ହୋଲିରେ ମୋଦି ଦହନ ! ବାଣିଜ୍ୟ ସହରରେ ହୁତୁହୁତୁ ହୋଇ ଜଳିବେ ୫୮ ଫୁଟର ନିରଭ ମୋଦି
ହୋଲି ପୂର୍ବରୁ ଆଜି ହୋଲିକା ଦହନ ଉତ୍ସବ ପାଳନ ହେବାକୁ ଯାଉଛି । ପୂରା ଦେଶରେ ପାଳନ ହେବ ହୋଲିକା ଦହନ ଉତ୍ସବ । କିନ୍ତୁ ଏହି ଉତ୍ସବକୁ ଏକ ନିଆରା ଢଙ୍ଗରେ ପାଳନ କରିବାକୁ ଯାଉଛନ୍ତି ମୁମ୍ବାଇବାସୀ । ଆଉ ଏଥିପାଇଁ ସବୁ ପ୍ରସ୍ତୁତି ଶେଷ ହୋଇ ସାରିଛି । ପିଏନବି ଠକେଇ ମାମଲାର ମୁଖ୍ୟ ଅଭିଯୁକ୍ତ ନୀରବ ମୋଦିଙ୍କ କୁଶପୁତ୍ତଳିକା ଦାହ କରି ହୋଲିକୁ ମୁମ୍ବାଇବାସୀ ପାଳନ କରିବେ ବୋଲି ଜଣା ପଡ଼ିଛି । ଏଥିପାଇଁ ମୁମ୍ବାଇର ଓ୍ଵର୍ଲିରେ ଥିବା ବିଡ଼ିଡ଼ି ଚୌଲର ଲୋକମାନେ ୫୮ଫୁଟ୍ ଉଚ୍ଚତାର କୁଶପୁତଳିକା ତିଆରି କରିଥିବା ଜଣା ପଡ଼ିଛି । ହୋଲିର ପୂର୍ବ ଦିନ ଲୋକମାନେ କାଠ ଜାଳି ଖରାପ ଶକ୍ତିକୁ ବିଦାୟ ଦେଇ ହୋଲି ଦିନ ଦେବାଦେବୀମାନଙ୍କୁ ସ୍ୱାଗତ କରିଥାନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ଅବସରରେ ନିରବ ମୋଦିଙ୍କ ଭଳି ଖରାପ ବ୍ୟକ୍ତିଙ୍କ କୁଶପୁତ୍ତଳିକା ଦାହ କରି ସେଭଳି ଲୋକ ଯେମିତି ଆଗକୁ ନ ଆସନ୍ତି ତାହା କାମନା କରିଛନ୍ତି । ୫୮ ଫୁଟର ନିରଭ ମୋଦିଙ୍କ ଏହି ପୁତ୍ତଳିକାରେ ‘ପିଏନବି ଘୋଟାଲା ଡାଇମଣ୍ଡ କିଙ୍ଗ’ ବୋଲି ଲେଖା ହୋଇଛି । ଆଉ ଏହି କୁଶପୁତ୍ତଳିକାକୁ ଦହନ କରି ହୋଲି ଉତ୍ସବ ପାଳନ କରିବାକୁ ନିଷ୍ପତି ନେଇଛନ୍ତି ମୁମ୍ବାଇବାସୀ । ୧୧୪୦୦ କୋଟି ଟଙ୍କାର ପିଏନବି ମହାଘୋଟାଲାର ମୁଖ୍ୟ ଅଭିଯୁକ୍ତ ହେଉଛନ୍ତି ନିରଭ ମୋଦି ।
କୁଶପୁତ୍ତଳିକାକୁ କୌଣସି କାରିଗର ଦ୍ୱାରା ନୁହେଁ ବରଂ ଓ୍ଵର୍ଲିରେ ରହୁଥିବା ଲୋକମାନେ ମିଶି ତିଆରି କରିଥିବା ଜଣା ପଡ଼ିଛି । ଦୀର୍ଘ ୮ବର୍ଷଧରି ଏହି ଚୌଲର ଲୋକମାନେ ସାମାଜିକ ପ୍ରସଙ୍ଗକୁ ନେଇ ହୋଲି ପାଳନ କରିଥାଆନ୍ତି । ବାୟୁମଣ୍ଡଳକୁ ଧ୍ୟାନରେ ରଖି ଏହି କୁଶପୁତ୍ତଳିକା ତିଆରି କରିବା ପାଇଁ ଲୋକମାନେ କମ କାଠ ଏବଂ ଅଧିକ ଘାସକୁ ବ୍ୟବହାର କରଥିବା ଜଣା ପଡ଼ିଛି । ଏହି ବର୍ଷ ହୋଲିରେ ଏହା ସବୁଠାରୁ ବଡ଼ କୁଶପୁତ୍ତଳିକା ହେବ ବୋଲି ଆୟୋଜକମାନେ ଦାବି କରୁଥିବା ବେଳେ ଏହାକୁ ଲିମକା ବୁକ୍ ଅଫ୍ ରେକର୍ଡ଼ରେ ସାମିଲ କରିବା ପାଇଁ ଲୋକମାନେ ସଂପୃକ୍ତ କର୍ତ୍ତୃପକ୍ଷଙ୍କୁ ସଂପର୍କ କରିଥିବା ଜଣାପଡ଼ିଛି ।