କନକ ବ୍ୟୁରୋ: ବର୍ତ୍ତମାନ ସମୟରେ କ୍ରିକେଟ ବିଶ୍ୱର ଏକ ଲୋକପ୍ରିୟ କ୍ରିଡା । କିଛି ଲୋକ ଏହାକୁ ଖେଳିବାକୁ ପସନ୍ଦ କରୁଥିବା ବେଳେ ଅନ୍ୟ କିଛି ଏହାକୁ ଦେଖିବାକୁ । ତେବେ କ୍ରିକେଟକୁ ଅନିଶ୍ଚତତାର ଖେଳ କୁହାଯାଏ । କାରଣ ଏହି ଖେଳରେ ଗୋଟିଏ ଭୁଲରେ ହିଁ ବାଜି ପଲଟିଯାଇ ପାରେ । ସେହି ଭୁଲ ନୋ ବଲ କିମ୍ବା ୱାଇଡ ବଲ ବି ହୋଇପାରେ । କାରଣ ଗୋଟିଏ ନୋ ବଲ ପକାଇଲେ ବ୍ୟାଟ୍ସମ୍ୟାନଙ୍କୁ କେବଳ ଅତିରକ୍ତ ରନ ନୁହେଁ ବରଂ ନଟ ଆଉଟ ହେବା ସହ ଅତିିରକ୍ତ ବଲ ମଧ୍ୟ ମିଳିଥାଏ । ଏହି ନୋ ବଲ ନପକାଇବା ପାଇଁ ବୋଲର ମାନେ ଅନେକ ସତର୍କ ରହିଥାନ୍ତି । ହେଲେ କେବେ କେବେ ଭୁଲ ହୋଇଯାଏ ଆଉ ନୋ ବଲ ପଡିଯାଏ । ଆଉ ଯାହା ଫଳରେ କ୍ଷତିରେ ରହିଥାନ୍ତି ବୋଲର ।
Kanak News is now on WhatsApp
Join and get latest news updates delivered to you via WhatsApp
ତେବେ ଆମେ ଆଜି ବିଶ୍ୱର ଏମିତି କିଛି ବୋଲରଙ୍କ ବିଷୟରେ କହିବୁ ଯେଉଁମାନେ କି କେବେ ବି ତାଙ୍କ କ୍ୟାରିୟରରେ ଗୋଟିଏ ନୋ ବଲ ପକାଇ ନାହାନ୍ତି ।
ଇୟାନ ବୋଥାମ
ଇୟାନ ବୋଥାମ ବିଶ୍ୱର ଶ୍ରେଷ୍ଠ ଅଲରାଉଣ୍ଡରଙ୍କ ମଧ୍ୟରୁ ଜଣେ । ସେ ନିଜ କ୍ୟାରିୟରରେ କେବେ ବି ନୋ ବଲ ପକାଇ ନାହାନ୍ତି । ଇୟାନ ବାର୍ଥାମ ଇଂଲଣ୍ଡ ପାଇଁ ୧୦୨ ଟେଷ୍ଟ ମ୍ୟାଚ ଓ ୧୧୬ ଦିନିକିଆ ମ୍ୟାଚ ଖେଳିଛନ୍ତି । ଆଉ ଟେଷ୍ଟରେ ୩୮୩ ଓ ଦିନିକିଆରେ ୧୪୫ ୱିକେଟ ନେଇଛନ୍ତି । ଇୟାନ ବୋଥାମ ନିଜ ଦମରେ ଅନେକ ଥର ଇଂଲଣ୍ଡକୁ ମ୍ୟାଚ ଜିତାଇଛନ୍ତି । ସେ ୨୭ ଥର ଗୋଟିଏ ଇଂନିସରେ ୫ଟି ୱିକେଟ ଓ ୪ ଥର ଗୋଟିଏ ମ୍ୟାଚରେ ୧୦ ୱିକେଟ ନେଇଥିଲେ ।
ଲାନ୍ସ ଗିବ୍ସ
ୱେଷ୍ଟଇଣ୍ଡିଜ କ୍ରିକେଟର ଲାନ୍ସ ଗିବ୍ସଙ୍କ ନାଁ ବିଶ୍ୱର ଶ୍ରେଷ୍ଠ ସ୍ପିନରଙ୍କ ମଧ୍ୟରେ ଗଣାଯାଏ । ସେ ନିଜ କ୍ୟାରିୟରରେ ୭୯ଟି ଟେଷ୍ଟ ଓ ୩ଟି ଦିନିକିଆ ମ୍ୟାଚ ଖେଳିଛନ୍ତି ହେଲେ କେବେ ନୋ ବଲ ପକାଇନାହାନ୍ତି । ୮୦ ଦଶକର ଆରମ୍ଭରୁ ନେଇ ୯୦ ଦଶକର ଯାଏଁ ୱେଷ୍ଟଇଣ୍ଡିଜ ଦଳ ଅନେକ ସଫଳତା ହାସଲ କରିଥିଲା । ଆଉ ସ୍ପିନର ଭାବେ ଲାନ୍ସ ଗିବ୍ସ ଦଳ ପାଇଁ ଅନେକ ଛାପ ଛାଡିଥିଲେ ।
ଡେନିସ ଲିଲି
ଡେନିସ ଲିଲି ଅଷ୍ଟ୍ରେଲିଆର ଜଣେ ଜବରଦସ୍ତ କ୍ରିକେଟର ଥିଲେ । ତାଙ୍କ ସମୟରେ ସେ କ୍ରିକେଟ ଜଗତରେ ଦବଦବା ରଖିଥିଲେ । ସେ ପଡିଆ ଭିତରେ ଆଗ୍ରେସିଭ ସ୍ୱାଭାବ ରଖୁଥିଲେ । ଆଉ ସେ ସୁଇଂ ବଲ ପକାଇବାରେ ବେଶ ମାହିର ଥିଲେ । ସେ ନିଜ କ୍ୟାରିୟରରେ ୭୦ ଟେଷ୍ଟ ମ୍ୟାଚ ଖେଳିଛନ୍ତି ହେଲେ କେବେ ବି ନୋ ବଲ ପକାଇ ନାହାନ୍ତି । ସେ ନିଜ କ୍ୟାରିୟରରେ ୩୫୫ ୱିକେଟ ନେଇଛନ୍ତି । ୧୯୮୪ ମସିହାରେ ସେ ନିଜ କ୍ୟାରିୟରର ଶେଷ ମ୍ୟାଚ ଖେଳିଥିଲେ ।
କପିଳ ଦେବ
୧୯୮୩ ମସିହା ବିଶ୍ୱକପ ବିଜେତା ଭାରତୀୟ ଦଳର ଅଧିନାୟକ କପିଳ ଦେବ ଜଣେ ସଫଳ ଅଲରାଉଣ୍ଡର ଥିଲେ । ୧୯୭୮ରୁ ୧୯୯୪ ମସହା ଯାଏଁ ସେ ଟିମ ଇଣ୍ଡିଆ ପାଇଁ ଖେଳିଥିଲେ । ସେ ୧୩୧ ଟେଷ୍ଟ ମ୍ୟାଚ ଖେଳି ୪୩୪ ଓ ୨୨୫ ଦିନିକିଆ ଖେଳି ୨୫୩ ୱିକେଟ ନେଇଥିଲେ । କପିଳ ଦେବ ନିଜ କ୍ୟାରିୟର ମଧ୍ୟରେ କେବେ ନୋ ବଲ ପକାଇ ନାହାନ୍ତି । ଭାରତକୁ ଶୀର୍ଷରେ ପହଞ୍ଚାଇବା ପଛରେ ସେ ବଡ ଭୂମିକା ଗ୍ରହଣ କରିଥିଲେ ।
ଇମ୍ରାନ ଖାନ
ପାକିସ୍ତାନର ବର୍ତ୍ତମାନର ପ୍ରଧାନମନ୍ତ୍ରୀ ଇମ୍ରାନ ଖାନ ତାଙ୍କ ସମୟରେ ଜଣେ ଦୁର୍ଦ୍ଦଶ ବୋଲର ଥିଲେ । ପାକିସ୍ତାନ ଟିମର ଏହି ପୂର୍ବତନ ଅଧିନାୟକ କେବେ ବି ନୋ ବଲ ପକାଇ ନାହାନ୍ତି । ୧୯୯୨ ମସିହାରେ ପାକିସ୍ତାନ ଟିମକୁ ବିଶ୍ୱକପ ଜିତାଇବାରେ ଇମ୍ରାନ ଗୁରୁତ୍ୱପୂର୍ଣ୍ଣ ଭୂମିକା ନିଭାଇଥିଲେ । ସେ ତାଙ୍କ କ୍ୟାରିୟରରେ ୮୮ଟି ଟେଷ୍ଟ ମ୍ୟାଚ ଖେଳି ୩୬୨ଟି ୱିକେଟ ନେଇଥିଲେ । ସେହିପରି ୧୭୫ଟି ଦିନିକିଆ ମ୍ୟାଚ ଖେଳି ୧୮୨ଟି ୱିକେଟ ନେବାରେ ସଫଳ ହୋଇଥିଲେ ।
ତେବେ ବିଶ୍ୱର ଏହି ସବୁ ଶ୍ରେଷ୍ଠ ବୋଲର ନିଜ ସମୟରେ ଏଭଳି ଅଭଙ୍ଗା ରେକର୍ଡ ସୃଷ୍ଟି କରିଥିଲେ । ଯାହାକୁ ଭାଙ୍ଗିବା ଏବେକା ବୋଲର ମାନଙ୍କ ପାଇଁ କଷ୍ଟ ହୋଇପଡିଛି ।