କନକ ବ୍ୟୁରୋ : ପ୍ରତିବାଦର ନୂଆ ଫର୍ମୁଲା । ଅଣ୍ଡା ବଦଳରେ ଏବେ ଗୋବର ମାଡ଼ ଆପଣାଉଛନ୍ତି ଆନ୍ଦୋଳନକାରୀ । ଏହି ତତ୍ୱ କ୍ୟାପିଟାଲରୁ ବ୍ୟାପିଛି କାକଟପୁରକୁ । ପାଣ୍ଡିଆନଙ୍କ ଘର ଉପରେ ଗୋବର ମାଡ଼ ଘଟଣା ରାଜ୍ୟ ରାଜନୀତିକୁ ସରଗରମ କରି ଦେଇଥିଲା । ଆଜି କାକଟପୁର ବିଡିଓଙ୍କୁ ହୋଇଛି ଗୋବର ମାଡ଼ । ଆଉ ଗୋବରକୁ ନେଇ ଏବେ ଆରମ୍ଭ ହୋଇଛି ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ଗତ ଶନିବାର ଦିନ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭି କାର୍ତିକେୟନ ପାଣ୍ଡିଆନଙ୍କ ଘର ଉପରେ ବିଜେପି କର୍ମୀଙ୍କ ଆକ୍ରମଣ ପରେ ଉଠିଥିଲା ପଡିଥିଲା ରାଜ୍ୟର ରାଜନୀତି । ଏହି ଆକ୍ରମଣ ବେଳେ ଗୋବର ମାଡ଼ କରି ବିଜେପିର କର୍ମୀ ପ୍ରତିବାଦର ଏକ ନୂଆ ଫର୍ମୁଲା ଆପଣେଇଥିଲେ । ଆଉ ଏବେ ଏହି ଗୋବର ମାଡ଼ କ୍ୟାପିଟାଲରୁ ଡେଇଁ ପହଁଚିଛି କାକଟପୁରରେ ।
ସବୁ ଦିନ ଭଳି ଆଜି କାକଟପୁର ବ୍ଳକ କାର୍ଯ୍ୟାଳୟରେ କାମ କରୁଥିଲେ ବିଡିଓ ସନ୍ତୋଷ ସାହୁ । ହଠାତ୍ ଅଫିସ ଭିତରୁ ପସି ଆସି ଗାଳିଗୁଲଜ କରିଥିଲେ ଜଣେ ଯୁବକ । କେହି କିଛି ବୁଝିବା ପୂର୍ବରୁ ସାଂଗରେ ଆଣିଥିବା ବ୍ୟାଗ ଭିତରୁ ଗୋବର କାଢି ଫିଙ୍ଗିଥିଲେ ବିଡିଓଙ୍କ ଉପରେ । ବ୍ଲକ କର୍ମଚାରୀ କାବୁ କରିବାକୁ ଉଦ୍ୟମ କଲାବେଳେ ଧକକା ମାରି ସେଠାରୁ ଖସି ପଳାଇଥିଲେ ସଂପୃକ୍ତ ଯୁବକ ।
ପ୍ରଧାନମନ୍ତ୍ରୀଙ୍କ ଆବାସ ଯୋଜନାରେ ଘର ଖଣ୍ଡେ ନପାଇବାରୁ ଯୁବକ ଜଣକ କ୍ଷୁବ୍ଧ ହୋଇ ଏପରି କାଣ୍ଡ କରିଥିବା କୁହାଯାଉଛି । ଏ ନେଇ ବିଡିଓ ଅଭିଯୋଗ କରିବା ପରେ ପୁଲିସ ତନାଘନା ଆରମ୍ଭ କରିଛି । ସେପଟେ ଗୋବର ଫିଙ୍ଗିଥିବା ଯୁବକଙ୍କୁ ଗିରଫ କରିବା ପାଇଁ ଦାବି କରି ବ୍ଳକ କାର୍ଯ୍ୟାଳୟରେ ତାଲା ପକାଇ ଧାରଣା ଦେଇଛନ୍ତି ବ୍ଳକର କର୍ମଚାରୀ । ଅନେକ ସମୟରେ ନେତାଙ୍କ ଉପରେ ଅଣ୍ଡା ମାଡ଼ ରାଜ୍ୟରେ ବେଶ୍ ଚର୍ଚ୍ଚା ସୃଷ୍ଟି କରିିଛି । ଏବେ ବିରୋଧୀଙ୍କର ଆଉ ଏକ ଅସ୍ତ୍ର ପାଲଟିଛି ଗୋବର ।