ବାଣୀବିହାରରେ ଭିସିଙ୍କ ଅନଶନ ! ଉତ୍କଳ ବିଶ୍ୱବିଦ୍ୟାଳୟ ପରିସରରେ ଶାନ୍ତିି ଫେରାଇ ଆଣିବା ପାଇଁ କାର୍ଯ୍ୟାଳୟ ସମ୍ମୁଖରେ ଅନଶନ, ସମର୍ଥନରେ ଯୋଗ ଦେଲେ କିଛି ଅଧ୍ୟାପକ ଓ ଛାତ୍ର
କନକ ବ୍ୟୁରୋ : ଅନଶନରେ ଭିସି । ଶାନ୍ତି ପାଇଁ ଅନଶନରେ ବସିଲେ ଉତ୍କଳ ବିଶ୍ୱବିଦ୍ୟାଳୟର ଭିସି ସୌମେନ୍ଦ୍ର ମୋହନ ପଟ୍ଟନାୟକ । କ୍ୟାମ୍ପସରେ ଶାନ୍ତି ଓ ଶୈକ୍ଷିକ ବାତାବରଣ ଫେରାଇ ଆଣିବାକୁ ଅନଶନରେ ବସିଛନ୍ତି ଭିସି । ନିଜ କାର୍ଯ୍ୟାଳୟର ପେଣ୍ଡାଲରେ ଅନଶନ କରିଛନ୍ତି । ଭିସିଙ୍କୁ ନୈତିକ ସମର୍ଥନ ଜଣାଇ ବିଶ୍ୱବିଦ୍ୟାଳୟର କିଛି ଅଧ୍ୟାପକ ଓ ଛାତ୍ର ଅନଶନରେ ବସିଛନ୍ତି । ସୋମବାର ଦିନ ୟୁନିଭରସିଟିରୁ ସାଇନ୍-ଏ-ଡାଏ ଉଠିବା ସହ କ୍ଲାସ ଆରମ୍ଭ ହୋଇଥିଲା । ଏବଂ କଡା ଚେକିଂ ସହ ଆରମ୍ଭ ହୋଇଥିଲା ପ୍ରଥମ ଦିନ । କିନ୍ତୁ ଖୋଲିବାର ମାତ୍ର କିିଛି ସମୟ ଭିତରେ ନିର୍ବାଚନ କରିବା ଦାବିରେ ପୁଣି କ୍ୟାମ୍ପସରେ ଅଶାନ୍ତିି ଦେଖାଦେଇଥିଲା । କିଛି ଆଶାୟୀ ଛାତ୍ର ନେତା ଭିସିଙ୍କ କାଯ୍ୟାଳୟକୁ ଘେରାଉ କରିବା ସହ ନିର୍ବାଚନ କରିବାକୁ ଦାବି କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଉତ୍କଳ ବିଶ୍ୱବିଦ୍ୟାଳୟରେ ଶୈକ୍ଷିକ ବାତାବରଣ ଫେରାଇ ଆଣିବା ପାଇଁ କୁଳପତି ଧାରଣାରେ ବସିଥିବା ବେଳେ ପ୍ରତିକ୍ରିୟା ରଖିଛନ୍ତି ଉଚ୍ଚଶିକ୍ଷା ମନ୍ତ୍ର ଅନନ୍ତ ନାରାୟଣ ଦାସ । ଭିସି ଅନଶନ ସମ୍ପର୍କରେ ସରକାରଙ୍କୁ ଅବଗତ କରାଇନାହାନ୍ତି ବୋଲି କହିଛନ୍ତି ମନ୍ତ୍ରୀ । ଏହାସହ ପୁଣି ଥରେ ନିର୍ବାଚନ ପ୍ରସଙ୍ଗରେ ପ୍ରତିକ୍ରିୟା ରଖି ମନ୍ତ୍ରୀ କହିଛନ୍ତି ଥରେ ଥରେ ନିର୍ବାଚନ ସରିଲେ ଆଉ ହୋଇନଥାଏ । ତେବେ ବାଣୀବିହାରରେ ନିର୍ବାଚନ ନେଇ ଏବେ କିଛି କହିହେବନି ବୋଲି କହିଛନ୍ତି ମନ୍ତ୍ରୀ ଅନନ୍ତ ଦାସ ।
ସେପଟେ ବାଣୀବିହାରରେ ପୁଣିଥରେ ଛାତ୍ର ସଂସଦ ନିର୍ବାଚନ କରିବା ଲାଗି ଛାତ୍ରନେତାମାନେ କରୁଥିବା ଦାବିକୁ ନେଇ ଆଜି ଆଲୋଚନା ହୋଇଛି । ତିନି ଦଳର ଛାତ୍ରନେତା ଓ ପିଜି କାଉନସିଲର ସଦସ୍ୟଙ୍କ ସହ ଆଲୋଚନା ହୋଇଛି । ନିର୍ବାଚନ ପାଇଁ ଆବଶ୍ୟକ ପରିବେଶ ହେଲେ ପୁଣିଥରେ ଛାତ୍ର ସଂସଦ ନିର୍ବାଚନ ହୋଇପାରିବ ବୋଲି ଜଣାପଡିଛି । ଏନେଇ ବାଣୀବିହାର କର୍ତ୍ତୃପକ୍ଷ ସରକାରଙ୍କୁ ଅବଗତ କରାଇବେ । ଏହା ସହ ଆଇନଶୃଙ୍ଖଳା ପରିସ୍ଥିତିର ଅନୁଧ୍ୟାନ କରିବା ପାଇଁ ପୋଲିସ ମହାନିର୍ଦ୍ଦେଶକଙ୍କୁ ମଧ୍ୟ ବାଣୀବିହାର କର୍ତୃପକ୍ଷ ଜଣାଇବେ । କ୍ୟାମ୍ପସରେ ଅନୁକୁଳ ପରିବେଶ ହେଲେ ବାଣୀବିହାର ଛାତ୍ର ସଂସଦ ନିର୍ବାଚନ ପୁଣିଥରେ ସମ୍ଭବ ବୋଲି ଛାତ୍ର ସଂସଦ ଉପଦେଷ୍ଟା ସୂଚନା ଦେଇଛନ୍ତି ।