯାତ୍ରା ପତ୍ରିକାରେ ଲେଖାଯାଇଥିବା ଏଭଳି ବିକୃତ ତଥ୍ୟ ନେଇ ଏବେ ତୀବ୍ର ପ୍ରତିକ୍ରିୟା ପ୍ରକାଶପାଇଛି । ଇଂରାଜୀ ଭାଷାରେ ପ୍ରକାଶ ପାଉଥିବା ଏହି ପତ୍ରିକାରେ ‘ଡିଭୋସନ କ୍ୟାନ ବି ଡିଲିସିୟସ’ ଶୀର୍ଷକ ଏହି ଲେଖାରେ ଦେଶର ୫ଟି ପ୍ରସିଦ୍ଧ ମନ୍ଦିରର ରୋଷେଇଶାଳା ଓ ସେଠାରେ ପ୍ରସ୍ତୁତ ପ୍ରସାଦ ନେଇ ଉଲ୍ଲେଖ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଅମୃତସର ସ୍ୱର୍ଣ୍ଣମନ୍ଦିରର ଗୁରୁ କା ଲଙ୍ଗର, ଇସକନ ଫାଉଣ୍ଡେସନ ପକ୍ଷରୁ ଚାଲିଥିବା ଅକ୍ଷୟ ପାତ୍ର, ପୁରୀ ଜଗନ୍ନାଥ ମନ୍ଦିରର ଆନନ୍ଦ ବଜାର, ମଂଜୁନାଥ ମନ୍ଦିରର ଅନ୍ନଦାନମ ଓ ଶିରିଡି ସାଇବାବାଙ୍କ ପ୍ରସାଦାଳୟରେ ପ୍ରତିଦିନ ହଜାର ହଜାର ଭକ୍ତଙ୍କ ପାଇଁ ପ୍ରସ୍ତୁତ ସ୍ୱାଦିଷ୍ଟ ଭୋଜନ ବିଷୟରେ ଲେଖାଯାଇଛି । ମାତ୍ର ପୁରୀ ଶ୍ରୀମନ୍ଦିରରେ ମହାପ୍ରସାଦ ସଂପର୍କରେ ଯାହା ପ୍ରକାଶ ପାଇଛି ତାହା ଶ୍ରଦ୍ଧାଳୁଙ୍କୁ ମର୍ମାହତ କରିଛି । ପୁରୀ ଶ୍ରୀମନ୍ଦିରର ରୋଷଘରକୁ ଦେଶର ସର୍ବବୃହତ ବୋଲି ଉଲ୍ଳେଖ କରାଯାଇଥିବାବେଳେ ଏଠାରେ ଲକ୍ଷାଧିକ ଭକ୍ତଙ୍କ ପାଇଁ ୫୦୦ ରୋଷେୟା, ୩୦୦ ସହାୟକ ରାତିଦିନ କାମ କରିଥାନ୍ତି ବୋଲି ଲେଖାଯାଇଛି ।
ପ୍ରତିଦିନ ପ୍ରାୟ ୨୮୫ ପ୍ରକାର ନିରାମିଷ ଓ ଆମିଷ ଖାଦ୍ୟ ପରଷା ଯାଇଥାଏ ବୋଲି ମ୍ୟାଗାଜିନରେ ପ୍ରକାଶ ପାଇଛି । ଏଭଳି ତଥ୍ୟ ସମଗ୍ର ବିଶ୍ୱର କୋଟି କୋଟି ଜଗନ୍ନାଥ ପ୍ରେମୀଙ୍କୁ ମାନସିକ ଆଘାତ ଦେଇଛି । ବିମାନରେ ଯାଉଥିବା ରୁଦ୍ରପ୍ରସନ୍ନ ରଥ ନାମକ ଜଣେ ଯାତ୍ରୀଙ୍କ ଦୃଷ୍ଟିକୁ ଏହି ଲେଖା ଆସିବା ପରେ ସେ ଏହାର ପ୍ରତିବାଦ କରିଥିଲେ । ମହାପ୍ରଭୁ ଜଗନ୍ନାଥଙ୍କ ସଂପର୍କରେ ଏପରି ତ୍ରୁଟିପୂର୍ଣ୍ଣ ତଥ୍ୟ ଲେଖିଥିବା ପତ୍ରିକାକୁ ତୁରନ୍ତ ପ୍ରତ୍ୟାହାର କରିନେବା ସହ ସଂପୃକ୍ତ ଲେଖକ କ୍ଷମା ପ୍ରାର୍ଥନା କରିବାପାଇଁ ଦାବି କରିଛନ୍ତି ।